ក្រចេះ ៖ បន្ទាប់ពីរមានហេតុការណ៍នៃការប៉ះទង្កិចគ្នារវាងសមត្ថកិច្ច និងប្រជាពលរដ្ឋដែលបានមកធ្វើការតវាបិតផ្លូវជាតិ ស្ថិតនៅក្នុងភូមិជើងឃ្លេ ឃុំ2ធ្នូ ស្រុកស្នួល ខេត្តក្រចេះ កាលពីថ្ងៃទី08 ខែមីនា ឆ្នាំ2018 រួចមក មានបណ្តាញព័ត៌មានមួយចំនួនបានធ្វើការផ្សព្វផ្សាយថា មានមនុស្សស្លាប់ចំនួន 06នាក់ និងរបួសចំនួន ជាង40នាក់ ពិសេសការផ្សព្វផ្សាយរបស់វិទ្យុអាស៊ីសេរី ដែលបានធ្វើបទសម្ភាសន៍ជាមួយស្ត្រីម្នាក់ដែលមានឈ្មោះថា ទិន សុភក្រ័ ឬ ទិន ភ័ក្រ ។
បន្ទាប់ពីរបានទទួលព័ត៌មានខាងលើនេះ អយ្យការអមសាលាដំបូងខេត្តក្រចេះ ដោយសហការជាមួយនឹងមន្ត្រីនគរបាលយុត្តិធម៍ និងអាជ្ញាធរគ្រប់ជាន់ថ្នាក់ បើកការស្រាវជ្រាវ ដើម្បីស្វែងរកការពិត ថាតើមានករណីមនុស្សស្លាប់ដូចសេចក្តីរាយការណ៍ខាងលើដែរឬទេ
ក្រោយពីការសើបអង្កេត និងស្រាវជ្រាវ ដោយហ្មត់ចត់រួចមក អាជ្ញាធរមានសមត្ថកិច្ចពុំបានរកឃើញមានករណីបាត់បង់ជីវិតមនុស្ស ដូចដែលបណ្តាញសារព័ត៌មួយចំនួនតូច ធ្វើការផ្សព្វផ្សាយព័ត៌មានបំផ្លើសនោះឡើយ ។ទន្ទឹមនេះ អយ្យការអមសាលាដំបូងខេត្តក្រចេះ ក៏បានជួបជាមួយលោកស្រី ទិន សុភ័ក្រ ឬ ទិន ភ័ក្រ ដែលបានផ្តល់បទសម្ភាសន៍ ដល់វិទ្យុអាស៊ីសេរី កាលពីរយប់ថ្ងៃទី 08 ខែមីនា ឆ្នាំ 2018 ហើយបានរៀបរាប់អំពីរករណីមនុស្សស្លាប់ចំនួន 06នាក់ និងរបួសចំនួនជាង 40 នាក់ផងដែរ ។
លោកស្រី ទិន សុភ័ក្រ ឬ ទិន ភ័ក្រ បានបញ្ចាក់យ៉ាងច្បាស់នៅចំពោះមុខព្រះរាជអាជ្ញា អមសាលាដំបូងខេត្តក្រចេះ ថាបទសម្ភាសន៍ដែលគាត់ផ្តល់ឲ្យវិទ្យុអាស៊ីសេរី កាលពីរថ្ងៃទី 08 .ខែ .មីនា ឆ្នាំ2018 ថាមានមនុស្សស្លាប់ចំនួន 06 នាក់ និង របួសជាង40នាក់គឺជាព័ត៌មានមិនពិត ព្រោះគាត់ជឿតាមការញុះញង់ពីរសំណាក់ឈ្មោះ អេង និងបុគ្គលពាក់ព័ន្ធមួយចំនួនទៀត ដោយបុគ្គល់ទាំងនោះសន្យាថានិងដោះស្រាយដីធ្លីជូនគាត់ ។ លោកស្រី ទិន សុភ័ក្រ ឬ ទិន ភ័ក្រ មានការសោកស្តាយយ៉ាងខ្លាំងចំពោះកំហុសដែលខ្លួនបាននិយាយខុសពីរការពិតប្រាប់ដល់វិទ្យុអាស៊ីសេរីកាលពីរថ្ងៃទី 08 មីនា ឆ្នាំ2018 ព្រោះការពិតក្នុងហេតុការណ៍នោះ លោកស្រីទទួលស្គាល់ថា ពុំមានមនុស្សស្លាប់នោះទេ ។ ចំពោះការសម្ភាសន៍ជាមួយវិទ្យុអាស៊ីសេរី គឺឈ្មោះ អេង ជាអ្នករៀបចំ និងជាអ្នកឲ្យលេខទូរស័ព្ទទៅវិទ្យុអាស៊ីសេរី និងប្រាប់ពីអ្វីដែលត្រូវនិយាយ ។
ដើម្បីឲ្យសាធារណជនជ្រាបច្បាស់អំពីរដំណើររឿងនេះ និងដើម្បីជៀសវាងការភ័ន្តច្រឡំដែលកើតចេញពីរការផ្សាយព័ត៌មានរបស់វិទ្យុអាស៊ីសេរី ជាពិសេសក្នុងបទសម្ភាសន៍ របស់លោកស្រី ទិន សុភ័ក្រ ជាមួយវិទ្យុអាស៊ីសេរី អយ្យការអមសាលាដំបូងខេត្តក្រចេះ សូមផ្តល់ជូនឯកសារមួយចំនួន ដែលជាលទ្ធផលនៃការស្រាវជ្រាវរបស់អយ្យការអមសាលាដំបូងខេត្តក្រចេះ និអាជ្ញាធរមានសមត្ថកិច្ច ជូនដល់អ្នកសារព័ត៌មាន និងសារធារណជនដើម្បីជូនជ្រាប ។ ដោយ ម៉ែន បូរិទ្ធ
