ខេត្តក្រចេះ ៖ ប្រធានមន្ទីរវប្បធម៌ និងវិចិត្រសិល្បៈខេត្តក្រចេះ លោក ទេព វាសនា បានឲ្យដឹងថា ក្នុងរយៈពេលមួយឆ្នាំកន្លងមកនេះ មន្ទីរវប្បធម៌ និងវិចិត្រសិល្បៈខេត្ត តែងតែយកចិត្តទុក ដាក់ក្នុងការបំពេញការងារ និងភារៈកិច្ចរបស់ខ្លួនបានល្អប្រសើរ ទាំងបេតិកភណ្ឌរូបី និងអរូបី ដើម្បីឲ្យមានការអភិវឌ្ឍន៍ តាមទិសដៅរបស់រាជរដ្ឋាភិបាល និងក្រសួងវប្បធម៌ និងវិចិត្រសិល្បៈ។
លោក បានបញ្ជាក់ថា មន្ត្រីជំនាញរបស់មន្ទីរបានរកឃើញទីទួលប្រសាទបុរាណចំនួន ៦កន្លែង នៅក្នុងស្រុកសំបូរ ក្នុងនោះមាន ទីទួលប្រសាទទូកមាស, ទីទួលប្រសាទ ទួលវិហារ, ទីទួលប្រសាទនាងម្លិច, ទីទួលប្រសាទក្របីខោល, ទីទួលប្រសាទអន្លងក្រពើ និងទីទួលប្រសាទត្រពាំងបន្ទាយ ។ ក្រៅពីនោះ មន្ទីរវប្បធម៌ខេត្ត បានយកផ្ទាំងសិលាចរឹក ១ផ្ទាំង ទេពរូបបដិមាព្រះវិស្ណុ លឹង្គព្រះឥសូរ យកមករក្សាទុកនៅមន្ទីរវប្បធម៌ខេត្ត ។ ក្រុមការងារជំនាញនៃមន្ទីរវប្បធម៌ខេត្ត ក៏បានចុះពិនិត្យ ទីទួលប្រសាទមួយចំនួនដូចជា ប្រសាទបន្ទាយសៀម ប្រសាទអូប្រក់ ប្រសាទល្បើកស្រុត ប្រសាទដងរែក ប្រសាទកំពូល ប្រាំ និងប្រសាទព្រះខ្វាន់ពី ។
លោកប្រធានមន្ទីរវប្បធម៌ខេត្ត បានថ្លែងបែបនេះ នៅក្នុងឱកាសប្រារព្ធទិវាវប្បធម៌ជាតិ ៣មិនា លើកទី២០ នាព្រឹកថ្ងៃទី១៣ ខែមិនា ឆ្នាំ២០១៨ ក្រោមអធិបតីភាព ឯកឧត្តម សរ ចំរុង អភិបាលនៃគណៈអភិបាលខេត្តក្រចេះ និងឯកឧត្តម ឃឹម សារិទ្ធ រដ្ឋលេខាធិការនៃ ក្រសួងវប្បធម៌ វិចិត្រ និងសីល្បៈ និងវត្តមានចូលរួមពីមេបញ្ជាការ មេបញ្ជាការរង កងកម្លាំងទាំងបីប្រភេទ លោក លោកស្រី ប្រធាន អនុប្រធានមន្ទីរនានាជំវិញខេត្ត និងសិស្សានុសិស្សយ៉ាងច្រើនកុះករ នៅសាលមហោស្រពខេត្ត ។
ឯកឧត្តម សរ ចំរុង បានមានប្រសាសន៍ថា ទិវាវប្បធម៌ជាតិ ៣មិនា លើកទី២០ ឆ្នាំ២០១៨នេះ គឺជាទិសដៅដ៏សំខាន់មួយ ដែលរាជរដ្ឋាភិបាលកម្ពុជាតែងតែយកចិត្តទុកដាក់ រៀបចំធ្វើឡើងជារៀងរាល់ឆ្នាំ ក្នុងគោលបំណងរំលឹកដល់គុណូបការៈដ៏សម្បូរបែប សម្រាប់ យើងគ្រប់គ្នាជាកូនចៅជំនាន់ក្រោយ និងជាទិវាបង្កើតនូវសេចក្តីស្រលាញ់ ព្រមទាំងលើក កំពស់តម្លៃវសីលធម៌ ក្នុងន័យបណ្តុះបណ្តាលស្មារតីអោយសកម្ម ក្នុងការថែរក្សា ការពារសម្បត្តិវប្បធម៌ជាតិ ទាំងបេតិកភណ្ឌវប្បធម៌រូបីយ៏ និងបេតិកភណ្ឌវប្បធម៌អរូបីយ៏ អោយបានស្ថិតស្ថេរគង់វង្សរុងរឿង ថ្កើនថ្កានជាឧត្តមប្រយោជន៏នៃជនជាតិយើង។
ឯកឧត្តម ឃឹម សារឹទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ បានមានប្រសាសន៍កោតសសើរដល់មន្ទីរ វប្បធម៌ និងវិចិត្រសិល្បៈ ខេត្តក្រចេះ ដែលបានខិតខំប្រឹងប្រែងអនុវត្តការងារ ទៅតាមយុទ្ធសាស្ត្របទដ្ធាននានា របស់រាជរដ្ឋាភិបាលទទួលបានលទ្ធផលល្អប្រសើរ ជាពិសេសបានចូលរួមចំណែកការថែក្សាការពារវប្បធម៌ និងចូលរួមលើកកពស់តម្លៃវប្បធម៌អោយកាន់តែល្អថែមទៀត ។ ដូច្នេះ យុវជនត្រូវតែ ស្រឡាញ់វប្បធម៌ ប្រពៃណីជាតិ ត្រូវស្គាល់ពីតម្លៃវប្បធម៌អោយច្បាស់ក្នុងន័យ ថែរក្សាការ ពារអោយបានគង់វង្ស។
ទន្ទឹមនេះ គ្រប់ស្ថាប័នពាក់ព័ន្ធ អាជ្ញាធដែនដី អង្គការជាតិ អន្តរជាតិ និងវិស័យឯកជននានា ក្នុងខេត្តក្រចេះ ទាំងអស់ មេត្តារួមគ្នារិះរកវិធីជំរុញលើកទឹកចិត្តដល់យុវជន ដែលជាអ្នកបន្ត វេន អោយមានការចូលរួមដោយស្មារតីស្រឡាញ់សិល្បៈវប្បធម៌ជាតិខ្លួនទាំងវ័យកុមារ រហូតដល់យុវវ័យ ដើម្បីធ្វើអោយសិល្បៈវប្បធម៌យើងមាននិរន្តភាពក្នុងផ្នត់គំនិតយុវជន និងមហាជនគ្រប់លំដាប់ថ្នាក់ក្នុងន័យ (អប់រំដើម្បីវប្បធម៌) និង (វប្បធម៌ដើម្បីអប់រំ) ៕