ក្រចេះ ៖ សត្វផ្សោតទឹកសាប ដែលជាប្រភេទសត្វពូជដ៏កម្រ និងជិតផុតពូជនៅលើលោក ដែលពេលបច្ចុប្បន្ន រាជរដ្ឋាភិបាលកម្ពុជា និងអង្គការ WWF កំពុងយកចិត្តទុកដាក់ក្នុងកិច្ចការពារ ថែរក្សា និងអភិរក្ស។
នាព្រឹកថ្ងៃទី០៥ ខែមេសា ឆ្នាំ២០១៦ វេលាម៉ោង ៦និង៣០នាទី ប្រជាពលរដ្ឋ បានប្រទះឃើញសាកសពសត្វផ្សោតធំមួយក្បាលដ៏កម្រ ងាប់អណ្ដែតនៅក្បែរមាត់ច្រាំងទន្លេមេគង្គឋិតនៅចំនុចភូមិឬស្សីចារ ឃុំថ្មគ្រែ ស្រុកចិត្របុរី ខេត្តក្រចេះ ក្នុងសភាពហើមស្អុយ។
បើតាមការឲ្យដឹងពីមន្ត្រីជំនាញអង្គការ WWF ប្រចាំនៅខេត្តក្រចេះ បានឲ្យដឹងថា មូលហេតុនៃការងាប់របស់សត្វផ្សោតដ៏ធំមួយក្បាលនេះ គឺមិនទាន់ដឹងពីមូលហេតុច្បាស់នៅឡើយទេ ដោយរងចាំមន្ត្រីជំនាញផ្នែកវះកាត់ធ្វើការពិសោធន៍។
ប្រភពដដែល បានបន្តថា សាកសពសត្វផ្សោតដ៏ធំមួយក្បាលនេះ មានទំងន់ប្រមាណជាង ១០០គីឡូក្រាម មានវ័យចំណាស់ ហើយជាផ្សោតឈ្មូល និងជាសត្វផ្សោតរស់នៅក្នុងអន្លង់អភិរក្សសត្វផ្សោតកាំពី ហើយសត្វផ្សោតនេះ បានងាប់ប្រហែលជា២ទៅ៣ថ្ងៃមកហើយ។
ការងាប់របស់សត្វផ្សោតដ៏កម្រមួយនេះ គឺជាករណីលើកទី១ហើយ នៅក្នុងឆ្នាំ២០១៦នេះ ក្នុងរយៈពេល៣ខែដើមឆ្នាំ ហើយបើប្រៀបធៀបទៅនឹងរយៈពេល៣ខែក្នុងឆ្នាំ២០១៥ គឺមានសត្វផ្សោតងាប់១ក្បាលដូចគ្នា។
ទន្ទឹមនឹងនេះដែរអង្គការ WWFក៏បានសហការយ៉ាងស្អិតរមួតជាមួយខណ្ឌរដ្ឋបាលជលក្រចេះ និងក្រុមឆ្នាំទន្លេ តែងតែចុះធ្វើការត្រួតពិនិត្យល្បាតជាញឹកញ៉ប់នៅតាមតំបន់អន្លង់អភិរក្សសត្វផ្សោត និងអន្លង់ត្រីមេពូជ ចាប់ពីក្បាលកោះទ្រង់រហូតដល់ព្រំព្រទល់ខេត្តស្ទឹងត្រែង ដើម្បីទប់ស្កាត់ និងបង្ក្រាបនូវរាល់បទល្មើសនេសាទក្នុងតំបន់អភិរក្សពីសំណាក់ជនខិលខូចមួយចំនួន។
ប៉ុន្តែទោះបីជាយ៉ាងនេះក្ដី ក៏នៅមានជនខិលខូច និងពួកឱកាសនិយមមួយចំនួន តែងតែលួចធ្វើសកម្មភាពនេសាទខុសច្បាប់ នៅពេលដែលសមត្ថកិច្ចចម្រុះមិនបានចុះល្បាត និងមានការចន្លោះប្រហោងម្ដងៗ។
ជាក់ស្ដែងនៅចុងខែ៣ និងដើមខែ៤ ឆ្នាំ២០១៦នេះ សមត្ថកិច្ចចម្រុះ បានចុះទប់ស្កាត់ បង្ក្រាបបទល្មើសនេសាទបានចំនួន២ ករណី និងឃាត់ខ្លួនជនសង្ស័យបានចំនួន៤ នាក់ និងបានធ្វើការកសាងសំនុំរឿងតាមនីតិវិធីបញ្ជូនខ្លួនជនសង្ស័យទៅកាន់សាលាដំបូងខេត្តក្រចេះ៕ ដោយ កិះ ខន