បន្ទាយមានជ័យ ៖ រថយន្ត២គ្រឿងដឹកគ្រឿងក្នុងជ្រូកថៃ២៤កេស ស្មើរ១,០៨៥គីឡូក្រាម ត្រូវបាននគរបាលចាប់បានកាលពីវេលាម៉ោង៣និង៤០នាទីយប់ឈានចូលថ្ងៃទី៣ ខែមិថុនា ឆ្នាំ២០១៨ នៅតាមបណ្តោយផ្លូវជាតិលេខ៥ ស្ថិតភូមិ/សង្កាត់អូរអំបឹល ក្រុងសិរីសោភ័ណ។
លោកឧត្តមសេនីយ៍ត្រី ចាប សុផារិទ្ធ ស្នងការរងនគរបាលខេត្តបន្ទាយមានជ័យបានឲ្យដឹងថាម្ចាស់រថយន្តដែលជាអ្នកបើកបរមានទី១.ឈ្មោះ យួរ រដ្ឋា ភេទប្រុស អាយុ៣៨ឆ្នាំ រស់នៅភូមិដូង ឃុំ/ស្រុកម៉ាឡៃ ជាម្ចាស់រថយន្តធុនតូយូតាស៊ីណា ពាក់ស្លាកលេខ ភ្នំពេញ 2AJ-3407 ដឹកគ្រឿងក្នុងជ្រូក២០កេស ទី២.ឈ្មោះ សៀម ណេង ភេទប្រុស អាយុ៣៦ឆ្នាំ រស់នៅភូមិកញ្ចាង ឃុំកុមារាជា ស្រុកបាទី ខេត្តតាកែវ ម្ចាស់រថយន្តតូយោតាហាយឡែនឌ័រ ពាក់ស្លាកលេខ ភ្នំពេញ 2AI.2801ដែលដឹកគ្រឿងក្នុងជ្រូក៤កេស។
គ្រឿងក្នុងជ្រូកដែលឈ្មួញលួចនាំចូលពីថៃមាន២៤កេសទំងន់ស្មើ១.០៨៥គីឡូក្រាមរួមមានៈ បេះដូងជ្រូក១៥០គីឡូក្រាម, អណ្តាតជ្រូក១៩៧គីឡូក្រាម, ក្រពះជ្រូក១៣០គីឡូក្រាម, ក្រលៀនជ្រូក៥០គីឡូក្រាម, ជើងជ្រូក១១៨គីឡូក្រាម, ត្រចៀកជ្រូក២៨០គីឡូក្រាម, ពោះវៀនជ្រូក១៦០គីឡូក្រាម។
ម្ចាស់រថយន្តនិងជាអ្នកបើកបរបានឲ្យដឹងថាឈ្មួញលួចនាំចូលពីប្រទេសថៃមានបំណងនាំទៅភ្នំពេញ។ គាត់ស៊ីឈ្នួលដឹកឲ្យឈ្មួញពីក្រុងប៉ោយប៉ែតទៅភ្នំពេញឈ្នួលដឹក១កេសតម្លៃ២៥.០០០រៀល។
បច្ចុប្បន្ន កម្លាំងនគរបាលជំនាញកំពុងស្រាវជ្រាវរកចាប់ខ្លួនឈ្មួញដែលនាំចូលគ្រឿងក្នុងសត្វជ្រូកនាំចូលពីប្រទសថៃចូលមកកម្ពុជាដើម្បីចាត់ការតាមច្បាប់ ។ ចំណែកម្ចាស់រថយន្តជាបើកបរស៊ីឈ្នួលដឹកគ្រឿងក្នុងសត្វជ្រូកល្មើសច្បាប់ត្រូវបានកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់ ហើយគ្រឿងក្នុងសត្វជ្រូកខូចគុណភាពត្រូវបានយកទៅដុតកម្ចេចចោលនៅទីលានចាក់សំរាមក្រុងសិរីសោភ័ណ ។
ប្រជាពលរដ្ឋនិយាយថាបើមានការស្រាវច្រាវរកមុខអ្នកនាំចូលតើអាចរកមុខមន្ត្រីដែលឃុបឃឹតបើកដៃឲ្យឈ្មួញនាំចូលបានដែរអត់ឬគ្រាន់តែចាំបក់ផ្សែងអាដែលៗចឹងទេ។ ។ ព្រោះថ្មីៗកន្លងនេះ
លោកឡុងស្រេងអនុប្រធាននាយករដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃក៏បានចុះទៅចាប់បានឡានក្រុងលួចដឹកគ្រឿងក្នុងជ្រូកសៀមមកឲ្យខ្មែរស៊ីម្តងហើយ។មិនដឹងថាអាមិនចាប់បានមានប៉ុន្មានតោននោះទេ? ៕
