ខេត្តពោធិ៍សាត់ ៖នៅអាណាចក្រខេត្តពោថិសាត់ ឧកញ៉ា តាំង អៀង ត្រូវបានគេរាយការណ៍ថាជាមេក្លោងក្នុងការកេណ្ឌប្រមូលប្រជាពលរដ្ឋ ចូលកាប់បំផ្លាញព្រៃឈើនៅក្នុងស្រុកភ្នំក្រវាញ់ និងស្រុកវាលវែង ខេត្តពោធិ៍សាត់ ។ ក្នុងនោះ មានទាំងការប្រើកម្មករសម្រាប់ផ្តល់ទីតាំងតំបន់មានឈើធំៗ ប្រើគ្រឿងចក្រ ប្រើត្រង់សឺន័រ ឬរណាយន្តដើម្បីជាមធ្យោបាយអារផ្តួលរំលំ រួចត្រូវបានដឹកជញ្ជូនឈើទាំងនោះចេញពីក្នុងព្រៃតាមរយៈរថយន្តបាកុងកែច្នៃក្នុ ។ ដោយសារភ្នំខ្ពស់មានចម្រាលចោតយ៉ាងតិចមានគ្រឿងចក្រអេស្កាវ៉ាទ័រ៤គ្រឿងសម្រាប់ប្រើប្រាស់ កាយ ឈូសឆាយផ្លូវ និងរុញឈើផ្តួលសម្រាប់ជាផ្លូវដឹកឈើចេញពីក្នុងព្រៃ ក៏ដូចជាចូលទៅកាប់ផ្តួលរំលំឈើនេះជាដើម ។
តាមប្រភពគួរឲ្យទុកចិត្តបានឲ្យដឹងថា៖ យ៉ាងតិចមានឈើរាជ្យកុលធំៗប្រមាណជា៥ពាន់កំណាត់ត្រូវបានអារផ្តួលរំលំនៅក្នុងព្រៃស្រុកភ្នំក្រវាញ់ និងស្រុកវាលវែង ខេត្តពោធិ៍សាត់ មិនទាន់បានច្រៀងជាឡាំងដើម្បីដឹកជញ្ជូនដូចសព្វដងយកមកកាន់ចំណុចអន្លង់រាប ចម្ការកៅស៊ូក្រុមហ៊ុន MDS របស់ឧកញ៉ាទ្រីភាព និងមកកាន់តំបន់ដំណាក់ចៅក្រម បន្ទាប់ពីសកម្មភាពដឹកឈើរាជ្យកុល និងឈើធ្នង់ដោយប្រើរថយន្តយីឌុបធ្វើជាមធ្យោបាយដឹកជញ្ជូន ត្រូវបានបែកការណ៍ដល់ថ្នាក់លើថា សកម្មភាពរបស់ក្រុមឈ្មួញទាំងនេះ កាប់បំផ្លាញព្រៃឈើពីខាងក្រៅយកមកដាក់ក្នុងក្រុមហ៊ុនដើម្បីកាត់ប៉េសេស្របច្បាប់នាំចេញ ។
ឧកញ៉ា តាំង អៀង មានប្អូនប្រុស ឈ្មោះ ទីជាអ្នក គ្រប់គ្រងទីតាំងឃ្លាំងស្តុកឈើនៅចំណុចចម្ការកៅស៊ូក្រុមហ៊ុន MDS របស់ឧកញ៉ាទ្រីភាពនៅ ឃុំអន្លង់រាប ស្រុកវាលវែង ខេត្តពោធិ៍សាត់ពេល ដែលដៃជើងរបស់ខ្លួនដឹកជញ្ជូនមកចូលឃ្លាំងនៅពេលយប់ និងសម្រាប់លើកឈើដាក់ឡានយីឌុប កាត់ប៉េសេនាំចេញមកកាន់រាជធានីភ្នំពេញ ។ ពេលខ្លះឈើទាំងនោះដឹកចេញពីស្រុកវាលវែង