ភ្នំពេញ៖ពិធីបុណ្យចូលឆ្នាំប្រពៃណីជាតិខ្មែរ នឹងចូលមកដល់នៅ ថ្ងៃសៅរ៍ ១៤រោច ខែចែត្រ ត្រូវនឹងទី ១៤ ខែមេសា ឆ្នាំ ២០១៨ វេលាម៉ោង ៩ និង ១២ នាទីព្រឹក។ ថ្ងៃសង្ក្រាន្តថ្ងៃចូលឆ្នាំថ្ងៃទី១ត្រូវនឹងថ្ងៃសៅរ៍ ទេពធីតា ដែលនឹងយាងចុះមកបន្តវេនរក្សាមនុស្សលោកក្នុងឆ្នាំនេះ គឺព្រះនាងមហោធរៈទេវី បុត្រីទី ៧ នៃកបិលមហាព្រហ្ម ទ្រង់អម្ពរពណ៌ខៀវ មានផ្កាត្រកៀតសៀតនៅព្រះកាណ៌ សោយសាច់ទ្រាយ (ជាសត្វព្រៃពពួកឈ្លូស តែតូចជាងឈ្លូស) ជាភក្សាហារ ព្រះហស្តស្តាំកាន់កងចក្រ ព្រះហស្តឆ្វេងកាន់ត្រីសូល៍ គង់លើមយូរ៉ា ឬស្ដេចក្ងោក ជាពាហនៈ។
ថ្ងៃទី ២ គឺថ្ងៃ វារៈវ័នបត ត្រូវនឹងថ្ងៃអាទិត្យ ១ កើត ខែពិសាខ ត្រូវនឹងថ្ងៃទី ១៥ ខែមេសា គ.ស ២០១៨ ។ ថ្ងៃទី៣ គឺថ្ងៃវារៈឡើងស័ក ត្រូវនឹងថ្ងៃច័ន្ទ ២ កើត ខែពិសាខ ត្រូវនឹងថ្ងៃទី ១៦ ខែមេសា គ.ស ២០១៨ វេលាម៉ោង ១២ និង ៥៩ នាទី និង២៤ វិនាទី គម្រប់ជាសង្ក្រាន្ត ៣ ថ្ងៃ។។
តាមតម្រាមហាសង្ក្រាននៅក្នុងឱកាសសង្ក្រាន្តទាំងបីថ្ងៃ ប្រជាពលរដ្ឋប្រុសស្រីទាំងឡាយត្រូវខំលះបង់ចិត្តអាក្រក់អន្យតិរ្ថិយជាប់ដោយគំនុំគុំកួនព្យាបាទឈ្នានីសដែលកើតមានក្នុងឆ្នាំចាស់ឲ្យជ្រះស្រឡះ តាំងចិត្តប្រព្រឹត្តល្អ ប្រកបដោយ មេត្តា ករុណា មុទិតា ឧបេក្ខា និងបញ្ញា ធ្វើបុណ្យសុន្ទរ៍ទានតាមប្រពៃណី រក្សាសីលប្រាំឲ្យបានជាប់ជានិច្ច នោះទេវតានឹងឲ្យពរសព្ទសាធុការ ឲ្យលោកអ្នកមានសិរីសួស្ដី សុភមង្គល វិបុលសុខគ្រប់ប្រការតាំងពីឆ្នាំថ្មីនេះតរៀងទៅ ។
តាម ប្រពៃណី ទំនៀមទម្លាប់ ក្នុងពិធីបុណ្យចូលឆ្នាំ ប្រជាជន ខ្មែរ តែង រៀប រណ្ដាប់ ទទួល ទេវតា ឆ្នាំ ថ្មី ហើយ រណ្ដាប់ ទទួល ទេវតា នេះ តាម ទំនៀម ពី បុរាណ រៀង រហូត មក ត្រូវ រៀប រាន ទទួល ទេវតា នៅ ខាង មុខ ផ្ទះ មួយ សម្រាប់ តាំង គ្រឿង ពលីការ ផ្សេងៗ ។
លោកតា អាចារ្យ រៀបចំ ពិធី ក្រុង ពាលី គង់ ណេរបានឲ្យដឹងថា៖ តាម ទំនៀម ពី បុរាណ រណ្ដាប់ ទទួល ទេវតា ឆ្នាំ ថ្មី ត្រូវ រៀប ក្រាល សំពត់ ពណ៌ ស ហើយ រៀបចំ នូវ គ្រឿង សក្ការ បូជា ទេវតា មាន ជា អាទិ៍ បាយ សី ៩ ថ្នាក់ មួយ គូ បាយ សី ៧ ថ្នាក់ មួយ គូ បាយសី ៥ ថ្នាក់ មួយ គូ បាយសី ៣ ថ្នាក់ មួយ គូ បាយសី ប៉ាឆាម មួយ គូ ស្លាធម៌ មួយ គូ ទឹក អប់ មួយ គូ ទៀន ៥ ធូប ៥ លាជ ៥ ផ្កា ៥ ដាក់ លើ ជើង ពាន មួយ គូ ។ បន្ថែម លើ ពី នេះ ទៀត ត្រូវ ដាក់ ចេក នួន ចេក ណាំវ៉ា ដាក់ លើ ជើង ពាន ១ គូ ផ្លែ ឈើ ១១ មុខ ដាក់ លើ ជើង ពាន ១១ គូ ដូង ឡៅ ១ គូ និង ទឹក ស្អាត ពីរ កែវ ។
លោក តា អាចារ្យ បញ្ជាក់ដែរថា៖ ចំពោះ ប្រជាជន សាមញ្ញ ធម្មតា គួរ ធ្វើ បាយសី ត្រឹម ៥ ថ្នាក់ ចុះ មក ឬ រៀប ត្រឹម គ្រឿង សក្ការ បូជា ដែល មាន ទៀន ប្រាំ ធូប ប្រាំ ស្លាធម៌ កូន ចេក មួយ គូ ក៏ ល្មម សម គួរ ដែរ ។
ចំពោះ ផ្លែ ឈើ សម្រាប់ ប្រជាជន ទូទៅ គួរ រៀបចំ ឱ្យ បាន ៣ មុខ ឬ ៥ មុខ ក៏ ជា ការ ប្រសើរ គឺ រៀប ទៅ តាម ធនធាន របស់ ខ្លួន ។ នៅ គ្រប់ ដង្វាយ ទាំង អស់ ត្រូវ ដាក់ ផ្កា ម្លិះ ភួង គ្រប់ ដង្វាយ នៅ លើ ជើង ពាន និង លើ បាយសី ត្រូវ ដោត ទៀន ហើយ ដុត បំភ្លឺ ។
នៅ វេលា ម៉ោង ដែល ទេវតា ចុះ មក ត្រូវ ជួប ប្រជុំ គ្រួសារ ដើម្បី ថ្វាយ បង្គំ ព្រះ នមស្សការ ព្រះរតនត្រ័យ សមាទាន សីល ហើយ តាំង ចិត្ត ឱ្យ បាន ស្អាត បរិសុទ្ធ ជ្រះ ស្រឡះ នូវ មន្ទិល ទាំង ពួង ចិត្ត រំពឹង គិត ទៅ លើ ព្រះពុទ្ធ ព្រះធម៌ ព្រះសង្ឃ ជា ទី ពឹង ទី រឭក លុះ ចប់ ពិធី ទទួល ទេវតា ។