តាកែវ ៖ វត្តពុទ្ធគិរីកម្ពុជា គឺជាទីអារាមថ្មីមួយ ថិតនៅលើភ្នំមានព្រះពុទ្ធបដិមា១អង្គធំគង់នៅលើកំពូលភ្នំបែរទៅទិសខាងកើត និងអមដោយព្រះពុទ្ធបដិមាករតូច ចំនួន៨៤០០០អង្គ តម្រូវតាមព្រះត្រ័យបិដក ៨៤០០០ព្រះធម្មខ័ណ្ឌ នេះបើតាមការអះអាងពី លោកតា អាចារ្យ និងគណៈកម្មាការវត្តអោយដឹង ។ វត្តពុទ្ធគិរីកម្ពុជា ស្ថិតក្នុងភូមិត្រពាំងស្គារ ឃំត្រពាំងក្រញូង ស្រុកត្រាំកក់ ខេត្តតាកែវ មានចម្ងាយប្រមាណជាង ១០០គីឡូម៉ែត្រពីរាជធានីភ្នំពេញ ធ្វើដំណើរតាមផ្លូវជាតិលេខ២ឬលេខ៣ កាត់តាមផ្សារអង្គតាសោម រួចបត់ចូលតាមផ្លូវដីគ្រួសក្រហម មានចម្ងាយ៣៨គីឡូម៉ែត្រ ។
បើតាមលោកអាចារ្យនៅទីនោះ បានអោយដឹងថា ទាំងអាជ្ញាធរខេត្ត និងមន្ទីរទេសចរណ៍ មន្ទីរធម្មការ កិច្ចការសាសនខេត្តតាកែវ ព្រមទាំងគណៈកម្មការកសាងមានគំរោងកសាងជណ្តើរឡើងលើកំពូលភ្នំគិរីនេះទាំង៤ទិសជុំវិញតួភ្នំតែម្តងគឺ មានទិសត្បូង ជើង លិច និង ខាងកើត ហើយអមដោយដាក់តម្រៀមព្រះពុទ្ធរូបអង្គតូចៗអង្គុយលើបល្ល័ង្គ និងអង្គរាងធំកណ្តាលឈរអមជណ្តើរ ។
ប៉ុន្តែបច្ចុប្បន្នទើបតែកសាងបានជណ្តើរឡើងនៅទិសខាងកើតតែ១ទេ ដែលមាន កាំជណ្តើរចំនួន១៩៩កាំ អមដោយព្រះពុទ្ធរូបអង្គតូចដាក់ តម្រៀបគ្នាជាជួរៗតាំងពីក្រោមដល់លើ ។ សូមញ្ជាក់ថា ព្រះពុទ្ធរូបអង្គតូចៗទាំងនោះគឺ ជាការចូលរួមចំណែកក្នុងផ្លូវព្រះពុទ្ធសាសនារបស់ពុទ្ធបរិស័ទ្ធកម្ពុជា ដែលស្មគ្រចិត្ត ជាវ(ទិញ) ព្រះពុទ្ធរូបក្នុង១អង្គតូចៗតម្លៃ20$ (ម្ភៃដុល្លារ) បើព្រះពុទ្ធរូបអង្គធំឈរតម្លៃ80$(ប៉ែតសិបដុល្លារ) ខាងគណៈកម្មការវត្តនឹងចុះឈ្មោះក្នុងបញ្ជី និងឆ្លាក់ឈ្មោះពុទ្ធ បរិស័ទ្ធនៅខាងក្រោមព្រះភ្នែនព្រះពុទ្ធរូប(បល្ល័ង្គ) នីមួយៗដែលបានជាវ ទុកជាកេរតំណែលតទៅមុខទៀត ។
បើតាម ចម្លាក់ឈ្មោះអ្នកផ្តួចផ្តើមកសាងទីអារាមពុទ្ធគិរីកម្ពុជាធំជាងគេ គឺ ឯកឧត្តម ហុកឡង់ឌី (ស្លាប់) និងលោកជំទាវ ព្រមទាំងឯ.ឧ អស់លោក លោកជំទាវផ្សេងៗទៀតជាច្រើននាក់ ។ ប៉ុន្តែទើបតែឃើញមានការចាប់អារម្មណ៍ខ្លាំងពីប្រជាពលរដ្ឋ ពុទ្ធបរុស័ទ្ធ ក្នុងរយៈពេលប៉ុន្មានថ្ងៃនេះ គាប់ជួននឹងថ្ងៃព្រះរាជពិធី បុណ្យចំរើនព្រះជន្មាយុព្រះមហាក្សត្រ ដែលជាថ្ងៃឈប់សំរាក ពីការងារ មានេយៈពេល៣ថ្ងៃទាំងមន្ត្រីរាជការ និងកម្មករ ទើប ពួកគាត់មានឱកាសដឹកនាំក្រុមគ្រួសារទៅធ្វើបុណ្យទានផង និងទេសចរណ៍កំសាន្តព្រៃភ្នំធម្មជាតិ នុងយកខ្យល់អាកាសបរិសុទ្ធនៅទីនោះផងដែរ ។ ប៉ុន្តពួកគាត់សំពូមពរដល់អាជ្ញាធរ ខេត្តនិងមន្ទីរពាក់ព័ន្ធជួយធ្វើផ្លូវចូលទៅកាន់ទីនោះដែលមាន ចម្ងាយ៣៨គីឡូម៉ត្រ ចាក់កៅស៊ូ ឬបេតុងទៅ ព្រោះផ្លូវដីគ្រលុក និងហុយខ្លាំងណាស់ ។
តែបើអ្នកបានទៅលេងទីនោះហើយកុំភ្លេចទៅសំរាកកំសាន្ត សប្បាយនៅរមណីយដ្ឋាន ទំនប់បឹងម្លេច ថិតក្នុងស្រុកឈូក ខេត្តកំពត ព្រោះមានបរិស្ថាន និងកញ្ចុះស្បូវ ទឹកបឹងហែល លេង ម្ហូបអាហារក៏មានតម្លៃសមរម្យផងដែរ ៕
