រាជធានីភ្នំពេញ ៖ លោក ឌឹម ថេង អគ្គនាយករង នៃអគ្គនាយកដ្ឋានកាំកុងត្រូល បានថ្លែងប្រាប់អ្នកសារព័ត៌មានថា ស្ថាប័នមួយនេះបានបញ្ជាទៅមន្ត្រីតាមច្រកព្រំដែន ឲ្យរឹតបន្តឹងបន្ថែមទៀតនៅលើទំនិញនាំចូលពីវៀតណាម ជាពិសេស កាហ្វេ បន្ទាប់ពីសារព័ត៌មានវៀតណាមបានចុះផ្សាយថា អាជ្ញាធរវៀតណាមបានរកឃើញ និងបញ្ឈប់សិប្បកម្មផលិតកាហ្វែក្លែងក្លាយមួយ នៅភាគកណ្ដាលប្រទេសនេះ ខណៈដែលសិប្បកម្មផលិតកាហ្វេមួយ នេះបានផលិតកាហ្វេលាយជាមួយកាកសំណល់ថ្មពិល ដី និងកម្ទេចថ្ម ដែលបញ្ហានេះជំរុញឲ្យមានក្ដីបារម្ភនៅក្នុងចំណោមអ្នកប្រើប្រាស់កម្ពុជាផងដែរ ខណៈដែលវៀតណាម គឺជាអ្នកនាំចេញកាហ្វេធំលំដាប់ទីពីរនៅក្នុងចំណោមប្រទេសនាំចេញកាហ្វេទៅកាន់ទីផ្សារពិភពលោក។
សូមជម្រាបថា សារព័ត៌មានវៀតណាម Tuoi Tre News បានចុះផ្សាយថា ម្ចាស់អាជីវកម្មកាហ្វេមានលាយកំទេចថ្មពិលនោះ បានបើកអាជីវកម្មជាងមួយឆ្នាំហើយ និងបានលក់កាហ្វេនេះទៅកាន់ទីផ្សារជាង ៣តោនរួចទៅហើយតាំងពីដើមឆ្នាំ២០១៨នេះ ។ ប៉ុន្តែគេមិនដឹងថា ប្រភេទកាហ្វេបង្កគ្រោះថ្នាក់ខាងលើនេះ ត្រូវបាននាំចូលមកកម្ពុជារួមហើយ ឬយ៉ាងណានោះទេ ។ ប៉ុន្តែសាធារណជនបានសម្តែងនូវការអបអរសាទរចំពោះវិធានការរបស់អាជ្ញាធរកម្ពុជា ៕
