កំពង់ឆ្នាំង ៖ រថយន្តHyundaiយីឌុបអត់មានស្លាកលេខ១គ្រឿងលួចដឹកបង្កប់ឈើប្រណិតដំឡុងមីពីលើឈើពីក្រោមដែលគេស្គាល់ថា ជារបស់ឈ្មួញឈើស្រីម្នាក់នៅខេត្តពោធ៍សាត់ត្រូវបានសមត្ថកិច្ចបូលីសសេដ្ឋកិច្ចខេត្តកំពង់ឆ្នាំងចាប់បានទៀតកាលពីវេលាម៉ោង៤និង១៥ល្ងាចថ្ងៃទី១៦មិនា ២០១៨ ។ ឡានឈ្មួញឈើរូបនេះធ្លាប់ត្រូវបានសមត្ថកិច្ចរដ្ឋបាលព្រៃឈើខេត្តកំពង់ឆ្នាំងបង្ក្រាបបានកាលពីពេលកន្លងទៅហើយឲ្យម្ចាស់ចូលខ្លួនមកដោះស្រាយដោយបង់ពិន័យអន្តរកាលយករថយន្តទៅរកស៊ី ។ ឥឡូវឡានអាដែលហ្នឹងត្រូវម្ចាស់យកមករកស៊ីស្ទ៊ីលចាស់ដដែលគឺដំឡូងពីលើ ឈើពីក្រោមទៀត។
បើយោងតាមប្រភពប្រជាពលរដ្ឋបានអោយដឹងថាមុននឹងចាប់បានរថយន្តដឹកឈើខាងលើមានមន្ត្រីជំនាញស្ថាប័នមួយឃាត់ចាប់បានម្តង ប៉ុន្តែត្រូវបានម្ចាស់សុំសម្រួលបង់លុយអោយដោយសម្រួលត្រូវថ្លៃគ្នាចំនួន៧០០ដុល្លារអាមេរិចរួចដោះលែងវិញទៅ។
លុះបន្តដំណើរមកតាមផ្លូវដល់ចំណុចមុខវត្តតាកុលទើបកំលាំងបូលីសេដ្ឋកិច្ចខេត្តដឹកនាំដោយលោកព្រះរាជអាជ្ញារងឡុង សេដ្ឋាតាមបញ្ជាផ្ទាល់របស់លោកឧត្តមសេនីយ៍ត្រីឡុច វណ្ណារ៉ាស្នងការនគបាលខេត្តឃាត់ចាប់តែម្ដង ។
ប្រភពដដែលបានអោយដឹងថារថយន្តខាងលើតែងតែប្រើល្បិចលួចដឹកឈើបង្កប់ដំឡូងពីលើឈើពីក្រោមនេះជារឿយៗប៉ុន្តែគេមិនដែលឃើញមានសមត្ថកិច្ចជំនាញរដ្ឋបាលព្រៃឈើ ឬសមត្ថកិច្ចកងរាជអាវុធហត្ថដែលមានប៉ុស្ដិត្រួតតាមដងផ្លូវបណ្ដាក់គ្នាដូចខ្យង ឃាត់ចាប់បានម្ដងណាទេដោយសារម្ចាស់ឈើចេះទំនាក់ ទំនងជាមួយមន្ត្រីជំនាញនិងសមត្ថកិច្ចពាក់ព័ន្ធទាំងនោះបានយ៉ាងស្អិតរមួតទើបគេអាចរកស៊ីបានយ៉ាងរលូនបែបនេះ។
អាឡូវឈើដែលសមត្ថកិច្ចឃាត់ចាប់បាននោះជាប្រភេទឈើរាជថ្កុលនិងម្រះព្រៅភ្នំដែលគេឡាំងធ្វើជាក្ដាងឿមានមុខកាត់ទំហ៊ំុ១ម៉ែត្រ កម្រាស់២តឹក ប្រវែង៥ម៉ែត្រមានចំនួន៥សន្លឹក។ រថយន្តខាងលើត្រូវបានសមត្ថកិច្ចនាំយកមករក្សារទុកនៅផ្នែករដ្ឋបាលព្រៃឈើស្រុកកំពង់ត្រឡាចដើម្បីកសាងសំណុំរឿងបញ្ជូនទៅតុលាការចាត់ការតាមនិតិវិធី៕