រាជធានីភ្នំពេញ ៖ អាចនិយាយថា ជាប្រតិកម្មលើកដំបូងរបស់នាយករដ្ឋមន្ត្រីកម្ពុជា ទាក់ទងនឹងការបែកធ្លាយក្លីបវីដេអូបង្ហាញពីកិច្ចព្រមព្រៀងរវាងលោក សម រង្ស៊ី និង កុក ស ប្រធានចលនាយួនសេរី ដែលក្នុងកិច្ចព្រមព្រៀងនោះលោក សម រង្ស៊ី បានយល់ព្រមកាត់ដីខេត្តខ្មែរចំនួន៤ឲ្យទៅចលនាយួនសេរី ក្នុងពេលដែលលោកឡើងកាន់អំណាចនៅកម្ពុជា ។
សម្តេច ហ៊ុន សែន បានប្រតិកម្មថា រឿង សម រង្ស៊ី ចុះហត្ថលេខាកាត់ដីខ្មែរ៤ខេត្តឲ្យទៅ វៀតណាមជារឿងក្បត់ជាតិមិនអាចរួចខ្លួននោះឡើយ ។ សម្តេចថា នៅពេលដែលសម្តេចខិតខំ ចរចាជាមួយវៀតណាមជាមួយឡាវជាមួយថៃ ដើម្បីដោះស្រាយបញ្ហាព្រំដែន ការពារទឹកដីកុំឲ្យ បាត់បង់ តែគេបែរជាលួចចរចាស្ងាត់ៗ កាត់ដីឲ្យវៀតណាមដោយស្រួលៗ ។
សម្តេច ហ៊ុន សែន ក៏បានស្នើឲ្យក្រសួងមហាផ្ទៃ និងក្រសួងយុត្តិធម៌ស៊ើបអង្កេតរឿង អតីតមេបក្សសង្គ្រោះជាតិ ដែលហ៊ានសន្យាកាត់ដីខ្មែឲ្យវៀតណាម ដើម្បីចាត់ការតាមផ្លូវច្បាប់ ព្រោះរឿងនេះមិនមែនតូចតាចនោះទេ វាជារឿងក្បត់ជាតិ ជាក់ស្តែងមិនអាចអត់ឱនឲ្យបានឡើយ ។
សម្តេចរម្លឹកឡើងវិញថា អតីតមេបក្សប្រឆាំងរូបនោះតែងតែជេរសម្តេចមួយថ្ងៃ១០ដងថា សម្តេចលក់ដីឲ្យយួន ប៉ុន្តែគេបែរជាកាត់ដីឲ្យយួនស្រួលៗ ទៅវិញ ហើយវាអយុត្តិធម៌ណាស់ សម្រាប់សម្តេចដែលខិតខំការពារបូរណភាពទឹកដីដែលបន្សល់ទុកពីដូនតាមក ។
សម្តេចក៏បានថ្លែងឲ្យដឹងដែរថា គេថា កុក ស ជាខ្មែរ នៅពេលដែល កុក ស មិនចេះ និយាយភាសាខ្មែរ សូម្បីតែមួយម៉ាត់ ។ ទន្ទឹមនោះសម្តេចក៏សួរថា បើ កុក ស ជាខ្មែរ ហេតុអី ចាំបាច់ចុះកិច្ចព្រមព្រៀងប្រគល់ដីខ្មែរឲ្យពួក កុក ស…..?។ ប៉ុន្តែសម្តេចថា ឯកសារ ភស្តុតាង មានគ្រប់គ្រាន់មិនអាចប្រកែកបាននោះឡើយ…… ហើយសម្តេចក៏មិននិកស្មានថា គ្រាន់តែរឿង ចង់បានអំណាច គេហ៊ានកាត់ដីខ្មែរឲ្យបរទេសដូច្នេះសោះ។
សម្តេចក៏បានបង្ហាញនូវការភ្ញាក់ផ្អើលផងដែរ ខណដែលទទួលបានព័ត៌មានថា លោក សម រង្ស៊ី លួចជួបពិភាក្សាជាមួយមេដឹកនាំប្រទេសវៀតណាម ជាបន្តបន្ទាប់នៅទីក្រុងហាណូយ និងខេត្តតាយនិញ ។ ដូច្នេះសម្តេចនឹងសួរទៅមេដឹកនាំវៀតណាមថា តើការជួបពិភាក្សានោះ គេនិយាយរឿងស្អីខ្លះ? ។ សម្តេចសង្កត់ធ្ងន់ថា បើមិត្តវៀតណាមពិតជាមិត្តស្មោះត្រង់ជាមួយ កម្ពុជាមែននោះ ត្រូវប្រាប់ឲ្យច្បាស់ថា ការជួបគ្នានោះនិយាយស្អីខ្លះទៅ ? ។
ការថ្លែងដូច្នេះរបស់សម្តេច ហ៊ុន សែន ធ្វើឡើងក្នុងឱកាសសម្តេចអញ្ជើញសម្ពោធ ដាក់ឲ្យប្រើប្រាស់ជាផ្លូវការ នូវស្ពានឆ្លងទន្លេទៅកោះប៉ែន ស្ថិតនៅក្នុងភូមិកំពង់ត្រុំ ឃុំកោះមិត្ត ស្រុកកំពង់សៀម ខេត្តកំពង់ចាម នៅព្រឹកថ្ងៃទី១៤ ខែមីនា ឆ្នាំ២០១៨នេះ ៕