ក្រចេះ៖ នៅរសៀលថ្ងៃទី១១ ខែឧសភា ឆ្នាំ២០១៨ អភិបាលខេត្តក្រចេះ បានរៀបចំពិធីថ្វាយព្រះពរ ជ័យសិរីមង្គល ក្នុងឱកាសព្រះរាជពិធីបុណ្យចម្រើនព្រះជន្មគម្រប់ ៦៥ព្រះវស្សា យាងចូល ៦៦ព្រះវស្សា អង្គព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីសក្តារៈដ៏ខ្ពង់ខ្ពស់ នៅសាលមហោស្រពខេត្តក្រចេះ។
ប្រព្រិត្តទៅក្រោមអធិបតីភាពដ៏ខ្ពង់ខ្ពស់របស់ឯកឧត្តម នូ ភឿង ប្រធានក្រុមប្រឹក្សាខេត្ត ឯកឧត្តម វ៉ា ថន អភិបាលនៃគណៈអភិបាលខេត្ត ដោយមានវត្តមានចូលរួមរបស់ឯកឧត្តម លោកជំទាវ លោក លោកស្រី ប្រធាន អនុប្រធានមន្ទីរ និងមន្ត្រីរាជការក្រោមឱវាទទូទាំងខេត្តក្រចេះ និងមានការនិមន្តព្រះសង្ឃចំនួន៩អង្គ និងតាជី យាយជី ដើម្បីប្រារព្ធពិធីតាមបែបព្រះពុទ្ធសាសនា។
ក្នុងពិធីនោះដែរ ឯកឧត្តម វ៉ា ថន បានអានលិខិតថ្វាយព្រះពរ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងបានបញ្ជាក់ ថ្ងៃទី១៣-១៤-១៥ ខែឧសភា ជារៀងរាល់ឆ្នាំ ត្រូវបានចាត់ទុកជាទិវាដ៏វិសេសមួយ ដែលរាជរដ្ឋាភិបាល នៃព្រះរាជាណាចក្រកម្ពុជា កំណត់ក្នុងប្រតិទិន ជាទិវាចម្រើនព្រះជន្ម ថ្វាយព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដែលតម្រូវឲ្យគ្រប់ស្ថាប័នទាំងអស់ ដោតទង់ជាតិ ទង់ជ្វាលា ព្រមទាំង អនុញ្ញាត្តឲ្យឈប់សម្រាក ចំនួន ០៣ថ្ងៃ ដើម្បីចូលរួមអបអរសាទរព្រះរាជពិធីនេះផងដែរ។