ខេត្តក្រចេះ៖ រថយន្តយីឌុបដឹកឈើ បើកចុះទូកដរចម្លងឬស្សីចារខុសបច្ចេកទេស ត្រូវបានក្រឡាប់ធ្លាក់ចូលទន្លេរចំនួន២គ្រឿង ក្នុងចំណោមរថយន្តជាង១០គ្រឿងដែលបានសម្រុកដឹកជញ្ជូនឈើចេញពីក្រុមហ៊ុនវិនិយោគរបស់កូរ៉េមួយឈ្មោះថា(ស៊ីងបាយអូថេក) កាលពីយប់ថ្ងៃទី២៥ខែឧសភា ឆ្នាំ២០១៨ នៅចំណុចកំពង់ចម្លងត្រើយខាងលិចស្ថិតក្នុងឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ។
ប្រភពព័ត៌មានពីកន្លែងកើតហេតុបានអោយដឹងថា ហេតុការក្រឡាប់ដរចម្លងដែលបណ្តាលអោយរថយន្តដឹកឈើចំនួន២គ្រឿងរបស់ក្រុមហ៊ុនកូរ៉េ ធ្លាក់ចូលទឹកទន្លេរ បានកើតឡើងកាល វេលាម៉ោងប្រមាណ១១យប់ថ្ងៃសុក្រ ១១កើត ខែជេស្ឋ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៤ ខែឧសភា ឆ្នាំ២០១៨ នៅចំណុចត្រើយខាងលិច ស្ថិតក្នុងឃុំជ្រោយបន្ទាយ ស្រុកព្រែប្រសព្វ ខេត្តក្រចេះ តែមិនតែមិនមានអ្នកណាម្នាក់រងរបួសនោះឡើយដោយលោតចូលទឹកទាន់។
មន្ត្រីនគរបាលមូលដ្ឋានបាអោយដឹងថា រថយន្តយីឌុបខាងលើនេះបានបើកចូលបានមួយគ្រឿងចតនៅលើដរចម្លងរួចហើយ អ្នកបើកបររថយន្តខាងលើបានចុះទៅជួយព្រូរថយន្តមួយគ្រឿងទៀតដើម្បីជួយគ្នា ប៉ុន្តែរពេលរថយន្តទី២បើកចុះស្រាប់តែជាន់ហ្វ្រាំងអត់ស៊ី ក៍ជ្រុលទៅប៉ះគ្នារំកិលផ្អៀងបណ្តាលអោយទូកដរចម្លងក្រឡាប់ផ្កាប់ធ្លាក់រថយន្តទាំង២គ្រឿងនោះចូលទៅក្នុងទឹកទន្លេរទៅ។
មន្ត្រីជំនាញរដ្ឋបាលព្រៃឈើ លោក ទៀប គន្ឋពិដោ នាយសង្កាត់រដ្ឋបាលព្រៃឈើបឹងចារ បានអះអាងថា រថយន្តដឹកឈើទាំងនោះមានចំនួន១១គ្រឿង គឺជាឈើស្របច្បាប់ដែលបានដឹកជញ្ជូនចេញពីក្រុមហ៊ុន(ស៊ីងបាយអូថេក)ដែលជាក្រុមហ៊ុនរបស់កូរ៉េ ។
នៅក្នុងហេតុការក្រឡាប់រថយន្តយីឌុបដឹកឈើទាំងនេះ ពលរដ្ឋដែលរស់នៅក្បែរកំពង់ដរចម្លងនេះ បានបញ្ជាក់ថាក្រុមរថយន្តដឹកឈើធំបែបនេះគឺតែងតែធ្វើសកម្មភាពដឹកជញ្ជូនពេលយប់ ដោយពេលខ្លះឆ្លងតាមដរចម្លងព្រលូងពាមតេ ខ្លះទៀតឆ្លងតាមដរចម្លងឬស្សីចារនេះឯង ក្រៅពីនោះក៍មានរថយន្តសាំយ៉ុងដឹកឈើឆ្លងតាមដរចម្លងមួយនេះដែរ ។
ពលរដ្ឋមួយចំនួនដែលនៅកន្លែងកើតហេតុបានរិះគន់ចំពោះដរចម្លងមួយនេះថា ទូកដរចម្លងនេះ បានចម្លងរថយន្តដឹកឈើទាំងតូចទាំងធំ អោយតែគេហៅចម្លងយប់ថ្មើណាក៍បាន តែបើប្រជាពលរដ្ឋធម្មតាវីញតឹងតែងណាស់ ពួកគាត់បន្តរថា បើពលរដ្ឋធម្មតានៅពេលមានការចាំបាច់ម្តងម្កាល ដូចជាបញ្ចូនអ្នកជម្ងឺ ឬស្ត្រីមានផ្ទៃពោះសម្រាលកូននៅមន្ទីពេទ្យជាដើម នោះគឺមិនងាយទេ ទម្រាំបានចម្ងងអោយទល់តែមានការជួយអន្តរគមន៍ពីអាជ្ញាធរមូលដ្ឋានជួយទាក់ទងអោយ ឬអោយតម្លៃនិយាយត្រូវគ្នាទើបបានឆ្លង ។
ប្រជាពលរដ្ឋសំណូមពរដល់មន្ត្រីអាជ្ញាធរជួយពិនិត្យមើលកំពង់ដរចម្លងមួយនេះផង ពេលពួកគាត់មានជម្ងឺឈឺថ្កាត់ម្តងៗ សូមជួយចម្លងផង កុំឃើញឡានដឹកឈើទោះថ្មើរណាក៏ចម្លងដែរនោះ ៕