ក្រចេះ៖ នៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ក្នុងរយៈពេល៣ថ្ងៃកន្លងទៅថ្មីៗនេះ ខេត្តក្រចេះ ចំនួនអ្នកស្លាប់ និងរងរបួស គឺមានការកើនឡើងបើប្រៀបធៀបទៅនឹងឆ្នាំ២០១៥កន្លងទៅ នេះបើយោងតាមការឲ្យដឹងពីមន្ត្រីនគរបាលចរាចណ៍ផ្លូវគោក នៃស្នងការដ្ឋាននគរបាលខេត្តក្រចេះ។
លោកវរៈសេនីយ៍ទោ ណាប់ ទិដ្ឋា នាយរងការិយាល័យកណ្ដាលសណ្ដាប់ធ្នាប់នៃស្នងការរដ្ឋាននគរបាលខេត្តក្រចេះ ស្ដីពីករណីគ្រោះថ្នាក់ចរាចរណ៍ និងភ្ញៀវទេសចរណ៍ ក្នុងឱកាសបុណ្យចូលឆ្នាំថ្មី ប្រពៃណីជាតិ បានឲ្យដឹងថា រយៈពេល០៣ថ្ងៃ គិតចាប់ពី ថ្ងីទី១៤ដល់១៦ ខែមេសា ឆ្នាំ២០១៦ករណីគ្រោះថ្នាក់ចរាចរណ៍បានកើតឡើង ចំនួន ៥លើក លើ ៣លើក បើប្រៀបធៀបនឹងឆ្នាំ២០១៥ កើនចំនួន ២លើក។
នៅក្នុងក្រុងក្រចេះ ១លើក លើ ១លើក ស្រុកចិត្របុរី ១លើក ស្រុកឆ្លូង ១លើក និងស្រុកស្នួល កើតឡើងចំនួន ២លើក លើ ១លើក ក្នុងនោះបង្កដោយម៉ូតូនឹងរថយន្ត ១លើក ម៉ូតូកៀកង់ ១លើក រថយន្តនឹងម៉ូតូ ចំនួន២លើក និងរថយន្តបង្កដោយខ្លួនឯង ១លើក។ បណ្ដាលឲ្យមនុស្សស្លាប់ចំនួន ៤នាក់ ស្រី ៣នាក់ លើ ១នាក់ ប្រៀបធៀបនឹងឆ្នាំ២០១៥ របួសធ្ងន់ ៩នាក់ ស្រី ៤នាក់ លើ ៧នាក់ ប្រៀបធៀបនឹងឆ្នាំ២០១៥ របួសស្រាល ១៣នាក់ ស្រី ៩នាក់ លើ ៣នាក់ ប្រៀបធៀបនឹងឆ្នាំ២០១៥ ដោយខូចខាតរថយន្ត ៣គ្រឿង ខូចខាតស្រាល ២គ្រឿង កើន ៣គ្រឿង និងខូចខាតម៉ូតូ ៤គ្រឿង ស្រាល ២គ្រឿង កើន ១គ្រឿង។
បង្ករដោយរថយន្តបុកម៉ូតូ មានចំនួន ២លើក ម៉ូតូបុកម៉ូតូ ចំនួន១លើក ម៉ូតូបុកអ្នកថ្មើរជើង ចំនួន ០១លើក និងគ្រោះថ្នាក់បង្កឡើងដោយរថយន្តខ្លួនឯង១លើក។ មូលហេតុបង្ក គឺបើកបរមិនគោរពសិទ្ធអាទិភាព ៤លើក ស្មើនិង៥០% ល្បឿនលឿន ៣លើក ស្មើនឹង៣៧% និងកត្តាផ្លូវ ១លើក ស្មើនិង១៥% បណ្ដាលឲ្យមនុស្សស្លាប់ ៤នាក់ ស្រី៣ រងរបួសធ្ងន់ចំនួន ៩នាក់ ស្រី៤នាក់ បើប្រៀបធៀបនឹងឆ្នាំ២០១៤ មានការកើនឡើងចំនួន ១២នាក់ មនុស្សស្លាប់ចំនួន ០៤នាក់ បើប្រៀបធៀបនឹងឆ្នាំ២០១៥ មានការកើនឡើងចំនួន ៣នាក់។
គូសបញ្ជាក់ថា ករណីគ្រោះថ្នាក់ចរាចរណ៍ ៩លើក បង្កឲ្យមានមនុស្សរងរបួសស្លាប់ ៤នាក់ មានការកើនឡើងបែបនេះ គឺបណ្ដាលមកពីអ្នកបើកបរមិនគោរពច្បាប់ចរាចរណ៍ មិនគោរពសិទ្ធអាទិភាព ក្នុងល្បឿនលឿន មិនយោគយល់គ្នា និងអ្នកថ្មើរជើងឆ្លងកាត់មិន ប្រុងប្រយត្ន័។ ហើយលោក ក៏បានធ្វើការអំពាវនាវផងដែរ ដល់ប្រជាពលរដ្ឋទាំងអស់ដែលធ្វើដំណើរនៅលើដងផ្លូវ ត្រូវមានការប្រុងប្រយ័ត្នខ្ពស់ក្នុងការបើកបរ និងអ្នកបញ្ជារយានយន្តគ្រប់ប្រភេទ និងត្រូវគោរពច្បាប់ចរាចណ៍ឲ្យបានត្រឹមត្រូវគ្រប់គ្នា។
ដោយឡែកចំពោះចំនួនភ្ញៀវទេសចរជាតិ និងអន្តរជាតិ ចេញចូលទៅទស្សនារមណីយដ្ឋានក្នុងខេត្តសរុបមានចំនួន ១០៣,៥៣៣នាក់ ក្នុងនោះភ្ញៀវអន្តរជាតិ មានចំនួន ២៥៧នាក់ ហើយចំនួនភ្ញៀវជាតិ បើប្រៀបធៀបនឹងឆ្នាំ២០១៥ មានការកើនឡើងចំនួន៤,៩៧ភាគរយ ៕
ដោយ កិះ ខន
