ភ្នំពេញ៖ ប្រញ៉ាប់ឡើងៗការផ្តល់ការអនុគ្រោះពន្ធលើការបង់ពន្ធប្រថាប់ត្រាតែមួយដង ចំពោះការផ្ទេរកម្មសិទ្ធិអចលនទ្រព្យច្រើនដង ដែលបានចុះបញ្ជីរួច នឹងបញ្ចប់នៅថ្ងៃទី៣១ ខែធ្នូ ឆ្នាំ២០១៨ ខាងមុខនេះហើយ ។ ព្រឹកថ្ងៃទី៣០ ខែឧសភា ឆ្នាំ២០១៨ក្នុងកិច្ចប្រជុំ នៅសាលារាជធានីភ្នំពេញ លោកឃួង ស្រេង អភិបាលរាជធានីភ្នំពេញ លើកឡើងថា ដោយពិនិត្យឃើញពីការលំបាករបស់បងប្អូនប្រជាពលរដ្ឋ និងដើម្បីជួយ
សម្រួលដល់ម្ចាស់កម្មសិទ្ធិអចលនទ្រព្យចុងក្រោយ ដែលពុំមានលទ្ធភាពបង់ពន្ធប្រថាប់ត្រាច្រើនដង គ្រប់ដំណាក់កាល នៃការផ្ទេរអចលនទ្រព្យ សម្តេចតេជោនាយករដ្ឋមន្ត្រី បានអនុញ្ញាតឯកភាពជាគោលការណ៍ ដើម្បីបន្តផ្តល់ការអនុគ្រោះបង់ពន្ធប្រថាប់ត្រាតែមួយដង លើការផ្ទេរកម្មសិទ្ធិអចលនទ្រព្យ បន្តដៃគ្នាពីម្នាក់ទៅម្នាក់ច្រើនដងនៅត្រឹមថ្នាក់សង្កាត់ខណ្ឌ ដូចច្នោះ ចំពោះសុពលភាព នៃការអនុវត្ត គឺត្រឹមថ្ងៃទី៣១ ខែធ្នូ ឆ្នាំ២០១៨ប៉ុណ្ណោះ។ លោកអភិបាលរាជធានីភ្នំពេញបានណែនាំថា៖ ក្នុងនាមយើងជាអាជ្ញាធរគ្រប់លំដាប់ថ្នាក់ត្រូវធ្វើការ ផ្សាព្វផ្សាយឲ្យបានទូលំទូលាយដល់ប្រជាពលរដ្ឋ។
លោក ឃួង ស្រេង ក្នុងឱកាសនោះបានជំរុញឲ្យអាជ្ញាធរខណ្ឌ សង្កាត់បើកការប្រជុំតាមភូមិ ហើយរដ្ឋបាលរាជធានីភ្នំពេញ ត្រូវធ្វើលិខិតជំនួយស្មារតីទៅភូមិ ដើម្បីផ្សព្វផ្សាទៅប្រជាពលរដ្ឋ សំខាន់កុំជះទឹកដាក់គ្នា យើងជ្រកក្នុងតំបូលតែមួយត្រូវតែរួមគ្នាធ្វើការងារនេះឲ្យបានល្អ ។ ក្រោយការប្រជុំផ្សព្វផ្សាយឲ្យប្រជាជនបានដឹងឮដល់កម្រិតណាហើយនោះ អាជ្ញាធរខណ្ឌ ត្រូវរាយការណ៍មកក្រុងវិញ ដើម្បីយើងរាយការណ៍ ពីការងាររបស់យើងទៅក្រសួងមហាផ្ទៃ។
លោក ឃួង ស្រេង បានធ្វើការណែនាំថា កន្លងមកនេះមានមន្ត្រីសុរិយោដីនៅខណ្ឌ វាស់វែងដីជូនប្រជាពលរដ្ឋមានការយឺតយ៉ាវ ហើយមានមន្ត្រីខ្លះមានការទាលុយគេថែមទៀត ។ លោក បានបន្តថា “បើការទាលុយគេ ចំកន្លែងក្តៅវាក្តៅហើយ សូមឲ្យប្រយ័ត្នប្រយែងខ្លួន ល្មមដល់ពេលត្រូវលាត់ជើងខោ ចុះជួយប្រជាពលរដ្ឋហើយ កុំបង្កការលំបាកឲ្យប្រជាពលរដ្ឋទៀត”។
លោកអភិបាល ស្នើឲ្យលោកចៅសង្កាត់ចុះដល់ផ្ទះប្រជាពលរដ្ឋ ដើម្បីចង់ដឹងពីការចង់បានរបស់ប្រជាពលរដ្ឋ យើងជួយប្រជាពលរដ្ឋឲ្យចំគោលដៅដែលពួកគាត់ចង់បាន។ សម្រាប់កម្មវិធីថ្ងៃនេះចៅសង្កាត់ត្រូវធ្វើការផ្សព្វផ្សាយឲ្យពួកគាត់បានយល់ដឹង ដើម្បីអោយពួកគាត់ទៅបង់ព័ន្ធចុងក្រោយ។
លោក កែម សម្បត្តិ អគ្គនាយករងអគ្គនាយកដ្ឋានពន្ធដារបានណែនាំមន្ត្រីពន្ធដាថា៖ ការប្រមូលពន្ធត្រូវបង្កភាពងាយស្រួលឲ្យពួកគាត់ នៅពេលពួកគាត់មកបង់ព័ន្ធនិងធ្វើឲ្យអស់សក្តានុពល និងជំរុញដាក់សេចក្តីប្រកាស់ទៅដល់អ្នកជាប់ពន្ធ ។ លោក បានបញ្ជាក់ថា នៅភ្នំពេញចំណូលពន្ធប្រមូល បានច្រើនជាងគេ ពោលគឺមានរហូតទៅដល់៩៣ទៅ៩៤ភាគរយឯណោះ៕
