ខេត្តរតនគិរី៖ គំនរឈើសុក្រំជាច្រើនកំណាត់ ត្រូវបានក្រុមការងារអ្នកសារព័ត៌មានជាច្រើនអង្គភាពបានចុះមកផ្តិតយករូបភាពឈើជ្រុងប្រមាណជាង២០០កំណាត់ដែលក្រុមការងារអ្នកសារព័ត៌មាន ប្រទះឃើញឈើ ដែលឈ្មួញលាក់ទុកពីកន្លែងផ្សេងគ្នានៅក្បែរអូរ ខាងក្រោយប៉ុស្ពិ៍នគរបាលរដ្ឋបាលឃុំសេដា កាលពី ថ្ងៃទី២៩ ខែមេសា ឆ្នាំ២០១៨ ស្ថិតក្នុងភូមិសមុទ្រក្រោម ឃុំសេដា ស្រុកលំផាត់ ខេត្តរតនគិរី ។
តាមការឲ្យដឹងពីសមត្ថកិច្ចសូមមិនបញ្ចេញឈ្មោះបានឲ្យដឹងថា ឈើប្រណិតទាំងអស់នេះ មានមុខកាត់១៥គុណ១៥ និងមានប្រវែងចាប់ពី ២,៥០ម៉ែត្រ ទៅ៣,៥០ម៉ែត្រ មានចំនួនជាង២០០កំណាត់ជាប្រភេទឈើសុក្រំ ដែលឈ្មួញបានដឹកជញ្ជូនយកមកលាក់ទុកនៅមុនចូលឆ្នាំខ្មែរមកម្លេះត្រូវបានបែកការ។
ប្រភពបន្តទៀតថា ឈើទាំងអស់នេះ ត្រូវបានក្រុមឈ្មួញមួយចំនួនតូចយកមកលាក់ទុកត្រៀមដឹកចេញទៅប្រទេសវៀតណាមដោយមានការរាំងស្ទះផុតកំណត់កុំអីឈើទាំងនេះទៅដល់ប្រទេសវៀតណាមបាត់ទៅហើយ។
ក្រោយទទួលបានដំណឹងភ្លាម ឧត្តមសេនីយ៍ឯក ហុង វិណុល មេបញ្ជាការរងកងរាជអាវុធហត្ថលើផ្ទៃប្រទេស និងជាគណ:កម្មការទប់ស្កាត់បទល្មើសធនធានធម្មជាតិ បញ្ជាឲ្យកម្លាំងកងរាជអាវុធហត្ថខេត្តចុះទៅពិនិត្យផងដែរ។
បច្ចុប្បន្ន ឈើទាំងអស់នេះ ត្រូវបានកម្លាំងសមត្ថកិច្ចចម្រុះប្រមូលនឹងដឹកបញ្ជូនទៅស្នាក់ការបរិស្ថានស្រុកលំផាត់នាព្រឹកថ្ងៃទី៣០ ខែមេសានេះ ដើម្បីចាត់ការបន្តតាមនីតិវិធី ច្បាប់។
សូមបញ្ជាក់ថា ចំនួនឈើទាំងអស់នោះនៅមិនទាន់វាស់វែងនៅឡើយទេ ដោយសារសមត្ថកិច្ចបានប្រមូលយកទៅរក្សាទុកនៅស្នាក់ការបរិស្ថានតែម្តង ៕
ចាប សំអាន រាយការណ៍ពីខេត្តរតនគិរី
