រាជធានីភ្នំពេញ ៖ សម្តេច ហ៊ុន សែន បានថ្លែងរិះគន់ចំពោះលោក សម រង្ស៊ី ដែលបានអំពាវនាវមិនឲ្យប្រជាពលរដ្ឋទៅបោះឆ្នោតថា សកម្មភាពនោះជាអំពើល្មើសច្បាប់ និងរំលោភលើសិទ្ធិបោះឆ្នោតរបស់ពលរដ្ឋដែលមានសិទ្ធិបោះឆ្នោត។ សម្តេចថ្លែងសាធារណបែបនេះ ខណៈដែលសម្តេចអញ្ជើញបើកការដ្ឋានពង្រីក និងលើកកម្រិតគុណភាពកំណាត់ផ្លូវជាតិលេខ៣នៅព្រឹកថ្ងៃទី០៧ ខែឧសភា ឆ្នាំ២០១៨ នេះ។
សម្តេច ហ៊ុន សែន បានលើកឡើង ផងដែរ នូវអ្វីដែលលោក សម រង្ស៊ី និយាយថា ការបោះឆ្នោតនៅកម្ពុជានឹងពុំមានការគាំទ្រពី សហគម៍អន្តរជាតិ សំខាន់អង្គការសហប្រជាជាតិនឹងព្យួរកៅអីរបស់កម្ពុជានៅអង្គការសហ ប្រជាជាតិថែមទៀត។
សម្តេចឆ្លើយតបថា តើស្អីទៅជាសហគមន៍អន្តរជាតិ, តើការបោះឆ្នោត គ្រប់ប្រទេសទាំងអស់លើសកលលោកនេះ ត្រូវតែមានការគាំទ្រពីអន្តរជាតិមែនឬ? តើអង្គការសហប្រជាជាតិចេះតែដកកៅអីដោយស្រួយៗ ឬ ខណដែលកម្ពុជា កំពុងតែមានសហប្រតិបបត្តិការជាមួយអន្តរជាតិជាច្រើនប្រទេសនោះ ។
សម្តេចថា ពួកគេ ពូកែតែរឿងភូតភរប៉ុណ្ណោះ ទោះបីជាបរាជ័យជាបន្តបន្ទាប់ក៏ដោយ រហូតគេភូតថា នឹងមានការចាប់ខ្លួនសម្តេចថែមទៀត ។ ប៉ុន្តែសម្តេចថា ពុំមានអ្វីកើតឡើងដូច ពួកភូតភររបស់ក្រុមប្រឆាំងនោះឡើយ ។ សម្តេចបញ្ជាក់ជាថ្មីថា ការបោះឆ្នោតនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ដោយពុំមានការកែប្រែនោះឡើយ ខណៈដែលគណបក្សនយោបាយកំពុងចុះឈ្មោះចូលរួមការបោះឆ្នោតជាបន្តបន្ទាប់។
ទន្ទឹមនោះសម្តេច ហ៊ុន សែន ក៏បានដាក់ចេញនូវបទបញ្ជាដល់កងកម្លាំងអាជ្ញាធរមូលដ្ឋានទាំងអស់ត្រូវបង្កលក្ខណៈងាយស្រួលដល់ រាល់សកម្មភាពគណបក្សនយោបាយដែលចុះឈ្មោះក្នុងបញ្ជីបោះឆ្នោត ។
សម្តេចបញ្ជាក់ថា សកម្មភាពរបស់គណបក្សនយោបាយទាំងនោះរួមមានការចុះហត្ថ លេខាលើលិខិតស្នាមផ្សេងៗរបស់គណបក្សនយោបាយ ការប្រមូលប្រជាពលរដ្ឋឲ្យផ្តិតមេដៃ លើការបំពេញបែបបទគណបក្សនយោបាយ, ការលើកស្លាកគណបក្សនយោបាយ រួមទាំង សកម្មភាពឃោសនា អំឡុងពេលឃោសនាបោះឆ្នោតនាពេលខាងមុខជាដើម៕
