ភ្នំពេញ៖ លោក កៃ គឹមសុង និពន្ធនាយកកាសែត ភ្នំពេញប៉ុស្តិ៍ ផ្នែកភាសាខ្មែរ ត្រូវបានថៅកែថ្មីជាតិម៉ាឡេស៊ី ដេញចេញពីការងារនៅថ្ងៃនេះ ក្រោមលេសថា មានកំហុសក្នុងការចេញផ្សាយអំពីការដូរម្ចាស់ថ្មី។លោក កៃ គឹមសុង បានទទយលស្គាល់ថា លោកពិតជាត្រូវបានបញ្ឃប់ពីការងារមែន ដោយលោក ថា ការបណ្តេញចេញនេះបានធ្វើឲ្យអ្នករួមការងារនៅក្នុងស្ថាប័ននេះ មានប្រតិកម្មយ៉ាងខ្លាំង។
លោក កៃ គឹមសុង ដែលជាស្ថាបនិកកាសែតភ្នំពេញប៉ុស្តិបានបំពេញការងារបាន១១ឆ្នាំរួចមកហើយបន្ទាប់ពីថៅកែថ្មីជាតិអូស្ត្រាលីទិញបន្តពីថៅកែជាតិអាមេរិកាំង កាលពីឆ្នាំ២០០៧ បានឲ្យដឹងថា ការបណ្ដេញលោកចេញតំណែងជានិពន្ធនាយកនេះ ដោយសារម្ចាស់ថ្មីចោទប្រកាន់លោកនូវកំហុសមួយ បន្ទាប់ពីបានអនុញ្ញាតឲ្យកាសែតនេះចេញផ្សាយអត្ថបទ ស្តីពីការដូរម្ចាស់ថ្មីនៅលើទំព័រមុខនៃកាសែតភ្នំពេញប៉ុស្តិ៍នេះ។
លោកប៊ីលក្លូហ( Bill Clough) ដែលជាម្ចាស់ក្រុមហ៊ុនប៉ុស្តិមេឌៀ( Post Media Ltd) និងជាចាងហ្វាងការផ្សាយរបស់កាសែត Phnom Penh Post បានប្រកាស កាលពីថ្ងៃទី០៥ ខែឧសភា ឆ្នាំ២០១៨ថាលោកបានលក់កាសែតនេះទៅឲ្យថៅកែជាតិម៉ាឡេស៊ី ប៉ុន្តែមិនបានទម្លាយឲ្យដឹងនូវទំហំទឹកប្រាក់ឡើយ។គេមិនដឹងថាតើហេតុអ្វីបានជាថៅកែចាស់អាចលក់ពេលកំពុងមានការប្តឹងផ្តល់គ្នាជាមួយបុគ្គលឹកចាស់មិនទាន់ចប់នោះឡើយ?។
លោក Bill Clough បានបញ្ជាក់ថា ថៅកែថ្មីឈ្មោះSivakumar G. ( Siva ) ដែលបានទិញយកកាសែត Phnom Penh Post គឺជាអ្នកសារព័ត៌មានដ៏ល្បីល្បាញ និងដ៏មានបទពិសោធន៍ ហើយក៏ជាតំណាងឲ្យក្រុមហ៊ុនវិនិយោគទុនដ៏ធំរបស់ម៉ាឡេស៊ី។
លោក Bill Clough បានបញ្ជាក់ក្នុងសេចក្តីថ្លែងការណ៍ថា កាលពីសប្តាហ៍មុន ក្រុមហ៊ុនកាសែតភ្នំពេញប៉ុស្តិ៍ បានដោះស្រាយរួចរាល់នូវបញ្ហាពាក់ព័ន្ធនឹងរឿងពន្ធដារ ដែលត្រូវបានបង្ហាញជាសាធារណៈកន្លងមក ជាមួយអគ្គនាយកដ្ឋានពន្ធដារ។
ចំណែកករណីនៅតុលាការ ដែលអតីតបុគ្គលឹកជាន់ខ្ពស់ជនជាតិបរទេស បានប្តឹងទាំរសំណងការងារជាង២០ម៉ឺនដុល្លារនោះ កំពុងបន្តដោះស្រាយ នៅតុលាការ ។ក្រុមហ៊ុនមុន បានបញ្ជាក់ថា ការអនុវត្តដីការឹបអូសទ្រព្យសម្បត្តិរបស់កាសែតភ្នំពេញប៉ុស្តិ៍ ត្រូវបានផ្អាករង់ចាំតុលាការកំពូល ជម្រះបណ្តឹងឧទ្ធរណ៍។គិតដល់ខែឧសភា ឆ្នាំ២០១៨នេះ អស់រយៈពេល ២៦ ឆ្នាំហើយ សម្រាប់កាសែតភ្នំពេញប៉ុស្តិ៍ ចាប់តាំងពីបង្កើតដំបូងដោយលោកម៉ៃខឹលហេល( Michael Hayes) នៅឆ្នាំ១៩៩២។
នៅឆ្នាំ២០០៨ ក្រុមហ៊ុន Post Media បានទិញកាសែតភ្នំពេញ ពីលោកម៉ៃខឹលហេល( Michael Hayes) ហើយចេញផ្សាយប្រចាំថ្ងៃនូវកាសែតភ្នំពេញប៉ុស្តិ៍ ជាភាសាអង់គ្លេស និងនៅឆ្នាំ២០០៩ កាសែតភ្នំពេញប៉ុស្តិ៍ បានចេញផ្សាយជាភាសាខ្មែរ។
ជាប្រតិកម្មនឹងការបណ្ដេញលោក កៃ គឹមសុង ពីតួនាទីនិពន្ធនាយក កាសែតភ្នំពេញប៉ុស្តិ៍ បុគ្គលិកបរទេសមួយចំនួនបានលាឈប់ពីការងារ ចំណែកបុគ្គលិកខ្មែរវិញបាននាំគ្នាធ្វើកូដកម្មប្រឆាំងនឹងការសម្រេចចិត្តរបស់ថៅកែថ្មី។គេមិនដឹងថាតើកិច្ចសន្យាកាសែតភ្នំពេញប៉ុស្តិជាមួយលោកកៃគឹមសុងមានអ្វីខ្លះនោះទេ។តែការបណ្តាញចេញចឹងដាច់ខាតត្រូវតែមានសំណង!៕