កោះកុង ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ចង់ជួបជាមួយលោក ឧកញ៉ា លី យ៉ុងផាត់ អគ្គនាយកក្រុមហ៊ុន LYP Group ដើម្បីសម្របសម្រួល អោយក្រុមហ៊ុនមួយនេះ បញ្ចុះ តម្លៃទឹកស្អាត និងអគ្គិសនីប្រើប្រាស់ប្រចាំថ្ងៃ ក្នុងខេត្តកោះកុងតែមិនបានជួបបើទោះជាទៅដល់ខេត្តកោះកុងមូលដ្ឋានលោកសេដ្ឋីរូបនោះក៏ដោយ ។
ថ្លែងក្នុងពិធីសម្ពោធផ្លូវបេតុងមួយខ្សែប្រវែងជាងបួនគីឡូម៉ែត្រ ក្នុងសង្កាត់ស្ទឹងវែង ក្រុងខេមរភូមិន្ទ កាលពីថ្ងៃទី០៥ ខែមេសា សម្តេចពិជ័យ សេនា ទៀ បាញ់ បានលើកឡើងថា៖ ក្រុមហ៊ុន(លីយុងផាត់) គួរបន្ធូរបន្ថយតម្លៃលក់ខ្លះៗ ចៀសវាងផ្តល់ ផលប៉ះពាល់ដល់មន្ត្រីរាជការ អាជីវករ និងប្រជាពលរដ្ឋ ដែលកំពុងរស់នៅក្នុងក្រុងខេមរភូមិន្ទ និងស្រុកមណ្ឌលសីមា ដើម្បី ចូលរួមចំណែកកាត់បន្ថយភាពក្រីក្រ និងការអភិវឌ្ឍខេត្តឱ្យកាន់តែរីកចម្រើនបន្ថែមទៀត។
សូមបញ្ជាក់ថា៖អាណាចក្រខេត្តកោះកុងគឺជាមូលដ្ឋានសេដ្ឋកិច្ចបង្អែកដំបូងរបស់ឧកញ៉ាលីយុងផាត់ចឹងការដែលសម្តេចទៀបាញ់ត្អូញរឿងលំបាកជួបឧកញ៉ាលីយុងផាត់ការពិតគ្មានអ្វីចំឡែកនោះទេ។ព្រោះលោកឧកញ៉ារូបនោះស្តាប់តែតេជោសែនមួយប៉ុនណោះ។ជាក់ស្តែងទាំងការដកយកស្ពានកោះកុង(ទិញ)និងកាត់ដីចំការអំពៅបើគ្មានតេជោទេកុំសង្ឃឹមថារដ្ឋមន្ត្រី៣នាក់(ដែនដីបរិស្ថាននិងពាណិជ្ជកម្ម)អាចបង្ខំឲ្យគាត់កាត់ដីឲ្យប្រជាពលរដ្ឋប្រមាណ៥០០ហិកតាវិញនោះ។
ប្រជាពលរដ្ឋរស់នៅក្នុងក្រុងខេមរភូមិន្ទ បានឱ្យដឹងថា៖ បច្ចុប្បន្ន ក្រុមហ៊ុនផ្គត់ផ្គង់ទឹកស្អាត និងអគ្គិសនី ខេត្តកោះ កុង ដែលជាក្រុមហ៊ុនរបស់លោកឧកញ៉ា លី យ៉ុងផាត់ បានកំណត់យកថ្លៃទឹកជាង១ពាន់៥រយរៀល ក្នុងមួយម៉ែត្រត្រីគុណ ចំណែកភ្លើងអគ្គិសនី វិញ គឺ១គីឡូវ៉ុល ថ្លៃជាង៦០០រៀល។ ជារៀងរាល់ឆ្នាំ ក្នុងអំឡុងរដូវប្រាំង ប្រជាពលរដ្ឋរាប់ពាន់គ្រួសាររស់នៅក្នុងក្រុងខេមរភូមិន្ទ និងស្រុកមណ្ឌលសីមា ខេត្តកោះកុង រងផលប៉ះពាល់ដោយសារតែ ខ្វះទឹកស្អាតប្រើប្រាស់ ដែលធ្វើឱ្យពួកគេបង្ខំចិត្តទិញទឹកបរិសុទ្ធ ឬ ទិញទឹកដឹកតាមឡានប្រើជំនួសវិញ។ សំខាន់អ្នកវិនិយោគមកពីក្រៅបើគ្មានការឯកភាពឬចំណុះឧកញ៉ាលីយុងផាត់ទេគឹលំបាករកស៊ីហើយនៅកោះកុង។