ភ្នំពេញ៖ អភិបាលខេត្តតាកែវ លោក ឡាយ វណ្ណៈ ត្រូវបានដកចេញពីតំណែង តែងតាំងលោក អ៊ូច ភា ជំនួសវិញ នេះបើយោងតាមព្រះរាជក្រឹត្យរបស់ ព្រះមហាក្សត្រនៃកម្ពុជា ដែលចុះហត្ថលេខាដោយប្រមុខរដ្ឋស្តីទី នៅថ្ងៃទី២៦ ខែមីនា ឆ្នាំ២០១៨ ។គិតត្រឹមថ្ងៃទី២៦ ខែមីនា ឆ្នាំ២០១៨នេះ លោក ឡាយ វណ្ណៈ កាន់តំណែងជាអភិបាលខេត្តតាកែវជំនួសលោកស្រីបេនដែលបច្ចុប្បន្នជាប្រធានក្រុមប្រឹក្សាខេត្ត បាន៤ឆ្នាំ ៩ថ្ងៃ។ ចំណែកលោក អ៊ូច ភា មុនតែងតាំងគឺជាអភិបាលរង ខេត្តតាកែវនិងជាកូនប្រសារ លោក ស្រី បេន ។
ការដកតំណែងលោក ឡាយ វណ្ណៈដែលជាកូនប្រសាលោកស៊ូភិរិន្ទរដ្ឋលេខាធិការទីស្តីការគណរដ្ឋមន្ត្រី ភ្លាមៗនៅពេលនេះវាលេច មានសេចក្តីរាយការណ៍ថា៖ដោយសារលោកឡាយវណ្ណៈជាប់ ពាក់ព័ន្ធរឿងអាស្រូវច្រើន ដែលក្នុងនោះ ក៏សំខាន់មានការដាក់ការសង្ស័យពាក់ព័ន្ធករណីធ្វើអត្តឃាតរបស់ស្ត្រីមេម៉ាយកូនបីម្នាក់ឈ្មោះចេវសុវឌ្ឍនា នៅក្នុងវិឡាដ៏ស្កឹមស្កៃមួយ នាក្រុងដូនកែវកាលពីថ្ងៃទី២៦ ខែមករា ឆ្នាំ២០១៨កន្លងទៅនេះ។
ព្រោះរឿងនោះត្រូវបានគេបំបិទចោល(តាមបញ្ជា)ក្រោយកើតហេតុភ្លាមៗ។បន្ទាប់មករហូតជាង២ខែក្រោយគឺដល់ដើមខែមីនាគេក៏ឃើញមានមន្ត្រីមកពីក្រសួងមហាផ្ទៃ តែងចេញចូលខេត្តតាកែវ ជាញឹកញាប់ ដើម្បីធ្វើការស៊ើបអង្កេតពីភាពមិនប្រក្រតីមួយចំនួនពាក់ព័ន្ធនឹងលោក ឡាយ វណ្ណៈ ។ ម្យ៉ាងសម្តេចក្រឡាហោមសខេងក៏ធ្លាប់លើកឡើងពីរឿងលោកឡាយវណ្ណៈរឿងធ្វើការមិនស្តាប់មេកើយផងដែរ។
សូមបញ្ជាក់ថា មន្ត្រីជាន់ខ្ពស់ក្រសួងមហាផ្ទៃ បញ្ជាឲ្យសមត្ថកិច្ចជំនាញពីក្រសួងចុះទៅបើកការស៊ើបអង្កេតឡើងវិញ ករណីស្រីស្អាតមេម៉ាយកូន៣ ចងកសម្លាប់ខ្លួននៅកណ្ដាលទីរួមខេត្តតាកែវ បើយោងតាមប្រភពពីសមត្ថកិច្ច នៅក្នុងខេត្តតាកែវ។មន្ត្រីនគរបាលមកពីក្រសួងមហាផ្ទៃ ដឹកនាំដោយឯកឧត្តម ប៉ុល រតនា អនុប្រធាននាយកដ្ឋានព្រហ្មទណ្ឌ បានចុះទៅកាន់ខេត្តតាកែវ ដោយជួបជាមួយស្នងការខេត្ត អធិការ និងមន្ត្រីសមត្ថកិច្ចជាច្រើនទៀតពាក់ព័ន្ធ ករណីស្ត្រីឈ្មោះ ចេវ សុវឌ្ឍនា អាយុ៣៦ឆ្នាំ ចងកសម្លាប់ខ្លួននៅក្នុងផ្ទះវីឡា ដែលខ្លួនជួលស្នាក់នៅជាមួយអ្នកបម្រើ ។
លោកឧត្តមសេនីយ៍ សុខ សំណាង ស្នងការនគរបាលខេត្តតាកែវ បានទទួលស្គាល់ថា ពិតជាមានមន្ត្រីមកពីនាយកដ្ឋានព្រហ្មទណ្ឌក្រសួងមហាផ្ទៃ ចុះមកសហការជាមួយកំលាំងរបស់លោកចុះទៅពិនិត្យទីតាំងកើតហេតុប្រាកដមែន(ផ្ទះស្ត្រី ចេវ សុវឌ្ឍនា ចងកសំលាប់ខ្លួន) តែក្រោយពីពិនិត្យហើយ ក៏ត្រឡប់ទៅវិញបាត់អស់ទៅ ដោយលោកមិនដឹងពីគោលបំណងអ្វីទេ?!។ប្រសិនបើដូច្នោះមែនហើយគ្មានការលុតលូនក្រាបទប់ទល់ទេលោកឡាយវណ្ណៈអាចនឹងមានទោស !៕
