បន្ទាយមានជ័យ ៖ កម្លាំងនគរបាលប្រឆាំងបទល្មើសសេដ្ឋកិច្ចខេត្តបានធ្វើការស្ទាក់ចាប់រថយន្តប្រភេទតាកូម៉ាមួយគ្រឿងនាំយកមកកាន់ស្នងការដ្ឋាននគរបាលខេត្តបន្ទាយមានជ័យបន្ទាប់ពីសង្ស័យថាបានដឹកជញ្ជូននឹងជួញដូរសត្វព្រៃដោយខុសច្បាប់កាលពីវេលាម៉ោង២១និង៣០នាទីយប់ថ្ងៃទី២៧ ខែឧសភា ឆ្នាំ២០១៨លើកំណាត់ផ្លូវជាតិលេខ៥៧ស្ថិតក្នុងភូមិថ្មីស្រុកម៉ាឡៃខេត្តបន្ទាយមានជ័យ។
លោកឧត្តមសេនីយ៍ត្រី ចាប សុផាឫទ្ធិ ស្នងការរង ផែនប្រឆាំងបទល្មើសសេដ្ឋកិច្ចបានអោយដឹងថា បន្ទាប់ពីទទួលបានព័ត៌មានទាក់ទងនិងការដឹកជញ្ជូនសត្វព្រៃនេះ លោកឧត្តមសេនីយ៍ទោ អាត់ ខែម ស្នងការនៃស្នងការដ្ឋាននគរបាលខេត្តបានដាក់បញ្ជារអោយកម្លាំងជំនាញចុះស្ទាក់ចាប់ជាបន្ទាន់។ ជាលទ្ធផលកម្លាំងបានឃាត់រថយន្តមួយគ្រឿងម៉ាកតាកូម៉ានៅចំនុចខាងលើ រួចនាំមកកាន់ស្នងការខេត្តដើម្បីត្រួតពិនិត្យមើល។
ជាលទ្ធផលសមត្ថកិច្ចបានឆែកឆេររកឃើញសត្វអន្សង ចំនួន៧០ក្បាលស្មើនឹង៣១៥គីឡូក្រាម និងសត្វអណ្តើកចំនួន៦១៨ក្បាលស្មើនឹង៤០៦គីឡូក្រាម។
សូមបញ្ជាក់ថា ក្រោយពីធ្វើការរាប់ចំនួនរួចរាល់សត្វទាំងអស់ត្រូវបានប្រគល់ទៅអោយមន្ត្រីជំនាញរដ្ឋបាលព្រៃឈើ ដើម្បីចាត់ការបន្តតាមនីតិវិធី ៕
