រាជធានីភ្នំពេញ ៖ ក្រុមហ៊ុនឯកជនមួយមកពីហុងកុងនឹងចាប់ផ្ដើមសាងសង់រោងចក្រកែច្នៃដំឡូងមីខ្នាតធំនៅអំឡុងខែមេសា និងមានគម្រោងបង្កើតរោងចក្រចំនួន ៥បន្ថែមទៀត នៅក្នុងរយៈពេល២ឆ្នាំខាងមុខ ។
នេះបើយោងតាមការអះអាងរបស់មន្ត្រីក្រសួងពាណិជ្ជកម្មបន្ទាប់ជំនួបពិភាក្សារវាង លោក មីឆែល ធីស៊ី (Michael Tse) នាយកប្រតិបត្តិនៃក្រុមហ៊ុន ហ្គ្រីន លីតឌ័រ (GreenLeader) ដែលជាក្រុមហ៊ុនមួយបានបោះទុននិវិយោគក្នុង កម្រិតធំលើការកែច្នៃផលិតផលដំឡូងមី និងលោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម ។
មន្ត្រីក្រសួងពាណិជ្ជកម្មបានបញ្ជាក់បន្ថែមថា ជាការចាប់ផ្ដើមអនុវត្តដំបូងទៅលើចក្ខុវិស័យវែងឆ្ងាយរបស់ក្រុមហ៊ុន នឹងចាប់ផ្ដើមសាងសង់រោងចក្រទីមួយនៅខេត្តក្រចេះនៅអំឡុងខែមេសាខាងមុខ ដោយរោងចក្រនេះមាន សមត្ថភាពកែច្នៃដំឡូងមីជាម្សៅប្រមាណ១០ម៉ឺនតោនក្នុងមួយឆ្នាំ។ ដើម្បីអាចទទួលបានផលកែច្នៃក្នុងទ្រង់ ទ្រាយដូចខាងលើ រោងចក្រចាំបាច់ត្រូវការដំឡូងមីជាវត្ថុធាតុដើមយ៉ាងតិច៥០ម៉ឺនតោនក្នុងមួយឆ្នាំ ហើយ ដើម្បីទ្រទ្រង់កម្រិតផលិតកម្មនេះបាន ក្រុមហ៊ុននឹងប្រើប្រាស់យន្តការកិច្ចព្រមព្រៀងកសិកម្ម (Contract Farming) ជាមួយនឹងកសិករ ដោយផ្ដល់ជូននូវបច្ចេកទេស ពូជ និងធនធានមួយចំនួនទៀត។
លោកបន្ថែម ថា ក្រុមហ៊ុនក៏មានគម្រោងបង្កើតរោងចក្រចំនួន០៥ ក្នុងរយៈពេល០២ឆ្នាំ ដោយរោងចក្រទីពីរអាចនឹងសាង សង់នៅប៉ែកខាងខេត្តបាត់ដំបង ប៉ៃលិន និងខេត្តបន្ទាយមានជ័យ ៕
