ខេត្តកំពង់ស្ពឺ ៖ បុរសម្នាក់បានស្លាប់ភា្លមៗ និងម្នាក់ទៀតរងរបួសធ្ងន់ក្នុងគ្រោះថ្នាក់ចរាចរណ៍ដ៏រន្ធត់មួយរវាងគោយន្តដឹកឈើបើកលឿនចាប់ហ្វ្រាំងមិនជាប់ជ្រុកបុក និងកិនម៉ូតូ។ ហេតុការណ៍នេះកើតឡើង នៅលើកំណាត់ផ្លូវជាតិលេខ៤៤ ត្រង់ចន្លោះគីឡូម៉ែត្រលេខ ៧៥.៧៦ ស្ថតិនៅភូមិផ្លោច ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ នៅវេលាម៉ោង១២ និង៣០នាទីថ្ងៃទី០៩ខែឧសភា ឆ្នាំ២០១៨។
តាមប្រភពនៅកន្លែងកើតហេតុបានឲ្យដឹងថា មុនពេលកើតហេតុគេឃើញគោយន្តកន្ត្រៃដឹកឈើមួយគ្រឿងដែរធ្វើដំណើរពីលិចទៅកើត លុះដល់ចំណុចកើតហេតុខាងលើបានរេចង្កូត (ជាប់កញ្ចាប់) រួចទៅបុកម៉ូតូម៉ាកហុងដាសេ១២៥ពណ៌ខ្មៅ ស៊េរីឆ្នាំ២០១៤ ពាក់ស្លាកលេខភ្នំពេញ1CH:0345 ទទួលរងការខូចខាតស្ទើរតែទាំងស្រុង ខណៈកំពុងធ្វើដំណើរឌុបគ្នាពីកើតមកលិចយ៉ាងពេញទំហឹង។
ប្រភពបន្តថា ម្ចាស់គោយន្តសមត្ថកិច្ចមិនទាន់កំណត់អត្តសញ្ញាណម្ចាស់បាននៅឡើយទេ។ ចំណែកអ្នកបើកបរឈ្មោះ ណាត លាងហេង ភេទប្រុស អាយុ១៧ឆ្នាំ (ត្រូវបានគោយន្តបង្កកិនស្លាប់ភ្លាមៗនៅកន្លែងកើតហេតុ) និងអ្នករួមដំណើរម្នាក់ទៀតរងរបួសធ្ងន់ឈ្មោះ ពក ដេត ភេទប្រុស អាយុ២៨ឆ្នាំ ទាំង២នាក់ខាងលើនេះមានទីលំនៅ ភូមិត្រពាំងក្រើញ ឃុំប្រាំបីមុំ ស្រុកថ្ពង ខេត្តកំពង់ស្ពឺ៕
