ក្រចេះ៖ ស្ថានភាពបទល្មើសគ្រឿងញៀននិងបទព្រហ្មទណ្ឌល្មើសព្រហ្មទណ្ឌសម្រាប់ខេត្តក្រចេះ គឺមិនកើតមានធ្ងន់ធ្ងរឡើយ នេះក៏ដោយសារតែកងកម្លាំងរបស់នគរបាលខេត្ត មានឆន្ទះមុះមុត និងកតព្វកិច្ចការងារ តាំងពីថ្នាក់មូលដ្ឋានរហូតថ្នាក់ស្នងការដ្ឋាន។តែទោះជាបែបណាក៏ដោយ កម្លាំងនគរបាលត្រូវតែបន្តសកម្មភាពឲ្យកាន់តែខ្លាំងលើកិច្ចការងារបង្ការ ទប់ស្កាត់និងបង្ក្រាបនៅរាល់បទល្មើសឲ្យកាន់តែមានប្រសិទ្ឋភាព។ នេះជាប្រសាសន៍លើកឡើងរបស់លោកឧត្តមសេនីយ៍ស្នងការនគរបាលខេត្ត ថ្លែងទៅកាន់លោកស្នងការរងគ្រប់ផែន នាយការិយាល័យ អធិការនគរបាលស្រុក-ក្រុង និងនាយប៉ុស្តិ៍នគរបាលរដ្ឋបាល។
ការលើកឡើងរបស់លោកឧត្តមសេនីយ៍ លន់ សផាត បានធ្វើឡើងនៅក្នុងកិច្ចប្រជុំ ប្រចាំខែ និងលើកទិសដៅអនុវត្តបន្តនៅខែថ្មី ព្រមទាំងផ្សាព្វផ្សាយសេចក្តីជូនដំណឹងលេខ ០០៥/១៦របស់គណៈកម្មាធិការសុវត្ថិភាពចរាចរណ៍ផ្លូវគោក ដែលមានសម្តេចក្រឡាហោម ស ខេង ជាប្រធាននិងសេចក្តីណែនាំលេខ០០១ របស់អគ្គស្នងការនគរបាលជាតិ ស្តីពី ការការពារសន្តិសុខ សុវត្ថិភាព សណ្តាប់ធ្នាប់សាធារណៈ ក្នុងពិធីបុណ្យចូលឆ្នាំប្រពៃណី ចិន-វៀតណាម។
មានប្រសាសន៍បន្តនៅក្នុងកិច្ចប្រជុំដែលបានធ្វើឡើងពេញមួយព្រឹកថ្ងៃទី០៥ ខែកុម្ភះ ឆ្នាំ២០១៦ លោកឧត្តមសេនីយ៍ លន់ សុផាត បានសម្តែងនូវការកោតសរសើរ ដល់កងកម្លាំងនគរបាលប៉ុស្តិ៍ ស្រុក-ក្រុង នៅទូទាំងខេត្ត ដែលខិតខំបំពេញកិច្ចការងារធ្វើឲ្យមូលដ្ឋានមានសុខសុវត្ថិភាពទទួលបានការសរសើរនិងមានទំនុកចិត្តជាខ្លាំងពីពលរដ្ឋ។ ទន្ទឹមនោះដែរ លោកនិងមានវិធានការដល់មន្ត្រីមួយចំនួន ដែលអសកម្មនិងការងារ ផងដែរ។
ស្របពេលដែលពិធីបុណ្យចូលឆ្នាំថ្មីប្រពៃណីចិន-វៀតណាម និងខិតជិតចូលមកដល់ ពេលខាងមុខ លោកឧត្តមសេនីយ៍ លន់ សុផាត ស្នងការនគរបាលខេត្ត បានដាក់ផែនការយ៉ាងម៉ឺងម៉ាត់បន្ថែមពីលើទិសដៅផែនការរបស់អគ្គស្នងការនគរបាលជាតិ ដោយជម្រុញឲ្យកម្លាំងនគរបាលពង្រឹងកិច្ចការងារសន្តិសុខសណ្តាប់ធ្នាប់ បង្កើនវេនប្រចាំការឲ្យជាប់ជាប្រចាំតាមទីប្រជុំជន បណ្តារតំបន់ទេសចរណ៍នានា បង្ការទប់ស្កាត់កុំឲ្យជនល្មើសឈ្លាតឱកាសប្រព្រឹត្តសកម្មភាពណាមួយបាន។
ជាមួយគ្នានេះលោកឧត្តមសេនីយ៍លន់ សុផាត ស្នងការនករបាលខេត្តក៏បានធ្វើពិធី ប្រគល់សម្ភារៈប្រើប្រាស់ នៅតាមប៉ុស្តិ៍រដ្ឋបាល សង្កាត់ ទាំង៤៦ នៅទូទាំងខេត្តក្នុង១ប៉ុស្តិ៍ ទទួលបាន តុ១ កៅអី១ និងក្រដាស់រាម៥ដុំ ៕
ដោយ កិៈ ខន
