ក្រចេះ ៖ កាលពីថ្ងៃទី០៤ ខែមិនា ឆ្នាំ២០១៦នេះ អគារសិក្សា ១ខ្នង មាន១២បន្ទុប តម្លៃជាង ២១ម៉ឺនដុល្លាសហរដ្ឋអាមេរិកត្រូវបានដាក់សម្ពោធឲ្យប្រើប្រាស់ជាផ្លូវការក្រោមអធិបតីភាពឯកឧត្តម សរ ចំរុង អភិបាលនៃគណៈអភិបាលខេត្ត អមដំណើរដោយឯកឧត្តម រដ្ឋលេខាធិការក្រសួងអប់រំយុវជន និងកីឡា នៅវិទ្យាល័យថ្មគ្រែ ឃុំថ្មគ្រែ ស្រុកចិត្របុរី ខេត្តក្រចេះ ។
ដោយមានការអញ្ចើញចូលរួមពីសំណាក់ឯកឧត្តម លោកជំទាវ លោក លោកស្រី អភិបាល អភិបាលរងស្រុក ប្រធាន អនុប្រធានមន្ទីរ អង្គភាពជុំវិញខេត្ត មន្ត្រីរាជការ កងកម្លាំងប្រដាប់អាវុធទាំងបីប្រភេទ យុវជនកាយរឹទ្ធ យុវជនកាកបាតក្រហម យុវជនស.ស.យ.ក យុវជនសម្ព័ន្ធសេនានាគ យុវជនក ១៥៧ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋចូលរួមប្រមាណជាង១៥រយនាក់។
ព្រះគ្រូសូត្រស្ដាំ ព្រះនាម ប៉ាវ ពិសិដ្ឋ មានសង្ឃដីកាឲ្យដឹងថា អគារសិក្សា ដែលបានដាក់សម្ពោធឲ្យប្រើប្រាស់ជាផ្លូវការនាពេលនោះគឺត្រូវចំណាយថវិការសរុបអស់ចំនួន ២១០.៦៧៩ដុល្លាអាមេរិក ដោយក្នុងនោះមានការជួយឧបត្ថម្ភគាំទ្រថវិការពីមូលនិធិទានចិត្តសង្ហបុរី ចំនួន ១២៥.០០០ដុល្លាអាមេរិក រួមជាមួយសប្បុរសជនជិតឆ្ងាយចំនួន ៧១.៣៥០ដុល្លាអាមេរិក។
ព្រះគ្រូ ប៉ាវ ពិសិដ្ឋ បានមានសង្ឃដីការបន្តថា កន្លងមក ក្រៅពីអគារសិក្សានេះ មូលនិធិទានចិត្តសង្ហបុរី និងសប្បុរសជនជិតឆ្ងាយ បានជួយកសាងសមិទ្ធផលនៅក្នុងវត្តថ្មគ្រែ អស់ជាច្រើនម៉ឺនដុល្លាថែមទៀតផង ដែលនេះ គឺជាកាយវិការមនុស្សធម៌ដ៏ថ្លៃថ្លារក្នុងការលើកស្ទួយវិស័យអប់រំ និងវិស័យព្រះពុទ្ធសាសនា នៅក្នុងខេត្តក្រចេះ ឲ្យកាន់តែមានភាពរីកចំរើន។
មានប្រសសាសន៍សំណេះសំណាលទៅកាន់បងប្អូនប្រជាពលរដ្ឋ និងសិស្សានុសិស្សនាពេលនោះ ឯកឧត្តម សរ ចំរុង អភិបាលខេត្តក្រចេះ សូមរូលរួមអបអរសាទរចំពោះការរៀបចំពិធីសម្ពោធសមិទ្ធផលដ៏ប្រសើថ្លៃថ្លារនេះ ដើម្បីបំរើដល់តម្រូវការរបស់ក្មួយៗសិស្សានុសិស្សនៅទីនោះក៏ដូចជានៅទីក្បែរៗនោះ ព្រមទាំងបានចូលរួមចំណែកលើកកម្ពស់វិស័យអប់រំក្នុងខេត្តក្រចេះ ឲ្យមានការរីចចំរើន ស្របតាមកម្មវិធីនយោយ និងយុទ្ធសាស្ត្រចតុកោណរបស់រាជរដ្ឋាភិបាល ដែលមានសម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី។
ឯកឧត្តម មានប្រសសាសន៍បន្តថា ក្រោមការដឹកនាំដ៏ឈ្លាសវៃ និងគតិបណ្ឌិតខ្ពស់ប្រកបដោយភាពប្រកដនិយម របស់សម្ដេច បានកសាង និងអភិវឌ្ឍន៍ប្រទេសជាតិ ចាប់ពីលេខសូន្យរហូតមានការវិវត្ត ផ្លាស់ប្ដូរ រីកចំរើនយ៉ាងធំធេងហួសពីការស្មាន។ ដោយឡែកខេត្តក្រចេះ លើការងារការពារ ថែរក្សាសន្តិសុខ សណ្ដាប់ធ្នាប់មានភាពល្អប្រសើរ អាជ្ញាធរមូលដ្ឋានគ្រប់ថ្នាក់ និងប្រជាពលរដ្ឋ បានសហការធ្វើប្រតិបត្តិការបង្ការ ទប់ស្កាត់ បង្ក្រាប បទល្មើសគ្រប់ប្រភេទបានទាន់ពេលវេលា ជាពិសេសក្នុងការអនុវត្តគោលនយោបាយភូមិឃុំមានសុខសុវត្ថិភាព។
ឯកឧត្តម សរ ចំរុង អភិបាលខេត្តក្រចេះ បានបញ្ជាក់ថា ចំពោះវិស័យអប់រំនៅក្នុងខេត្តក្រចេះ បច្ចុប្បន្ន មានវិទ្យាល័យចំនួន ១០កន្លែង អនុវិទ្យាល័យ ៤១កន្លែង សាលាបឋមសិក្សាចំនួន ២៥៧កន្លែង និងសាលាមតេ្តយ្យ ៦៥កន្លែង និងមានអគារសរុបចំនួន ៤៦៥ខ្នង ស្មើនឹង១៨៣៣បន្ទុប់ ដែលកំពុងសេវាឲ្យកូនចៅប្រជាពលរដ្ឋបានចូលរៀនសូត្របានកាន់តែមានភាពងាយស្រួល។ ដោយឡែកក្នុងស្រុកចិត្របុរី មានវិទ្យាល័យ ២កន្លែង អនុវិទ្យាល័យ ១០កន្លែង សាលាបឋមសិក្សាមាន ៥៨កន្លែង និងមត្តេយ្យសិក្សាមាន ១៥កន្លែង ហើយពេលនោះ នៅក្នុងវិទ្យាល័យថ្មគ្រែ បានទទួលអគារសិក្សាថ្មី ១ខ្នង ២ជាន់ មាន១២បន្ទុប់បន្ថែមទៀតពីមូលនិធិទានចិត្តសង្ហបុរី និងសប្បុរសជន ដោយចំណាយអស់ថវិការសរុបចំនួន ២១០.៦៧៩ដុល្លាអាមេរិក៕ដោយ កិះ ខន
