រាជធានីភ្នំពេញ ៖ ថ្លែងនៅក្នុងជំនួបសំណេះសំណាលជាមួយកម្មករ កម្មការិនីប្រមាណជាង១ម៉ឺន នាក់ នៅតំបន់ព្រៃទា ខ័ណ្ឌពោធិ៍សែនជ័យ នាព្រឹកថ្ងៃទី២៨ ខែមិនា ឆ្នាំ២០១៨នេះ នាយករដ្ឋមន្ត្រីកម្ពុជា សម្តេច ហ៊ុន សែន បានប្រាប់កម្មករ កម្មការិនី អំពីមូលហេតុដែលសម្តេច ចុះជួបសំណេះសំណាលជាបន្តបន្ទាប់នារយះពេលចុងក្រោយនេះ ។
សម្តេច ហ៊ុន សែន បានបញ្ជាក់ថា សម្តេចមានខ្លួនតែមួយ ដូច្នេះមិនអាចទៅគ្រប់ទីកន្លែង ក្នុងពេលតែមួយនោះទេ គឺត្រូវមើលលើការងារណាដែលមានភាពចាំបាច់ និងអាទិភាពមុន។ សម្តេចបន្តថា ជាក់ស្តែងដូចពេលប្រទេសជាតិមានសង្គ្រាមគេឃើញ សម្តេចនៅតាមសមរភូមិ និងនៅលើតុចរចា ដើម្បីបញ្ចប់សង្គ្រាម ។ បន្ទាប់មកគេក៏ឃើញសម្តេចនៅតាមតំបន់ខ្មែរក្រហម ដើម្បីចរចាយក ខ្មែរក្រហមមករួមរស់ ជាមួយរាជរដ្ឋាភិបាល ។ ក្រោយមកគេឃើញសម្តេច នៅតាមវាលស្រែ ប្រឡាយទឹក ដើម្បីជំរុញការធ្វើស្រែផលិតស្បៀង។ លុះដល់បច្ចុប្បន្នគេក៏ ឃើញ សម្តេចចុះជួបកម្មករ កម្មការិនី ដើម្បីជំរុញវិស័យឧស្សាហកម្មវិញម្តង។
សម្តេច ហ៊ុន សែន ក៏បានថ្លែងដែរថា សម្តេចជាមេដឹកនាំដែលបានប្រើការចរចា ច្រើនជាងគេ បំផុតនៅលើពិភពលោកនេះ ដើម្បីនាំមកនូវការបង្រួបបង្រួម និងការផ្សះផ្សារជាតិ ។ សម្តេចថា សមិទ្ធផលដែលកម្ពុជាទទួលបាននេះគឺផ្តើមចេញពីការបញ្ចប់ភ្លើងសង្គ្រាម និងរក្សាបាននូវសុខសន្តិភាពមិនមែនបានមកពីការស្រែករបស់ក្រុមប្រឆាំងនោះឡើយ ៕