នាព្រឹកថ្ងៃទី ១៧ ខែកុម្ភៈ ឆ្នាំ២០១៦ សាកលវិទ្យាល័យបាត់ដំបង បានរៀបចំការប្រជុំបើកគម្រោងស្តីពី ការអនុវត្តន៏គុណភាពអប់រំ និងការបណ្តុះបណ្តាលរបស់សាកលវិទ្យាល័យ វ័យក្មេងនៅតំបន់ជនបទនៃប្រទេសកម្ពុជា ហៅកាត់ថា យូនីកំ (UNICAM) នៅសាកលវិទ្យា ល័យបាត់ដំបង ក្រោមអធិបតីភាពៈ លោកបណ្ឌិត និត ប៊ុនឡៃ អគ្គនាយកដ្ឋានឧត្តមសិក្សា របស់ក្រសួងអប់រំ យុវជន និងកីឡា លោកជំទាវ សៀង ឯមទទឹម សាកលវិទ្យាធិការ នៃ សាកលវិទ្យាល័យបាត់ដំបង – លោកស្រី ហេលីណា ហ្គូស សាស្ត្រាចារ្យ នៃសាកលវិទ្យល័យ ជីរ៉ូណា ប្រទេសអេស្ប៉ាញ និងជាអ្នកសម្របសម្រួលគម្រោងយូនីកំ (UNICAM) – លោកបណ្ឌិត ឡេក សុវណ្ណ សាស្ត្រាចារ្យនៃសាកលវិទ្យាល័យប៉ូលសបាត្យេ ប្រទេសបារាំង និងជាអ្នកផ្តួចផ្តើមគំនិតក្នុងការបង្កើតគម្រោង យូនីកំ( UNICAM) នេះជាមួយការសហការជា មួយលោក បណ្ឌិត ស្រ៊ាន ពៅ ព្រឺទ្ធបុរសស្តីទី នៃមហាវិទ្យាល័យកសិកម្ម និងកែច្នៃអាហារ របស់សាកលវិទ្យាល័យបាត់ដំបង។ គម្រោងយូនីកំ(UNICAM) នេះទទួលថវិកាឧបត្ថម្ភពីកម្ម វិធី ERASUM នៃសហភាពអ៊ឺរ៉ុប ចំនួនជាអ ប្រាំបីសែនអ៊ឺរ៉ុប សម្រាប់រយៈពេលបីឆ្នាំ ដោយគិត ចាប់ពីខែកញ្ញា ឆ្នាំ២០១៥ រហូតដល់ ខែសីហា ឆ្នាំ២០១៨។
គម្រោងនេះមានទិសដៅជួយលើកស្ទួយ គុណភាពអប់រំថ្នាក់ឧត្តមសិក្សា លើជំនាញ កសិកម្មនិរន្តរភាព តាមរយៈការបណ្តុះ បណ្តាលនិស្សិតថ្នាក់បរិញ្ញាបត្រជាន់ខ្ពស់ បុគ្គលិក សាស្ត្រាចារ្យ នៅតាមសាកលវិទ្យាល័យរដ្ឋ ចំនួនបួន រួមមានសាកលវិទ្យាល័យបាត់ដំបង សាកលវិទ្យាល័យមានជ័យ សាកលវិទ្យាល័យ ស្វាយរៀង និងសាកលវិទ្យាល័យជា ស៊ីម កំចាយមារ។ នេះគឺជាសមិទ្ធផលមួយដ៏ធំធេងមួយ សម្រាប់ប្រទេសកម្ពុជា ដែលទទួលបានគម្រោងសហប្រតិបត្តិការជាមួយ សាកលវិទ្យាល័យចំនួនបួននៅសហគមន៍អ៊ឺរ៉ុប និងដៃគូចំនួនបួនទៀតនៅអាស៊ីរួមបញ្ជូលទាំងក្រសួងអប់រំ យុវជន និងកីឡារបស់ប្រទេសកម្ពុជាផងដែរ។
កិច្ចប្រជុំបើកគម្រោងនេះបានប្រារព្វឡើងក្រោមការរៀបចំរបស់សាកលវិទ្យាល័យបាត់ដំបង ដើម្បីអោយដៃគូរបស់គម្រោង និងសិក្ខា កាម ធ្វើការពិភាក្សាអំពីការបង្កើតកម្មវិធីសិក្សាថ្នាក់បរិញ្ញាបត្រជាន់ខ្ពស់ជំនាញ កសិកម្ម និរន្តរភាព និងកម្មវិធីបណ្តុះបណ្តាលព្រមទាំងបញ្ហាផ្សេងៗពាក់ព័ន្ធទៅនឹងដំណើរការ អនុវត្តន៏គម្រោងនេះ ៕
ខ្ញុំ ពៅ សំអូន យកព័ត៌មានពីខេត្តបាត់ដំបង !
