ខេត្តសៀមរាប ៖ មុនបិទបញ្ចប់កិច្ចប្រជុំកំពូលគណៈកម្មាធិការទន្លេមេគង្គលើកទី៣ ដែលកម្ពុជាធ្វើជាម្ចាស់ផ្ទះនោះសម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញចូលរួមក្នុងសន្និសីទសារព័ត៌មានបង្ហាញពីលទ្ធផលនៃកិច្ចប្រជុំដ៏មានសារះសំខាន់នោះ ។
សម្តេចតេជោបានបង្ហាញនូវក្តីរីករាយ ដែលបានធ្វើជាម្ចាស់ផ្ទះ នៃកិច្ចជុំកំពូលគណៈកម្មការទន្លេមេគង្គលើកទី៣នាពេលនេះ។
សម្តេច ហ៊ុន សែន បានសង្វេបនូវលទ្ធផល នៃកិច្ចប្រជុំកំពូលពេញអង្គលើកទី៣ ដែលរួមមាន ប្រមុខរដ្ឋាភិបាលនៃប្រទេសជាសមាជិកគណៈកម្មការទន្លេមេគង្គបានពិនិត្យ និងវាយតម្លៃខ្ពស់ នូវវឌ្ឍនភាព និងសមិទ្ធផល ដែលគណៈកម្មការទន្លេមេគង្គសម្រេចបាន ចាប់តាំងពីកិច្ចប្រជុំកំពូលលើកទី២ ក្នុងឆ្នាំ២០១៤ នៅប្រទេសវៀតណាម ដែលបង្ហាញពីកិច្ចខិតខំប្រឹងប្រែង និងកិច្ចសហប្រតិបត្តិការល្អប្រសើរ ពាក់ព័ន្ធផ្សេងទៀត ក្នុងគោលដៅ និងបេសកកម្មរួមគ្នា សម្រាប់ធានាឲ្យបាននូវនិរន្តរភាពនៃទន្លេមេគង្គ និងធនធានរួមនៃទន្លេមេគង្គ ដើម្បីជាប្រយោជន៍ នៃភាពចម្រុងចម្រើន ក្នុងអាងទន្លេមេគង្គ ដោយការពារបាននូវនិរន្តរភាពបរិស្ថាន។
ប្រមុខរដ្ឋាភិបាលនៃប្រទេសជាសមាជិកគណៈកម្មការទន្លេមេគង្គ បានពិភាក្សាគ្នាអំពីកាលានុវត្តភាព និងបញ្ហាប្រឈម ក្នុងអាងទន្លេមេគង្គ ដែលក្នុងនោះរួមមាន ៖ កំណើនសេដ្ឋកិច្ចយ៉ាងរហ័ស, កំណើនប្រជាជន, កំណើនតម្រូវការទឹក, ស្បៀងនិងថាមពល, នគររូបនីយកម្ម, ឧស្សាហូបនីយកម្ម, ការបាត់បង់ទ្រព្យសម្បត្តិជាអាទិ៍បរិស្ថានជាដើម, ធនធានជលផល, ការកាប់បំផ្លាញព្រៃឈើ ក៏ដូចជាគ្រោះទឹកជំនន់ និងគ្រោះរាំងស្ងួត, ព្រមទាំងហានិភ័យ ដល់ជីវចម្រុះនិងដល់ជីវភាពរស់នៅ និងទ្រព្យសម្បត្តិរបស់ប្រជាជន ដោយសារផលប៉ះពាល់ នៃការប្រែប្រួលអាកាសធាតុ, ការអភិវឌ្ឍលើវិស័យទឹក និងក្នុងគ្រប់វិស័យពាក់ព័ន្ធផ្សេងទៀត នាពេលកន្លងមក។
ប្រមុខរដ្ឋាភិបាលនៃប្រទេសជាសមាជិកគណៈកម្មការទន្លេមេគង្គ បានកំណត់នូវសកម្មភាពជាអាទិភាព ដោយផ្តោតជាសំខាន់ លើការពង្រឹង និងលើកកម្ពស់កិច្ចខិតខំប្រឹងប្រែងរួមគ្នា, កិច្ចសហប្រតិបត្តិការតំបន់ និងភាពជាដៃគូ ដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាព ក្នុងអាងទន្លេមេគង្គ ដោយក្នុងនោះមាន ការងារស្នួលចំពោះមុខដែលត្រូវយកចិត្តទុកដាក់ និងអនុវត្តដោយស្មារតីទទួលខុសត្រូវខ្ពស់មួយចំនួន រួមមាន ៖១.លើកកម្ពស់ប្រសិទ្ធភាពនៃការអនុវត្តផែនការយុទ្ធសាស្ត្រ របស់គណៈកម្មការទន្លេមេគង្គឆ្នាំ២០១៦-២០២០ ។ ២.