រាជធានីភ្នំពេញ ៖ ថ្លែងនៅក្នុងពិធីសម្ពោធដាក់ឲ្យប្រើប្រាស់មូលនិធិគន្ធបុប្ជាកម្ពុជា នាព្រឹកថ្ងៃទី ១១ ខែមេសា ឆ្នាំ២០១៨នេះ សម្តេច ហ៊ុន សែន នាយករដ្ឋមន្ត្រីកម្ពុជា បានថ្លែងជាសាធារណថា សម្រាប់អាណត្តិខាងមុខបើខ្ញុំនៅតែដឹកនាំ រាជរដ្ឋាភិបាលខ្ញុំនៅតែបន្តគាំទ្រដំណើរការនៃមន្ទីរ ពេទ្យគន្ធបុប្ផានេះ តាមរយៈការដាក់ ប្រាក់ តម្កល់១០លានដុល្លារ ជាធនធានបម្រុងក្នុងមួយឆ្នាំៗ សម្រាប់ប្រតិបត្តិការមន្ទីរពេទ្យ ។ សម្តេចបន្តថា ដរាបណាប្រទេសកម្ពុជា ដ៏កម្សត់នេះនៅតែរក្សា បានសន្តិភាពស្ថេរភាព មន្ទីរពេទ្យគន្ធបុប្ផានឹង នៅតែទទួលបានការយកចិត្តទុកដាក់ ជាចំបង ពីរាជរដ្ឋាភិបាលកម្ពុជា ។
សម្តេចមានប្រសាសន៍ថា ការបង្កើតនូវមូលនិធិគន្ធបុប្ផាកម្ពុជា នាពេលនេះគឺដើម្បី បន្តនូវ សកម្មភាព មនុស្សធម៌របស់មន្ទីរពេទ្យក្នុងការស្វែងរក ថវិកា ពីបណ្តាសប្បុរសជននានា មកទ្រទ្រង់ ក្នុងការព្យាបាលជំងឺ កុមារកម្ពុជាដោយឥតគិតថ្លៃ ដែលកំពុងរងចាំការ ព្យាបាលជារៀង រាល់ថ្ងៃនេះ ។ សម្តេចថា កុមារកម្ពុជានឹងទទួលបាន ការគាំពារនិងព្យាបាលជំងឺ ដោយឥតគិតថ្លៃ ។
សម្តេចបានថ្លែងថា យើងមានមោទនភាព ជាខ្លាំងដែលមានមន្ទីរពេទ្យដែលមាន គុណភាព សម្រាប់ការព្យាបាលកុមារ។ សម្តេចបន្តថា រាជរដ្ឋាភិបាលកម្ពុជាទទួលស្គាល់ ថាយើងមិន អាចពឹងផ្អែក លើលោកបេអាត រីច្នឺ (Beat Richner)រហូតនោះទេ ហើយ មូលនិធិគន្ធបុប្ផា ពីប្រទេសស្វីសអាចនឹងមានថមថយ នៅពេលណាមួយ ។ ប៉ុន្តែទោះបីរាជរដ្ឋាភិបាលកម្ពុជា បានបង្កើតមូលនិធិគន្ធបុប្ផាកម្ពុជា ក៏ដោយក៏រាជរដ្ឋាភិបាលមិនលុបបំបាត់ មូលនិធិគន្ធបុប្ផា ប្រទេសស្វីសនោះទេ។
សម្តេច ហ៊ុន សែន បានអំពាវនាវផងដែរដល់ប្រជាពលរដ្ឋមន្ត្រី រាជការ និងកងកម្លាំង ប្រដាប់អាវុធចូលរួមជាសមាជិកគាំទ្រមូលនិធិគន្ធបុប្ជាកម្ពុជា ព្រោះថា មូលនិធិនេះមិនមែន សម្រាប់តែឧកញ៉ា ថៅកែ ឬអ្នកមាននោះទេ គឺសម្រាប់យើងទាំងអស់គ្នា ហើយសម្តេចចង់បានសមាជិកគាំទ្រដែលចូលរួមក្នុងមួយខែចំនួន៥០០០រៀល ឲ្យបានកាន់តែច្រើន ព្រោះថា បើគិតពីចំនួនប្រជាជន ដែល មានសិទ្ធិបោះឆ្នោតជាង១០លាននាក់ បើមានសមាជិកតែ២លាននាក់ ក្នុងមួយខែយើង បាន២លានដុល្លារកន្លះ ៕
