ខេត្តកំពង់ឆ្នាំង : ដីព្រៃលិចទឹកនៅក្នុងកន្លែងអភិរក្ស ឡូត៍ លេខ (១០ A)ដែលជាជំរកត្រីរាប់រយប្រភេទពងកូននារដូវទឹកឡើងកំពុងទទួលរងនូវការបំផ្លិចបំផ្លាញទាំងស្រុងពីសំណាក់ជនខិលខូចមានលុយហើយមានអំណាចមួយចំនួនតូចយកគ្រឿងចក្រចូលឈូសឆាយទន្ទ្រានយកនៅលើទឹកដីស្រុកកំពង់លែង ដោយគ្មានញញើតច្បាប់ ។
ប្រជាពលរដ្ឋជាច្រើនរស់នៅក្នុងស្រុកកំពង់លែងមានការិះគន់ចំពោះសមត្ថកិច្ចជំនាញតាំងថ្នាក់ស្រុករហូតដល់ខេត្តដែលពុំមានវិធានការណាមួយក្នុងការទបស្កាត់និងបង្ក្រាបជនខិលខូចដែលហ៊ានយកគ្រឿងចក្រឈូសឆាយទន្ទ្រានយកដីព្រៃលិចទឹករាប់សឹបហិកត្តាជារៀងរាល់ឆ្នាំយកធ្វើជាដីកម្មសិទ្ធ។
ប្រជាពលរដ្ឋ គាត់ខ្លាចញញើតនិងច្បាប់ស្តីពីជលផលពួកគាត់បានត្រឹមតែឈរមើលគេឈូសឆាយនិងសោកស្តាយដីព្រៃទាំងនោះដែលកំពង់បាត់បង់តែប៉ុណ្ណោះ។ប្រភព ព័ត៌មាន ពី សហគមន៍តូចតាចដែល ឈរជើងការពារនៅក្នុងកន្លែងអភិរក្សត្រីមេពូជ និង ប្រជាការពារព្រៃអភិរក្សបានឲ្យ ដឹងថា សព្វថ្ងៃនេះ ទាំងព្រៃលិចទឹកទាំងត្រីមេពូជ កំពង់ទទួលរងនូវការបំផ្លិចបំផ្លាញជារៀងរាល់ថ្ងៃ ព្រោះមានអ្នកប្រព្រឹត្ត ឈ្មោះ លោក អ៊ុក អៀង ជាក្រឡាបញ្ជីអយ្យការអមសាលាដំបូងខេត្តកំពង់ឆ្នាំង និង លោក កឹក ហៃ ប្រធានសហគមន៍នេសាទដែលគ្រប់គ្រងពីរឃុំ គឺ ឃុំ ស្វាយរំពារ និង ឃុំ សំរោងសែន ។
ដីព្រៃលិចទឹកទាំងនោះនៅត្រង់ចំណុច ( ពាម រះធំ )ចំណុច ខាងលិចនិងខាងជើងជាប់មាត់បឹង ( អន្ទិលបាយឡៅ ) ដែលស្ថិតក្នុងឃំុចំនួនពីរ គឺ ឃុំ ស្វាយរំពារ និង ឃុំសំរោងសែនស្រុកកំពង់លែងខេត្តកំពង់ឆ្នាំង ។
ប្រជាពលរដ្ឋនិយាយថា៖លោក កឹក ហៃ ប្រធានសហគមន៍ដែលគ្រប់គ្រងចំនួនពីរឃុំបាន ឃុបឃិតគ្នាបើកដៃឲ្យ លោក អ៊ុក អៀង យកគ្រឿងចក្រចូលឈូសឆាយដីព្រៃលិចទឹកជារៀងរាល់ឆ្នាំដើម្បីចែកប្រយោជន៍គ្នា ។ លោក កឹក ហៃ អាងខ្លួនជាប្រធានសហគមន៍ ហ៊ានបបើកដៃឲ្យ ក្រុមជនល្មើសចូលអូសអួនក្នុងកន្លែងអភិរក្សត្រីមេពូជ ជារៀងរាល់យប់ ផ្គើននិងអនុសាសន៍ របស់ សម្តេចដែលបានដាក់ចេញ (៩ ចំណុច ) កន្លងមក កូនចៅសហគមន៍និងប្រជាការពារព្រៃលិចទឹក ធ្លាប់បានរាយការណ៍ជូនសមត្ថកិច្ចជំនាញក្នុងមូលដ្ឋានដែរតែគ្មានប្រសិទ្ធិភាពនោះឡើយ។
សារព័ត៌មានយើងបានចេញផ្សាយម្តងហើយរឿងបទល្មើសដែលកើតមានទាំងអស់នៅចំណុចខាងលើនេះ តែមន្ត្រីជំនាញថ្នាក់ក្រោមជាតិក្នុងខេត្តកំពង់ឆ្នាំងទាំងចៅហ្វាយខេត្តនិងនាយកមន្ទីរកសិកម្មខេត្តហាក់ដូចជាមិនអើពើចាប់អារម្មណ៍ឡើយមិនដឹងថាពួកគេខ្លាចលោកអ៊ុក អៀង និង លោក កឹក ហៃឬចែកប្រយោជន៍គ្នានោះទេបានជាចឹងនោះ!៕
