ស្នួល ខេត្តក្រចេះ ៖ មជ្ឍដ្ឋាននានាបានសង្កេតឃើញថាជំនួញឈើប្រណិតល្មើសច្បាប់ឆ្លងដែនយកទៅលក់នៅប្រទេសវៀតណាមបានចាប់ធ្វើសកម្មភាពកក្រើកឡើងបែបគគ្រឹគគគ្រេងយ៉ាងអនាធិតេយ្យក្នុងភូមិសាស្ត្រទឹកដីអាណាចក្រខេត្តក្រចេះពិសេសច្រកជ័យឃ្លាំងបន្ទាប់ពីវត្តមានលោកវ៉ា ថនត្រូវបាន រដ្ឋាភិបាលប្រកាសតែងតាំងឡើងជាអភិបាលខេត្ត។
ថ្មីៗនេះគេសង្កេតឃើញថានៅចំណុចប៉ុស្ដិ៍ច្រកជ័យឃ្លាំងស្ថិតក្នុងភូមិជ័យឃ្លាំងឃុំក្រញួងសែនជ័យស្រុកស្នួលខេត្តក្រចេះមានសកម្មភាពដឹកជញ្ជូនបទល្មើសព្រៃឈើយកទៅលក់នៅប្រទេសវៀតណាម។ករណីនេះមន្ត្រីអាវុធហត្ថស្រុកស្នួលម្នាក់សុំលាក់ឈ្មោះបានខ្សឹបប្រាប់ថាបទល្មើសដឹកជញ្ជូនឈើនៅច្រកជ័យឃ្លាំងនេះ គឺមានការបើកភ្លើងខៀវពីអស់លោកមេ ថ្នាក់ដឹកនាំខេត្តមានអំណាចមួយរូបទើបអាចធ្វើទៅបាន។
ចំណែកមន្ត្រី៣រូបដែលកំពុងបំពេញបេសកកម្មពាក់ព័ន្ធនឹងកិច្ចការត្រួតពិនិត្យកាពារព្រំដែនដែលស្ថិតក្នុងចំនុចភូមិជ័យខ្លាំង ឃុំក្រញួងសែនជ័យ ស្រុកស្នួលខេត្តក្រចេះ រួមមាន៖ទី១”លោកកែវ ណារឹទ្ធ ភារៈកិច្ចជាប្រធានស្នាក់ការច្រកជ័យឃ្លាំង ។ទី២”លោកវរៈសេនីត្រីសឹង្ហ សំណាង នឹងជាមេបញ្ជាការកងអនុសេនាតូចលេខ២(ឃ2)។ទី៣”លោក ម៉ម ប៊ុនបញ្ញា ជានាយការពារព្រំដែនជ័យឃ្លាំងគឺជាមនុស្សដែលគេបានស្គាល់ច្បាស់ស្ទើរតែគ្រប់ៗគ្នាថាជាមនុស្សដែលមានឥទ្ធិពលជាងគេប្រចាំនៅច្រកនេះ។ទោះជាយ៉ាងណាមានការវាយមត្លៃថាមនុស្សបីនាក់នេះ គ្រាន់តែជាកូនជឹងរបស់គេចាំស៊ីឡាកតែប៉ុណ្ណោះ ………..!។
បើតាមប្រភពខាងលើបានបង្ហើបប្រាប់ថាមន្ត្រីទាំង៣រូបខាងលើនេះគឺកំពុង ប្រឈមពីការតាមដានពីសំណាក់មន្ទីរជំនាញស្ថាប័នពាក់ព័ន្ធចាប់តាំងពីថ្នាក់ខេត្ត រហូតដល់ថ្នាក់ក្រសួងថា តើមន្ត្រី៣រូបនេះពិតជាមានការប្រព្រឹត្តពុករលួយដូចការចោទប្រកាន់ពីសាធារណៈជនជាពិសេសដូចតាមគ្រប់បណ្តាញសារពត៌មាននានា ផ្សាយដែរឬអត់? ។ ការពិត សកម្មភាពដឹកជញ្ជូនបទល្មើសព្រៃឈើចេញទៅបរទេសតាមច្រកជ័យឃ្លាំងគេជឿថាមិនអាចគេចផុតពីភ្នែកចៅហ្វាយខេត្ត ពិសេសមជ្ឍទូទៅបានដាក់ការសង្ស័យយ៉ាងមុតមាំលើលោកស្នងការខេត្តក្រចេះនោះតែម្ដង។
បើតាមសេចក្ដីរាយការណ៍ពីភ្នាក់ងារយើងដឹងថា៖ នៅប៉ុស្ដ៍ច្រកជ័យឃ្លាំងសកម្មភាពក្រុមឈ្មួញឈើនៅតាមច្រកនោះបានផ្អាកនៅថ្ងៃទី២៥ឧសភាឆ្នាំ២០១៨។ប៉ុន្តែក៏ទទួលពត៍មានពីសមត្ថកិច្ចនៅទីនោះថាមេ មេកំពុងរត់ចរចាទៅថ្នាក់លើដើម្បីរៀបចំដំណើរការឲ្យបានរលូនចៀសអោយផុតពីអ្នកកាសែតផ្សាយញាប់ដូចម៉ាស៊ីនដេរមួយរយះនេះ អញ្ចឹងទៀត ។
ពាក់ព័ន្ធទៅនឹងប្រភពព័ត៌មានអញអាងខាងលើ ភ្នាក់ងារយើងនឹងព្យាយាមតាមប្រម៉ាញ់បទល្មើសតាមច្រកនេះបន្តទៀត! ៕