ម៉ាឡេស៊ី ៖ ទីបំផុតគណបក្សដែលមានប្រវត្តិកាន់អំណាចដឹកនាំរដ្ឋាភិបាល៦០ឆ្នាំនៅប្រទេសម៉ាឡេស៊ីបានចាញ់ក្នុងការបោះឆ្នោតសកលកាលពីថ្ងៃទី៩ឧសភាឆ្នាំ២០១៨។
ប្រជាជនម៉ាឡេស៊ីភាគច្រើនបានធ្វើសេចក្ដីសម្រេច ជាប្រវត្តិសាស្ត្រជា ដោយជ្រើសរើសបក្សនយោបាយថ្មី អោយដឹកនាំរដ្ឋាភិបាលជំនួសគណបក្ស BN ឬអង្គការUMNO ក្រោមការដឹកនាំរបស់នាយករដ្ឋមន្ត្រី ណាជិព រ៉ាហ្សាក់ ដែលមានរឿងអាស្រូវហិរញ្ញវត្ថុជិត ៧០០ លានដុល្លារផ្អើលពិភពលោក។
នៅថ្ងៃទី១០ឧសភានេះគណៈកម្មាការរៀបចំការបោះឆ្នោតបានឲ្យដឹងពី លទ្ធផលជាបណ្ដោះអាសន្ន ថា បក្សប្រឆាំងរួបរួម KPR ដឹកនាំដោយ មហាធា មហាម៉ាតអាយុ៩២ឆ្នាំ អតីតនាយករដ្ឋមន្ត្រី ដណ្ដើមអាសនៈបាន ១១៥ អាសនៈ។ ឯបក្សកាន់អំណាច BNរបស់លោកណាជិពរ៉ាហ្សាក់ ទទួលបាន ៧៩ អាសនៈ។ តាមលទ្ធផលនេះ បក្សប្រឆាំងរបស់អតីតអ្នកទោស នយោបាយ អាន់វ៉ា អ៊ីប្រាហ៊ិម ដែលកំពុងឃុំខ្លួន មានសិទ្ធិបង្កើតរដ្ឋាភិបាល ដោយឯកតោភាគី ។
ប្រទេសម៉ាឡេស៊ី មានអាសនៈសភាសរុប ២២២ ហើយបើបក្សណាដណ្ដើមបាន ១១២អាសនៈឡើងទៅ គឺបក្សនោះ មានសិទ្ធិអំណាចបង្កើតរដ្ឋាភិបាល។នៅក្នុងការបោះឆ្នោតសភានីតិកាលទី១៤ កាលពីថ្ងៃទី ៩ ឧសភា ប្រជាជនជិត ១៥ លាននាក់មានឈ្មោះបោះឆ្នោត ។ តាមគណៈកម្មាការរៀបចំការបោះឆ្នោត ប្រជាជនចេញទៅបោះឆ្នោតប្រហែល ៨០ភាគរយ។ នៅក្នុងការបោះឆ្នោតសភាឆ្នាំ ២០១៣ បក្សកាន់អំណាចរបស់លោក ណាជិព បានឈ្នះ ១៣៣ អាសនៈ តែអាណត្តិទី ១២ បក្សនេះទទួលបាន ១៤០អាសនៈ ។
គេរំពឹងថា លោក អាន់វ៉ា ដែលកំពុងស្ថិតក្នុងពន្ធនាគារ នឹងក្លាយជានាយករដ្ឋមន្ត្រីទី ៨ ដឹកនាំរដ្ឋាភិបាលចំរុះនៅក្នុងរាជាណាចក្រឥស្លាមមួយនេះ។ សម្រាប់អន្តរកាលលោក មហាធា មហាម៉ាត ដែលជាមេសបក្សប្រឆាំងរួបរួម KPR ជំនួសលោក អាន់វ៉ា នឹងកាន់តំណែងតែនេះ រហូតមានការលើកលែងទោស លោក អាន់វ៉ា ជាផ្លូវការពីព្រះមហាក្សត្រម៉ាឡេស៊ី។ លោក អាន់វ៉ា នឹងចេញពីពន្ធនាគារនៅដើមខែ មិថុនា ឆ្នាំ២០១៨នេះ។បើតាមរដ្ឋធម្មនុញ្ញម៉ាឡេស៊ី បក្សណាដែលអាចដណ្ដើមបានអាសនៈចាប់ពី ១១២ឡើង ត្រូវបានប្រកាសថា ជាអ្នកឈ្នះឆ្នោតហើយមានសិទ្ធិរៀបចំរដ្ឋាភិបាលដោយខ្លួនឯងបាន។
លោកនាយករដ្ឋមន្ដ្រី ណាជីព រ៉ាហ្សាក់ដែលបានប្រើគ្រប់វិធីទាំងតុលការទាំងធ្វើច្បាប់រាំងខ្ទប់និងចាយលុយទិញទឹកចិត្តផង បានទទួលស្គាល់ការបរាជ័យដោយនិយាយ ថា លោកគោរពសាលក្រមរបស់ប្រជាជន តែលោកថា ជនរួមជាតិត្រូវរង់ចាំសេចក្ដីសម្រេចរបស់ព្រះមហាក្សត្រ ថាតើអ្នកនយោ បាយណាត្រូវស្ដេចតែងតាំងជានាយករដ្ឋមន្ត្រីថ្មីជំនួសលោក។ទាំងរូបលោក និងគណបក្ស BN សម្រេចទទួលស្គាល់បរាជ័យរបស់ខ្លួន ដោយចាត់ទុកនេះជាឆន្ទៈរបស់ប្រជាជនក្នុងការធ្វើសេចក្ដីសម្រេចជាប្រវត្តិសាស្ត្រ។ តែបែបនេះក្ដីលោកថា បក្សប្រឆាំងដឹកនាំដោយអតីតនាយករដ្ឋមន្ត្រីមហាធាមហាម៉ាត មិនមានសំឡេងរឹងមាំក្នុងការបង្កើតរដ្ឋាភិបាលដោយឯកតោភាគីនោះទេ។
សូមបញ្ជាក់ថា៖ការបោះឆ្នោតនេះ ស្ថិតក្រោមអ្នកសង្កេតការណ៍បរទេសចំនួន ៩ប្រទេស តែគ្មានសហភាពអឺរ៉ុប សហរដ្ឋអាមេរិក ចូលរួមនោះទេ។
គណៈកម្មាការរៀបចំការបោះឆ្នោត ម៉ាឡេស៊ីបានឲ្យដឹងថា ប្រទេសដែលបញ្ជូនអ្នកសង្កេតការណ៍ មានប្រទេស Indonesia, Thailand, Cambodia, India, Pakistan, Maldives, Azerbaijan, Kyrgyzstan និង Uzbekistan រួមនឹងអង្គការអន្តរជាតិចំនួន ២៥ ៕
ប្រភពៈ CNN, CNA , និង The Guardian