រាជធានីភ្នំពេញ ៖ ដោយសង្កត់ធ្ងន់ឲ្យមានការរួមគ្នា ដើម្បីរក្សាសន្តិភាពនៅកម្ពុជាទោះ ក្នុងតម្លៃណាក៏ដោយ សម្តេចនាយករដ្ឋមន្ត្រី ហ៊ុន សែន បានលើកឡើងថា កម្ពុជាត្រូវធ្វើជា ម្ចាស់ លើខ្លួនឯង មិនត្រូវទោទន់ទៅតាមការបង្ខំរបស់បរទេសនោះទេ ។
ការថ្លែងរបស់សម្តេចធ្វើឡើងក្នុងពិធីសម្ពោធដាក់ឲ្យប្រើប្រាស់កំណាត់ផ្លូវជាតិលេខ១ កាលពីព្រឹកថ្ងៃទី១៣ ខែមិនា ឆ្នាំ២០១៨នេះ ។ សម្តេចមានប្រសាសន៍ថា ទោះជាតម្លៃណាក៏ ដោយត្រូវរក្សាសន្តិភាពឲ្យបាន ព្រោះអ្វីៗជាកត្តាកំណត់នៅលើដៃប្រជាពលរដ្ឋប៉ុណ្ណោះ ។
សម្តេចបញ្ជាក់បន្ថែមថា បទពិសោធន៍នៅបណ្តាប្រទេសមួយចំនួនដូចជា ស៊ីរី អីរ៉ាក់ លីប៊ី អាហ្វ្រិកកណ្តាល សុទ្ធតែបង្ហាញថា ប្រជាពលរដ្ឋនៃប្រទេសនោះជាអ្នកស្លាប់ ។ ចំណែកបរទស គេមកដុតផ្ទះយើងហើយ គេយកពូថៅមកវ៉ៃក្បាលយើងហើយ គេបង្ខំឲ្យយើងសងពូថៅគេថែម ទៀត ហើយនេះជាការឈឺចាប់បំផុត សម្រាប់ប្រទេសទាំងអស់នោះ ។
សម្តេច ហ៊ុន សែន បានរម្លឹកឡើងវិញថា របបលន់ណុល គឺលន់ណុលជាអ្នកខ្ចីលុយគេ យកមកទិញគ្រាប់បែកមកទិញអាវុធមកដុតផ្ទះខ្មែរ សម្លាប់ខ្មែរ ហើយឥឡូវនេះគេចាប់បង្ខំឲ្យខ្មែរ សងលុយគេទៀត ហើយមិនចាំបាច់និយាយឲ្យចំឈ្មោះថា ជាអ្នកណានោះទេ គឺប្រជាពលរដ្ឋបានដឹងគ្រប់គ្នាហើយ ។ ដូច្នេះយើងគួរតែដឹង ហើយគ្មានអ្នកណាស្រឡាញ់ខ្មែរជាងខ្មែរនោះទេខ្មែរត្រូវជាម្ចាស់លើខ្លួនឯង ។
សម្តេច ហ៊ុន សែន បានប្រកាសជាថ្មីថា សម្តេចនឹងបន្តកាន់កាប់តំណែងជានាយករដ្ឋមន្ត្រី យ៉ាងតិច១០ឆ្នាំទៀត ហើយបើក្រុមប្រឆាំងបំផ្លាញជាតិនៅតែមានគឺសម្តេចនៅបន្តកាន់តំណែង ទៀត លុះត្រាតែពួកបំផ្លាញជាតិរលត់រលាយអស់ពីកម្ពុជា ៕
