ភ្នំពេញ៖ មានករណីឃាតកម្មយ៉ាងសាហាវព្រៃផ្សៃមួយបានកើតឡើង ដោយឃាតក បានស្ទាក់ធ្វើសកម្មភាពយកកាំបិតផ្គាក់មកស្ទាក់កាប់ចំក បណ្តាលឲ្យដេកដួលស្លាប់ក្នុងថ្លុកឈាម ខណៈដែលនាងកំពុងជិះម៉ូតូតែម្នាក់ឯង ហើយឃាតកបានជិះម៉ូតូរត់ទៅលោតទឹកសម្លាប់ខ្លួនពីលើស្ពានអ្នកលឿង លិចបាត់ឈឹង មិនដឹងជាស្លាប់ឬក៏រស់នោះឡើយ កាលពីវេលាម៉ោង២ រសៀល ថ្ងៃទី១៩ ខែមេសា ឆ្នាំ២០១៨ នៅចំណុចអនុវិទ្យាល័យកំពង់ចម្លង ស្ថិតក្នុងភូមិកំពង់ចម្លង ឃុំព្រែកទន្លាប់ ស្រុកលើកដែក ខេត្តកណ្តាល ។
សមត្ថកិច្ចបានឲ្យដឹងថា នារីរងគ្រោះមានឈ្មោះ ទន់ ស្រីណយ អាយុ២០ឆ្នាំ ស្នាក់នៅភូមិស្ពានដែក ឃុំព្រែកទន្លាប់ ស្រុកលើកដែក ខេត្តកណ្តាល។ ចំណែកជនសង្ស័យជាអតីតប្តីមានឈ្មោះ អ៉ិនដារ៉ា ឆៃរ៉ាត់ អាយុ២១ឆ្នាំ ស្នាក់នៅផ្ទះក្បែរកន្លែងកើតហេតុ។
ស្ត្រីជាម្តាយរបស់នារីរងគ្រោះឈ្មោះ ហាក់ សុខភក្ត្រ័ អាយុ៤៨ឆ្នាំ បាន ឲ្យដឹងថា កូនរបស់គាត់និងជនសង្ស័យបានរៀបការជាមួយគ្នា នៅក្នុងអំឡុងខែ៥ ឆ្នាំ២០១៧ រៀបការរួច៣ថ្ងៃក៏ទៅរស់នៅខាងប្រុស ។ ក្រោយមក សុភមង្គលរបស់អ្នកទាំង២មិនចុះសម្រុងនឹងគ្នានោះទេ ចេះតែមានរឿងរកាំរកូស និងកើតហិង្សាវាយដំមកលើកូនស្រីគាត់ចំនួន៣លើកមកហើយ ។ លុះក្រោយមក ទើបកើតមានរឿងលែងលះគ្នាតាមផ្លូវច្បាប់ ដាច់ស្រេចនៅថ្ងៃក្រោយចូលឆ្នាំចិនបាន២ថ្ងៃ រហូតមកទល់ពេលនេះបានរយៈពេល៣ខែមកហើយ។
ក្រោយពីលែងលះគ្នាដាច់ស្រេចហើយនោះ ជនសង្ស័យបាន ប៉ុនប៉ងសម្លាប់កូនស្រីគាត់ ម្តងយូរហើយ នៅចំណុចម្តុំមាត់ទន្លេ ដោយបានបោះពាក្យគំរាមមកកាន់កូនស្រីគាត់ថា «បើហ៊ានយកប្តីទៀត គេ(ជនសង្ស័យ)នឹងសម្លាប់ចោល» តែពេលនោះកូនស្រីគាត់បានតបថា «ទោះនាងយកប្តីទៀត ក៏មិនទាក់ទងនឹងឯង(ជនសង្ស័យ)ដែរ!» ហើយក្រោយពីគំរាមរួចហើយនោះ គាត់បាននាំកូនស្រីទៅដាក់ពាក្យបណ្តឹងនៅប៉ុស្តិ៍រដ្ឋបាលឃុំលើកដែក ម្តងរួចមកហើយ។ លុះដល់ថ្ងៃកើតហេតុ កូនស្រីរបស់គាត់ បានជិះម៉ូតូម៉ាក Zoomer-X ពណ៌ខ្មៅ លាយទឹកក្រូចនិងពណ៌ស ពាក់ស្លាកលេខ កណ្តាល 1U-2388 ជិះទៅចំណុចកើតហេតុ ដែលមានចម្ងាយពីផ្ទះប្រហែល២ទៅ៣គីឡូម៉ែត្រ ទៅចំណុចម្តុំអនុវិទ្យាល័យកំពង់ចម្លង ស្រាប់តែទទួលដំណឹងថាកូនស្រីគាត់តែជនសង្ស័យកាប់សម្លាប់តែម្តង។
សាក្សីថាពេលនោះជនរងគ្រោះបានលើកដៃសំពះអង្វរជនសង្ស័តជាអតីតប្តីដែរតែវាមិនស្តាប់។ ក្រោយពីធ្វើសកម្មភាពកាប់សម្លាប់ជនរងគ្រោះរួចមក ជនសង្ស័យបានជិះម៉ូតូរត់ទៅចំណុចស្ពាន ត្សឹបាសា (ស្ពានអ្នកលឿង) រួចបានថតវីដេអូ លោតទម្លាក់ខ្លួនពីលើស្ពានធ្លាក់ចូលទៅក្នុងទឹកទន្លេបាត់ស្រមោល ដោយមិនដឹងថា ជនសង្ស័យរូបនេះត្រូវបានស្លាប់ ឬក៏រស់នោះទេ សមត្ថកិច្ចកំពុងតែស្រាវជ្រាវ ចំពោះករណីឃាតកម្មដ៏សាហាវយ៉ង់ឃ្នងមួយនេះ។
សូមបញ្ជាក់ថា មុននឹងកើតមានករណីឃាតកម្មនេះ ជនសង្ស័យបានបង្ហោះនៅពាក្យមួយឃ្លា នៅលើបណ្តាញសង្គមហ្វេសប៊ុកផ្ទាល់ខ្លួនដែលមានឈ្មោះ « Bong Rath Os Kea » ថា « ទោះមិនបានកើតក្នុងថ្ងៃតែ1 ក៏ស្លាប់ក្នុងថ្ងៃតែមួយដែរ បងស្រលាញ់អូនអាណយ» ។
