ក្រចេះ៖ នៅថ្ងៃទី២៩ ខែមេសា ឆ្នាំ២០១៨ សម្ព័ន្ធគ្រូពេទ្យសហភាពសហព័ន្ធយុវជនកម្ពុជា ដឹកនាំដោយលោកជំទាវ យឹម ឆៃលីន ប្រធានកិត្តិយស សហកាជាមួយយុវជន ក ១៥៧ ដឹកនាំដោយលោក មិត្ត ឆៃយុទ្ធ សហកាជាមួយយុវជនសហភាពសហព័ន្ធយុវជនកម្ពុជាខេត្ត ដឹកនាំដោយឯកឧត្តម វ៉ា ថន អភិបាលនៃគណអភិបាលខេត្តក្រចេះ ចុះពិនិត្យព្យាបាលជំងឺដោយឥតគិតថ្លៃជូនប្រជាពលរដ្ឋរស់នៅក្នុងស្រុកព្រែកប្រសព្វ ខេត្តក្រចេះ។
ដោយមានវត្តមានចូលរួមពីប្រជាពលរដ្ឋ និងកុមារ ប្រមាណជាង១៥០០នាក់ បានមកទទួលការពិនិត្យ និងព្យាបាលជំងឺជាង១២មុខ រួមមានជម្ងឺទូទៅ,ជម្ងឺបេះដូងនិងជម្ងឺសរសៃឈាម,ជម្ងឺមនុស្សចាស់, ជម្ងឺត្រចៀក ច្រមុះបំពង់ក, ជម្ងឺភ្នែក, ជម្ងឺសើរស្បែកនិងកាមរោគ, ជម្ងឺផ្លូវចិត្ត,ជម្ងឺកុមារ, ជម្ងឺសន្លាក់និងគីស។ល។ ពីក្រុមគ្រូពេទ្យ និងវេជ្ជបណ្ឌិតខ្មែរជំនាញៗ ព្រមទាំងបរិក្ខារពេទ្យទំនើបៗ និងឱសថល្អៗ។
លោក ហេង សុខគង់ ប្រធានសម្ព័ន្ធគ្រូពេទ្យសហភាពសហពន្ធ័យុវជនកម្ពុជា បានមានប្រសាសន៍ឱ្យដឹងថា៖ក្នុងការពិនិត្យព្យាបាលជំងឺជូនប្រជាពលរដ្ឋនេះ មានវេជ្ជបណ្ឌិត គ្រូពេទ្យខ្មែរជំនាញៗនិងមានបទពិសោធន៍ត្រឹមត្រូវ ហើយបំពាក់ទៅដោយបរិក្ខារពេទ្យទំនើបៗ ឱសថល្អៗគុណភាពខ្ពស់។
លោកប្រធានសម្ព័ន្ធគ្រូពេទ្យសហភាពសហព័ន្ធយុវជនកម្ពុជា បានបញ្ជាក់ថាក្រុមគ្រូពេទ្យទទួលការព្យាបាលជំងឺ១២មុខ ដែលរួមមានជំងឺទូទៅ វះកាត់ ជំងឺភ្នែក ត្រចៀក ច្រមុះនិងបំពង់ក សន្លាក់ ជំងឺកុមារ រោគស្ត្រី និងពិនិត្យផ្ទៃពោះ ជំងឺមាត់ធ្មេញ ជំងឺផ្លូវចិត្ត កាមរោគ និងសើរស្បែក ជំងឺផ្លូវចិត្ត ពិនិត្យឈាម ព្រមទាំងផ្តល់ជូនថ្នាំពេទ្យក្រោយការព្យាបាល។
លោកជំទាវ យឹម ឆៃលីន បានមានប្រសាសន៍ថា ការចុះមកពិនិត្យព្យាបាលជំងឺប្រជាជនដោយឥតគិតថ្លៃនេះ គឺក្នុងគោលបំណង ជួយលើកកម្ពស់សុខភាពប្រជាជន ពិសេសដើម្បីឲ្យប្រជាពលរដ្ឋ ចំណេញពេលវេលាក្នុងការរកទទួលទាន និងធ្វើឲ្យពួកគាត់មានសុខភាពល្អជាប្រចាំដោយមិនចាំបាច់ចំណាយទៅលើការទិញថ្នាំពេទ្យ និងទៅរកគ្រូពេទ្យ និងសន្សំសំចៃថវិកាបានថែមទៀតផង។
លោកជំទាវ បានមានប្រសាសន៍បន្ថែមថា ការចុះពិនិត្យព្យាបាលជំងឺជូនប្រជាពលរដ្ឋនេះ គឺជាស្មារតីមនុស្សធម៌សុទ្ធសាធ ដែលស្តែងចេញពីសេចក្តីស្រឡាញ់បងប្អូនប្រជាពលរដ្ឋ និងផ្តល់ក្តីស្រឡាញ់ជូនដល់កុមារកំព្រាដែលត្រូវឪពុកម្តាយបោះបង់ចោល។
លោកជំទាវ បានលើកឡើងថា នេះមិនមែនជាលើកទីមួយទេ ដែលសម្ព័ន្ធគ្រូពេទ្យសហភាពសហព័ន្ធយុវជនកម្ពុជា បានពិនិត្យនិងព្យាបាលជំងឺដោយឥតគិតថ្លៃជូនប្រជាពលរដ្ឋ។ ដោយឡែក ក្នុងភូមិសាស្ត្រ ខេត្តក្រចេះ ក្រុមគ្រូពេទ្យបានពិនិត្យនិងព្យាបាលជំងឺជូនបងប្អូនប្រជាពលរដ្ឋជាលើកទី២ ហើយមានប្រជាពលរដ្ឋប្រមាណជាង១៥០០នាក់ បានមកទទួលការពិនិត្យនិងព្យាបាលជំងឺដោយឥតគិតថ្លៃពីសម្ព័ន្ធគ្រួពេទ្យសហភាពសហព័ន្ធយុវជនកម្ពុជា៕
ដោយ ម៉ែនបូរិទ្ធ
