រាជធានីភ្នំពេញ ៖ ការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ កាលពីរសៀលម្សិលមិញបានបង្ហាញមុខជនសង្ស័យចំនួន៣នាក់ដែលពាក់ព័ន្ធករណីហិង្សាដោយចេតនា វាយលោក បណ្ឌិត ស៊ុយ សារ៉េត ក្នុងករណីគ្រោះថ្នាក់ចរាចរបណ្តាលឲ្យរងរបួសធ្ងន់។
នាយការិយាល័យព្រហ្មទណ្ឌកម្រិតស្រាល លោកវរសេនីយ៍ឯក ប៊ុន សត្យា បានឲ្យដឹងថា ក្រុមជនសង្ស័យមានគ្នាចំនួន១១នាក់ ឃាត់ខ្លួនបានជនសង្ស័យបានចំនួន៣នាក់ រួមមានទី១.ឈ្មោះ អាន វិនទី ហៅទី ភេទប្រុស អាយុ២១ឆ្នាំ ជនជាតិខ្មែរ មុខរបរ ជាងទង ស្នាក់នៅសង្កាត់ផ្សារដេប៉ូទី១ ខណ្ឌទួលគោក។ ទី២.ឈ្មោះ យាត ទិត្យា ហៅយ៉ា ភេទប្រុស អាយុ២១ឆ្នាំ ជនជាតិខ្មែរ មុខរបរមិនពិត ប្រាកដ ស្នាក់នៅផ្ទះគ្មានលេខ ផ្លូវទី៧ សង្កាត់ទួលសង្កែទី១ ខណ្ឌឫស្សីកែវ ឃាត់ខ្លួននៅចំណុចភ្លើងស្តុបភោជនីយដ្ឋានឈូកទិព្វ សង្កាត់ផ្សារដេប៉ូទី១ ខណ្ឌទួលគោក និងជនសង្ស័យទី៣.ឈ្មោះ អាន ផល្លី ភេទប្រុស អាយុ៣១ឆ្នាំ ជនជាតិខ្មែរឥស្លាម មុខរបររត់រ៉ឺម៉កកង់៣ ស្នាក់នៅផ្ទះលេខ២៥៤១ ផ្លូវជាតិលេខ៥ សង្កាត់ច្រាំងចម្រេះទី២ ខណ្ឌឫស្សីកែវ ឃាត់ខ្លួនកាលពីថ្ងៃទី១៥ ខែមីនា ឆ្នាំ២០១៨ វេលាម៉ោង៧និង១០នាទី សមត្ថកិច្ចខេត្តកំពង់ធំឃាត់ខ្លួនៅចំណុចឃុំល្វា ស្រុកសន្ទុក ខេត្តកំពង់ធំ បញ្ជូនមកកាន់ការិយាល័យនគរបាលព្រហ្មទណ្ឌកម្រិតស្រាល រាជធានីភ្នំពេញ។ ចំណែកបក្ខពួកដែលនៅសេសសល់កម្លាំងជំនាញកំពុងដុតដៃដុតជើងស្វែងរកចាប់ខ្លួនយកមកផ្តន្ទាទោសតាមផ្លូវច្បាប់។
ចំពោះសម្ភារៈដកហូតរួមមានៈ ម៉ូតូ២គ្រឿង មួយគ្រឿងម៉ាកស៊ុយហ្សុយគីនិច ពណ៌សបិតពណ៌ក្រហម ពាក់ស្លាកលេខភ្នំពេញ 1GE-4674 និងមួយគ្រឿងទៀតម៉ាកហុងដា Beat ពណ៌ខៀវ សេរីឆ្នាំ២០១៧ ពាក់ស្លាកលេខ ភ្នំពេញ 1GQ-5211។
សូមជម្រាប់ថា កាលពីរសៀលថ្ងៃទី១១ ខែមីនា ឆ្នាំ២០១៨ ប្រជាពលរដ្ឋបានតាមដេញវាយប៉ុនប៉ងសម្លាប់លោកសាស្ត្រាចារ្យបណ្ឌិត ស៊ុយ សារ៉េត ហើយបានវាយកម្ទេចរថយន្តរបស់លោក ដោយចោទប្រកាន់ថា បានបើកបុករះសម្លាប់មនុស្ស២-៣នាក់ ពីផ្លូវក្នុងសង្កាត់ទួលសង្កែ ខណ្ឌឫស្សីកែវ រួចបើករត់គេចរហូតដល់ម្តុំពេទ្យលោកសង្ឃ ក្នុងខណ្ឌទួលគោក រាជធានីភ្នំពេញ ប៉ុន្តែសមត្ថកិច្ចបដិសេធថា មិនមានមនុស្សស្លាប់ឡើយ៕
