ខេត្តក្រចេះ ៖ ស្ត្រីជាម្ចាស់ផ្ទះម្នាក់ត្រូវបានភ្លើងឆេះស្លាប់យ៉ាងអាណោចអាធ័មគួរឲ្យរន្ធត់នៅក្នុងផ្ទះរបស់ខ្លួន ហេតុការណ៍នេះកើតឡើងនៅវេលាម៉ោង១១ថ្ងៃត្រង់ ថ្ងៃទី១៧ មីនា ឆ្នាំ២០១៦ម្សិលមិញស្ថិតនៅតំបន់ជនបទដាច់ស្រយាលខាងក្រោយភូមិបឹងកៀប ឃុំដំរីផុង ស្រុកឆ្លូង ខេត្តក្រចេះ ។
បើយោងតាមប្រភពពីមន្ត្រីនគរបាលមូលដ្ឋានអោយដឹងថា ស្ត្រីរងគ្រោះដែលឆេះស្លាប់ក្នុងភ្នក់ភ្លើងមានឈ្មោះ អ៊ុន ចន្ធីណា អាយុ៤២ឆ្នាំ មានទីលំនៅក្នុងភូមិកើតហេតុខាងលើ ចំណែកផ្ទះដែលត្រូវភ្លើងឆាបឆេះនោះគឺធ្វើពីឈើ ប្រក់សង្ក័សី មានទំហំ ៨ម៉គុណ៦,៥ម៉ ហើយសង់នៅដាច់ឆ្ងាយពីគេ ។
នគរបាលបានបន្តថា សពស្ត្រីរងគ្រោះមានសភាពឆេះរោលដូចដុំធ្យូង ដោយត្រូវរកឃើញនៅក្រោមគំនរភ្លើងក្នុងលំនៅឋាននេះ ក្នុងនោះក៏មានសម្ភារប្រើប្រាស់ រួមមានម៉ូតូ២គ្រឿង ស្រូវ អង្ករ ជាច្រើនបាវ រងការឆេះហ្មត់គ្មានសល់ផងដែរ តែក្នុងរយៈពេលជាង១ម៉ោងប៉ុណ្ណោះ ។
ករណីអគ្គិភ័យនេះត្រូវគេអះអាងថា គឺផ្តើមចេញពីភ្លើងចង្ក្រាន តែយ៉ាងណាក៏ដោយ លោក វរសេនីយ៍ត្រី ឆុង តូរ៉ាន់ អធិការរងទទួលយុត្តិធម៏ស្រុកឆ្លូង បានបញ្ជាក់ឲ្យដឹងថា ពេលនេះកម្លាំងនគរបាលជំនាញកំពុងតែធ្វើការស្រាវជ្រាវ សើុបអង្កេតយ៉ាងល្អិតល្អន់ដើម្បីរកមូលហេតុឱ្យបានដឹងពិតប្រាកដ ៕ ដោយ កិះ ខន