រាជធានីភ្នំពេញ ៖ កម្លាំងនគរបាលអន្តោប្រវេសន៍ បានឃាត់ខ្លួនជនជាតិចិន ប្រមាណ១០០នាក់ ក្នុងនោះមានស្រី១៩នាក់ ពាក់ព័ន្ធជម្រិតទារប្រាក់ពីជនជាតិចិន លើរូបភាពផ្សេងៗគ្នា នៅក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ កាលពីម្សិលមិញ។
លោក អ៊ុក ហៃសិលា ប្រធាននាយកដ្ឋាន ស៊ើបអង្កេត នៃអគ្គនាយក ដ្ឋាន អន្តោប្រវេសន៍បានប្រាប់បណ្តាញសារព័ត៌មានថា ប្រតិបត្តិការនោះធ្វើឡើង ដោយមានការផ្តល់គោលដៅនិង ទីតាំងច្បាស់លាស់ តាមប្រព័ន្ធ VOIP ពីអាជ្ញាធរប្រទេសចិន ទើបសមត្ថកិច្ចកម្ពុជាចុះស្រាវជ្រាវ និងឈានដល់ការ ឃាត់ខ្លួនក្រុមជនជាតិចិននេះតែម្ដង។
លោក អ៊ុក ហៃសិលា បានបញ្ជាក់ថា ល្បិចបោកបញ្ឆោតនេះ គឺពួកគេប្រើភាពជាស្រីស្អាត ដើម្បីទាក់ទង មន្ត្រីរាជការ សិល្បៈករ ដែលជាជនជាតិ ជាលក្ខណៈស្នេហា នៅពេលមានទំនាក់ទំទង ស៊ីជម្រៅ ពួកគេបានកាត់ត រូបភាពទាក់ទងរឿង លួចលាក់ប្រពន្ធកូនដើម្បីជម្រិតទារប្រាក់ បើមិនឲ្យនោះទេ ពួកគេនិងបង្ហោះរូបភាពទាំងអស់ នៅលើបណ្តាញសង្គម ។
ដោយឡែក មួយចំនួន ដែលយើងបានបង្ក្រាបនៅថ្ងៃនេះគឺ ពួកគេបានបោកប្រាស់ ជាលក្ខណៈលក់ ដូរផលិតផល ដោយតម្រូវឲ្យអតិថិជន ត្រូវបង់លុយជាមុន តែជាលទ្ធផល មិនបានបញ្ចូន ផលិតផលទៅឲ្យអតិថិជននោះទេ។ លោកថា ក្រុមអ្នកបោកប្រាស់មានគ្នាតិច ត្រឹមតែ៣ទៅ៤នាក់ អាចបោកក្នុងមួយថ្ងៃបានប្រាក់ចាប់ពី១ទៅ២ម៉ឺនដុល្លារ ហើយក្នុងមួយសប្តាហ៍ ពួកគេបោកបាន ៦ម៉ឺនដុល្លារសហរដ្ឋអាមេរិកឯណោះ ៕
