ស្វាយរៀង ៖ ហ្វេសប៊ុករបស់ឈ្មោះ Polyva Toch បានបង្ហោះរូបភាពជាច្រើនសន្លឹកដែលបង្ហាញពីដំណើរការរោងចក្រតំឡើងរថយន្តកូរ៉េ នៅបាវិត ដោយអាខោនបានបញ្ជាក់ថា៖ “នារី២នាក់គាត់ជាអ្នករស់នៅឃុំត្រពាំងស្តៅស្រុករមាសហែក ធ្លាប់តែធ្វើស្រែចំការ ឥឡូវគាត់មានសំណាងអាចធ្វើការនៅរោងចក្រតំឡើងរថយន្តកូរ៉េ នៅបាវិត!។
តាមរយៈគណនីដដែលបង្ហើបឲ្យដឹងថាជារោងចក្រដំឡើងរថយន្តរបស់ក្រុមហ៊ុនកូរ៉េដែលមានឈ្មោះថា DAEHAN AUTO (CAMBODIA) CO.,LTD ហើយរថយន្តដែលដំឡើងនេះគឺសម្រាប់លក់នៅក្នុងប្រទេសកម្ពុជាផ្ទាល់។
កាលពីចុងឆ្នាំ ២០១៧ សារព័ត៌មានក្នុងស្រុកបានចុះផ្សាយថាក្រុមហ៊ុនដេហានអូតូ( DAEHAN AUTO )នឹងចាប់ផ្ដើមដំណើរការការដំឡើងរថយន្តនៅអំឡុងដើមឆ្នាំ ២០១៨ នេះ ដោយមានគោលដៅថានឹងដំឡើងរថយន្តឲ្យបាន ២ ម៉ឺនគ្រឿងក្នុងមួយឆ្នាំ ហើយនឹងផ្ដល់ការងាររហូតដល់ ១ ម៉ឺនកន្លែង។
ក្រុមហ៊ុន DAEHAN AUTO (CAMBODIA) CO.,LTD ដែលមានទីតាំងស្ថិតក្នុងតំបន់សេដ្ឋកិច្ចពិសេស អ៊ិនធើវៀ អូតូម៉ូបាល អ៊ិនដាសស្ទ្រី ខមផ្លេកស៍ ស្ថិតនៅភូមិព្រៃផ្តៅ សង្កាត់ច្រកម្ទេស ខេត្តស្វាយរៀង។ DAEHAN AUTO (CAMBODIA) CO.,LTD គឺជាក្រុមហ៊ុនធំទី២ ដែលទទួលបានការអនុញ្ញាត ពីរាជរដ្ឋាភិបាលកម្ពុជា ឲ្យវិនិយោគបង្កើតរោងចក្រដំឡើងរថយន្ត៕