មកចូលផែស្ងួតត្មាតពង អាចនាំទៅវៀតណាម ឬប្រទេសចិន ដោយគ្រាន់តែប្រើរូបភាពឃុបឃិតគ្នាជាមួយគយ ឬសមត្ថកិច្ចពាក់ព័ន្ធនៅច្រក កាប់សៀល ធ្វើដូចជាទំនិញសម្លៀកបំពាក់នាំចេញ ទោះជាត្រូវឆ្លងកាត់ការស្កេន ក៏ដោយក៏ការដឹកជញ្ជូនឈើនេះគ្មានបញ្ហាព្រោះជាអំពើពុករលួយជាលក្ខណៈប្រព័ន្ធ ។ ករណីខ្លះទៀត ឈើធ្នង់ ឈើរាជ្យកុល ដែលដឹកជញ្ជូនចេញពីអន្លង់រាប ក៏មានឆ្លងទៅប្រទេសវៀតណាមតាមច្រកខេត្តតាកែវ និងខេត្តកំពតជាដើម ។
ក្រៅពីឈ្មួញ ទី ដែលត្រូវជាប្អូនឧកញ៉ា តាំង អៀង ក៏បានប្រើមនុស្សជាច្រើននាក់ ដូចជាឈ្មោះ លឹម ឈ្មោះហួរ ជាអ្នកគ្រប់គ្រងឈើដែលប្រមូលពីក្នុងព្រៃយកមកដាក់នៅចំណុចដំណាក់ចៅក្រម ហើយឈើទាំងនោះ ច្រើនដឹកជញ្ជូនចេញពីតំបន់ រវាង ប្រមោយ ក្នុងស្រុកភ្នំក្រវាញ់ ។ ថ្មីៗនេះ ក្រុមរបស់ឈ្មួញ ក៏បានដម្លើងរ៉ៃបន្ថែមទៀតនៅចំណុចរវាង ដើម្បីអារឈើក្រហមបន្ថែមទៀត ក្រៅពីឈើរាជ្យកុល និងឈើធ្នង់ ។ ដោយឡែក ឈើរាជ្យកុល ត្រូវបានគេអារផ្តួលរំលំនៅចំណុចតំបន់អូរលាក់មាស តំបន់អូរពងពុង ក្នុងនោះ មានរថយន្តបាកុងកែច្នៃជាង៣០គ្រឿង ជាមួយនឹងគ្រឿងចក្រអេស្កាវ៉ាទ័រ៤គ្រឿង សម្រាប់ជាមធ្យោបាយអូសឈើ ធ្វើផ្លូវ និងដឹកឈើចេញពីព្រៃយ៉ាងអនាធិបតេយ្យ ។
ទីតាំងដែលត្រូវលើកឈើដាក់ឡានយីឌុប ក្រោមរូបភាពកាត់ប៉េសេ ទី១ នៅចំណុចផ្នែកខាងក្រោម គឺតំបន់ដំណាក់ចៅក្រម និងទី២ នៅអន្លង់រាប ។ទោះជាយ៉ាងណាក្រោយពីពតិមានឧក្រឹដ្ឋកម្មព្រៃឈើត្រូវបែកធ្លាយដល់កាសែតឧកញ៉ា តាំង អៀង បច្ចុប្បន្ន មិនត្រឹមតែមិនបានច្រៀកឈើរាជ្យកុល ដែលមានរាប់ពាន់កំណាត់នោះទេ សូម្បីតែឈើរាជ្យកុល ដែលបានដឹកជញ្ជូនយកមកដាក់នៅចម្ការកៅស៊ូឧកញ៉ាទ្រី ភាពក្រុមហ៊ុន MDS ប្រមាណជាង៣០០ម៉ែត្រគូប ក៏ផ្អាកដំណើរការកាត់ប៉េសេនាំចេញផងដែរ។
