រាជធានីភ្នំពេញ ៖ ក្រសួងទេសចរណ៍បានចេញនូវសេចក្តីជូនដំណឹងបន្ទាន់មួយ ដោយប្រកាសដល់ភ្ញៀវ ទេសចរណ៍ជាតិ និងអន្តរជាតិរួមទាំងសាធារណជនថា នៅឆ្នាំនេះបាតុភូតព្រះអាទិត្យរះចំ កណ្តាលកំពូលប្រាសាទអង្គរវត្តកម្ពុជា អាចនឹងកើតឡើងនៅចន្លោះថ្ងៃទី២០ដល់ថ្ងៃទី២២ ខែមិនា ឆ្នាំ២០១៨ ចន្លោះម៉ោង៥,០០នាទី ដល់ម៉ោង៧,០០នាទីព្រឹក ។
ក្រសួងទេសចរណ៍បានបញ្ជាក់ថា បាតុភូតព្រះអាទិត្យរះចំកណ្តាលកំពូលប្រាសាទអង្គរ វត្តកម្ពុជា ( EQUINOX ) កើតឡើងចំនួន២ដងជារៀងរាល់ឆ្នាំ ដោយលើកទី១ នៅក្នុងខែមិនា និងលើកទី២នៅក្នុងខែកញ្ញា ។ បាតុភូតព្រះអាទិត្យរះចំកណ្តាលកំពូលប្រាសាទអង្គរវត្តនេះ ស្តែងឲ្យឃើញពីអច្ឆរិយភាព នៃប្រាសាទអង្គរដែលត្រូវបានបុព្វបុរសខ្មែរយើងកសាងដោយមាន ការគិតគូរអំពីស្ថាបត្យកម្ម និងការផ្សារភ្ជាប់ជាមួយនឹងធម្មជាតិយ៉ាងច្បាស់លាស់គួរឲ្យស្ងប់ស្ងែង ។
ក្រសួងទេសចរណ៍បានបញ្ជាក់ដូច្នេះថា នៅឆ្នាំនេះបាតុភូតព្រះអាទិត្យរះចំកណ្តាលកំពូល ប្រាសាទអង្គរវត្តកម្ពុជាអាចនឹងកើតឡើងនៅចន្លោះថ្ងៃទី២០ ដល់ថ្ងៃទី២២ ខែមិនា ឆ្នាំ២០១៨ ចន្លោះម៉ោង៥៖០០នាទី ដល់ម៉ោង៧៖០០នាទីព្រឹក ហើយជារៀងរាល់ឆ្នាំ ព្រឹត្តិការណ៍ដ៏ អស្ចារ្យនេះ តែងតែមានការចូលរួមពីសំណាក់ភ្ញៀវទេសចរណ៍ជាតិ និងអន្តរជាតិមករង់ចាំទស្សនា និងផ្តិតយករូបភាពរាប់ម៉ឺននាក់ ។ ទន្ទឹមនោះ ដើម្បីចូលរួមផ្សព្វផ្សាយព្រឹត្តិការណ៍ដ៏មហស្ចារ្យនេះ ក្រសួងទេសចរណ៍នឹង រៀបចំការប្រកួតប្រជែងថតរូបស៊ែលហ្វី ( Angkor Selfie Photo Contest ) លើកទីបី ក្រោមប្រធាន បទ ៖ Selfie អង្គរអច្ឆរិយៈ ដោយជ្រើសរើសរូបថតដែលមានអ្នកគាំទ្រច្រើនជាងគេពីលេខ១ ដល់លេខ៣ ដើម្បីទទួលលិខិតសរសើរចេញដោយ ក្រសួងទេសចរណ៍ និងរង្វាន់លើកទឹកចិត្ត លេខ១ ចំនួន១លានរៀល លេខ២ចំនួន៨០ម៉ឺនរៀល និងលេខ៣ចំនួន៥០ម៉ឺនរៀល ។
ក្រសួងទេសចរណ៍សូមអំពាវនាវដល់ភ្ញៀវទេសចរណ៍ជាតិ-អន្តរជាតិ និងសាធារណជន មេត្តាអញ្ជើញទៅទស្សនា និងផ្តិតយករូបភាពដ៏មហស្ចារ្យនេះ ព្រមទាំងជួយផ្សព្វផ្សាយព្រឹត្តិ ការណ៍នេះឲ្យបានទូលំទូលាយ ដើម្បីចូលរួមដល់យុទ្ធនាការ « កម្ពុជា៖ ព្រះរាជាណាចក្រ អច្ឆរិយះ ប្រកបដោយភាពកក់ក្តៅ ៕