ការបន្តពង្រឹងការអនុវត្តរាល់នីតិវិធីរបស់គណៈកម្មការទន្លេមេគង្គ លើការគ្រប់គ្រង និងការប្រើប្រាស់ធនធានទឹក នៃអាងទន្លេមេគង្គ ឲ្យកាន់តែមានប្រសិទ្ធភាព ។ ៣.ការបន្តពង្រឹងការធ្វើវិមជ្ឈការសម្រាប់សកម្មភាពត្រួតពិនិត្យ តាមដានធនធានទន្លេមេគង្គ ដែលត្រូវអនុវត្តនៅថ្នាក់ជាតិ ។៤.ការពង្រឹងការងារមជ្ឈការ សម្រាប់បណ្តាញត្រួតពិនិត្យ តាមដាន អាងទន្លេមេគង្គ ដែលត្រូវអនុវត្តនៅថ្នាក់តំបន់ ។ ៥.ការបង្កើនការយល់ដឹងនិងការប្រើប្រាស់ផលិតផលរបស់គណៈកម្មការទន្លេមេគង្គ ដោយប្រទេសជាសមាជិក និងភាគីពាក់ព័ន្ធផ្សេងទៀត។ ៦.ការបង្កើននិងពង្រឹងកិច្ចសហប្រតិបត្តិការជាមួយយន្តការពាក់ព័ន្ធក្នុងក្របខ័ណ្ឌតំបន់និងអន្តរជាតិ។ ៧ .ការពិនិត្យពិចារណាលើលទ្ធផលនៃការសិក្សាស្តីពីការគ្រប់គ្រងនិងការអភិវឌ្ឍទន្លេមេគង្គសម្រាប់ប្រើ ប្រាស់ជាប្រយោជន៍ក្នុងការរៀបចំផែនការ,ការគ្រប់គ្រង,ការអភិវឌ្ឍអាងសម្រាប់ប្រើប្រាស់ជាប្រយោជ ន៍ក្នុងការរៀបចំផែនការ, ការគ្រប់គ្រង, ការអភិវឌ្ឍអាងទន្លេមេគង្គឲ្យបានល្អប្រសើរ និងប្រកបដោយចីរភាព។
ដោយឡែក ពាក់ព័ន្ធនឹងទិសដៅចំពោះមុខប្រមុខរដ្ឋាភិបាល នៃប្រទេសជាសមាជិកគណៈកម្មការទន្លេមេគង្គបានលើកឡើងថា ៖ ១.ប្រមុខរដ្ឋាភិបាលទន្លេមេគង្គបានអះអាងសាជាថ្មី នូវការប្តេជ្ញាចិត្តផ្នែកនយោបាយខ្ពស់បំផុត ចំពោះការអនុវត្តកិច្ចព្រមព្រៀងមេគង្គ ឆ្នាំ១៩៩៥ ឲ្យមានប្រសិទ្ធភាព និងលើកទឹកចិត្ត ដល់គណៈកម្មការទន្លេមេគង្គ ឲ្យប្រែក្លាយជាស្ថាប័ន មានភាពម្ចាស់ការផ្នែកហិរញ្ញវត្ថុដោយខ្លួនឯង នៅឆ្នាំ២០៣០ និងបន្តពង្រឹងតួនាទី របស់ក្រុមប្រឹក្សាគណៈកម្មការធិការរួម, លេខាធិការដ្ឋានគណៈកម្មការទន្លេមេគង្គ, បណ្តាគណៈកម្មាធិការជាតិទន្លេមេគង្គ, និងក្រសួងស្ថាប័នពាក់ព័ន្ធ នៅថ្នាក់ជាតិ នៅក្នុងដំណើរការការងាររបស់គណៈកម្មការទន្លេមេគង្គ។ ២.លើកទឹកចិត្តដល់គណៈកម្មការទន្លេមេគង្គ ឲ្យបន្តខិតខំគៀងគរមូលនិធិពីប្រភពផ្សេងៗ ដើម្បីគាំទ្រដល់ការអនុវត្តការងាររបស់ខ្លួន។ ៣.ប្រគល់ភារកិច្ចដល់ក្រុមប្រឹក្សាគណៈកម្មការទន្លេមេគង្គដើម្បីត្រួតពិនិត្យតាមដាននិងធានាលើកការអនុវត្តសេចក្តីថ្លែងការណ៍ក្រុងសៀមរាប ឲ្យមានប្រសិទ្ធភាព។
ប្រមុខរដ្ឋាភិបាល នៃប្រទេសជាសមាជិកគណៈកម្មការទន្លេមេគង្គ បានឯកភាពគ្នាថាកិច្ចប្រជុំកំពូលគណៈកម្មការទន្លេមេគង្គ លើកទី៤ នឹងរៀបចំធ្វើក្នុងខែមេសា ឆ្នាំ២០២២ នៅសាធារណរដ្ឋប្រជាធិបតេយ្យប្រជាមានិតឡាវ៕
