ខេត្តកំពង់ស្ពឺ ៖ តាមការគ្រោងទុក សមយុទ្ធនាគមាសឆ្នាំ២០១៨ រវាងកងទ័ពកម្ពុជា និងចិនបានចាប់ផ្តើមនៅព្រឹកថ្ងៃទី១៧ ខែមីនា នេះ នៅភូមិសាស្ត្រតំបន់ភ្នំធំ ម្រះព្រៅ ភូមិថ្លុកដូនស ឃុំក្រាំងអំពិល ស្រុកសំរោងទង ខេត្តកំពង់ស្ពឺ ដែលជាទីតាំងរបស់កងពលអន្តរាគមន៍លេខ៧០។ សមយុទ្ធនេះ ធ្វើឡើងក្រោមវត្តមាននាយឧត្តមសេនីយ៍ ប៉ុល សារឿន អគ្គមេបញ្ជាការកងយោធពលខេមរភូមិន្ទ និងលោកឧត្តមសេនីយ៍ទោ Zhang Jian មេបញ្ជាការតំបន់ភូមិភាគខាងត្បូងនៃកងទ័ពរំដោះប្រជាជនចិន។
សមយុទ្ធនេះ ចាប់ពីថ្ងៃទី១៧ ដល់ថ្ងៃទី៣០ ខែមីនា ឆ្នាំ២០១៨ ផ្តោតទៅលើការប្រឆាំងភេរវកម្ម សង្គ្រោះបន្ទាន់ លំហាត់បាញ់គ្រាប់ពិត និងប្រើប្រាស់សព្វាវុធទំនើបៗដូចជា ឧទ្ធម្ភាគចក្រ Z10 បំពាក់កាំជ្រួចបាញ់ចំគោលដៅ កាំភ្លើងត្បាល់ចូលគោលដៅដែលបានកំណត់ និងរថពាសដែកផងដែរ។
នៅក្នុងសមយុទ្ធនេះ ភាគីកម្ពុជាមានកងទ័ពចំនួន ២៨០នាក់ ខណៈភាគីចិន មានចំនួន ១៩០នាក់។ កងទ័ពចិន មានឧទ្ធម្ភាគចក្រ រថពាសដែក និងគ្រឿងបំពាក់ផ្សេងៗទៀត ដែលសរុបទាំងអស់ មានចំនួន២៥គ្រឿង។ ចំណែកកងទ័ពកម្ពុជា ប្រើប្រាស់ឧទ្ធម្ភាគចក្រចំនួន៦គ្រឿង រថពាសដែក ៨គ្រឿង។
យុទ្ធោបករណ៍របស់កងទ័ពចិនសម្រាប់សមយុទ្ធនាគមាស ទាំងនោះរួមមានដូចជា៖ រថពាសដែកចំនួន ៨គ្រឿង រថយន្តដឹកជញ្ជូនចំនួន៦គ្រឿង រថយន្ត Jeep ចំនួន ៧គ្រឿង ឡានជួសជុលរថពាសដែក ចំនួន១គ្រឿង រថយន្តដឹកទឹកស្អាតចម្រោះចំនួន១គ្រឿង រថយន្តពេទ្យចំនួន១គ្រឿង និងរថយន្តដឹកទឹកចំនួន១គ្រឿង ព្រមទាំងសម្ភារៈមួយចំនួនទៀត៕
