ខេត្តព្រះសីហនុ ៖ នៅថ្ងៃព្រហស្បតិ៍ ១១រោចខែពិសាខ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១០ ខែឧសភា ឆ្នាំ២០១៨ វេលាម៉ោង ០៦និង៤០នាទី លើផ្លូវជាតិលេខ៤ ចន្លោះគីឡូម៉ែត្រ ២០៥-២០៦ ស្ថិតនៅក្នុងភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ មានករណីគ្រោះថ្នាក់ចរាចរណ៍មួយកើតឡើងបង្កដោយរថយន្តដឹកសំរាមបើកបុកម៉ូតូពីក្រោយ។
រថយន្តដឹកសំរាម ០១គ្រឿងម៉ាក HYUNDAI ពណ៌ ខៀវ គ្មានផ្លាកលេខ ជាកម្មសិទ្ធិរបស់ក្រុមហ៊ុន WASTE អ្នកបើកបរមិនស្គាល់អត្តសញ្ញាណ មានទិសដៅពីភ្នំពេញ ឆ្ពោះមកខេត្តព្រះសីហនុ លុះដល់ចំណុចខាងលើបានបុកពីខាងក្រោយម៉ូតូ០១គ្រឿងម៉ាក HONDA C125 ពណ៌ ខ្មៅ ពាក់ស្លាកលេខព្រះសីហនុ1F-7232 បើកបរដោយឈ្មោះ ណេន វិជ្ជា ភេទប្រុស អាយុ២១ឆ្នាំ មុខរបរកម្មករ មានទីលំនៅភូមិទួលទទឹង១ ឃុំទួលទទឹង ស្រុកព្រៃនប់ ខេត្តព្រះសីហនុ មានអ្នករួមដំណើរចំនួន០២នាក់៖ ទី១-ឈ្មោះ ម៉ី វិចិត្រ ភេទប្រុស អាយុ២១ឆ្នាំ មុខរបរកម្មករ មានទីលំនៅភូមិបត់គគីរ ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។ ២-ឈ្មោះ ម៉ៅ ទិត្យ ភេទប្រុស អាយុ៣១ឆ្នាំ មុខរបរកម្មករ មានទីលំនៅភូមិបត់គគីរ ឃុំអូរឧកញ្ញ៉ាហេង ស្រុកព្រៃនប់ ខេត្តព្រះសីហនុ មានទិសដៅស្របគ្នា។
គ្រោះថ្នាក់នេះបណ្ដាលឲ្យ៖១-ឈ្មោះ ណេន វិជ្ជា ស្លាប់នៅនឹងកន្លែងកើតហេតុបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។ ២-ឈ្មោះ ម៉ី វិចិត្រ រងរបួសធ្ងន់ បានបញ្ជូនទៅព្យាបាលនៅគ្លីនិកមិត្តភាព ។ ៣-ឈ្មោះ ម៉ៅ ទិត្យ រងរបួសស្រាល ទៅព្យាបាលនៅមន្ទីរពេទ្យភូមិ ។ រីឯវត្ថុតាងរថយន្ត និង ម៉ូតូ បានយកមករក្សាទុកនៅអធិការដ្ឋាននគរបាលស្រុកព្រៃនប់ ៕