រយៈពេលមួយសប្តាហ៍នេះ ទាំងការដឹកជញ្ជូនចូល និងការដឹកនាំចេញ ត្រូវបានផ្អាកមួយរយៈ ដើម្បីបន្តរត់ការជាមួយអាជ្ញាធរជំនាញពាក់ព័ន្ធសិន។ក្នុងនោះឈ្មោះ ចាន់ នី ដែលគេស្គាល់ថាជាសមត្ថកិច្ច និងមានតួនាទីជាអ្នកបង្ក្រាបបទល្មើសព្រៃឈើ ផងគឺ ជាមេក្លោងរត់ការដឹកជញ្ជូនបទល្មើសឈើទាំងឡាយយីឌុបៗក្នុងមួយថ្ងៃចាប់ពី១ឡានយីឌុបទៅ៣ឡានយីឌុបនោះ ។
ឧកញ៉ា តាំង អៀងត្រូវបានគេរាយការណ៍ថា បានទៅប្រទេសវៀតណាមប៉ុន្មានថ្ងៃជាប់ៗគ្នា ប្រយោជន៍យកលុយបន្តរត់ការដើម្បីនាំឈើរាជ្យកុលដែលបានផ្តួលរំលំរាប់ពាន់ដើមក្នុងព្រៃ ដឹកជញ្ជូនមកកាន់តំបន់អន្លង់រាប និងបន្តកាត់ប៉េសេស្របច្បាប់នាំចេញមកតំបន់កំពង់ផែត្មាតពង ។ ប៉ុន្តែមកទល់នឹងថ្ងៃព្រហស្បតិ៍ ៧រោច ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៨ ខែមីនា ឆ្នាំ២០១៨ គេពុំទាន់ឃើញឧកញ៉ា តាំង អៀង ចាត់ចែងដើម្បីនាំឈើនៅក្នុងឃ្លាំងចំណុចអន្លង់រាបនោះនៅឡើយទេ។តែប្រការគួកត់សម្គាល់គេមិនទាន់ឃើញមានសមត្តកិច្ចបង្ក្រាបមានវត្តមានចុះស្រាវជ្រាវបទល្មើសខាងលើនៅឡើយ។
គួររំលឹកថា កន្លងទៅឧកញ៉ាទ្រីភាព ម្ចាស់ក្រុមហ៊ុន MDS បានចេញសេចក្តីជូនដំណឹងរបស់ខ្លួនម្តងរួចមកហើយ ប៉ុន្មានជិតមួយឆ្នាំនេះ ដោយអះអាងថា ក្រុមហ៊ុន MDS មិនមានព្រៃសម្បទានទៀតទេនៅខេត្តពោធិ៍សាត់។ ប៉ុន្តែប្រមាណជាជាង២ខែនេះ បែរជាលេចមុខឧកញ៉ា តាំង អៀង ជាអ្នកប្រមូលឈើក្នុងស្រុកភ្នំក្រវាញ់ និងស្រុកវាលវែង ដឹកជញ្ជូនយកមកដាក់នៅក្នុងឃ្លាំងចម្ការកៅស៊ូកឧកញ៉ាក្រុមហ៊ុនទ្រីភាពយ៉ាងគគ្រឹកគគ្រេងរហូតដល់ប្រជាពលរដ្ឋដែលរស់នៅនឹងច្រកចូលក្រុមហ៊ុន MDS បានបញ្ជាក់ថា ជាទម្លាប់រៀងរាល់ម៉ោង១ឬម៉ោង២ទៅម៉ោង៣ទៀបភ្លឺ គេតែងតែឃើញរថយន្តបាកុង ដឹកឈើធ្នង់ និងឈើរាជ្យកុល ក្នុងមួយឡានយ៉ាងតិចពី៥ទៅ៦ម៉ែត្រគូប ដឹកចូលឃ្លាំងតំបន់អន្លង់រាប ដែលមានចម្ងាយដីមិនដល់៥០០ម៉ែត្រចុះពីផ្លូវជាតិ នៃទីប្រជុំជនស្រុកវាលវែងទៅវីញ?! ៕
