រាជធានីភ្នំពេញ ៖ នាយកដ្ឋានប្រយុទ្ធប្រឆាំង នឹងជំងឺឆ្លង (CDC) នៃក្រសួងសុខាភិបាល បានបង្ហាញតួលេខទាក់ទង នឹងករណីពុលស្រា ជាពិសេសស្រាស ដោយក្នុងរយៈពេលប្រមាណ៣ឆ្នាំ គឺចន្លោះពីឆ្នាំ២០១៥ ដល់ឆ្នាំ២០១៧ មានពលរដ្ឋខ្មែរប្រមាណ៥០នាក់បានស្លាប់ដោយសារតែពុលស្រា។
យោងតាមទិន្នន័យដែលបង្ហាញដោយនាយកដ្ឋានប្រយុទ្ធ នឹងជំងឺឆ្លង (CDC) បានឲ្យដឹងថា ករណីពុលស្រាកាលពីឆ្នាំ២០១៥ មានចំនួន ២៨៤ ករណី ដែលបណ្តាលឲ្យស្លាប់ ៣៣នាក់ , ដែលករណីទាំងនោះ បានកើតនៅខេត្តត្បូងឃ្មុំ ក្រចេះ និងមណ្ឌលគិរី។ ចំណែកនៅឆ្នាំ២០១៦ ករណីពុលស្រាបានថយចុះ មក ៩២ករណី ក្នុងនោះអ្នកផឹក១៥នាក់បានស្លាប់។ ករណីនេះបានកើតឡើងនៅក្នុងខេត្តកំពង់ឆ្នាំង។
ដោយឡែកក្នុងឆ្នាំ២០១៧ អ្នកពុលស្រា បានថយចុះមកត្រឹមតែ១៣ករណីប៉ុណ្ណោះ ហើយស្លាប់ ២នាក់ នៅខេត្តមណ្ឌលគិរី។ យ៉ាងណាក៏ដោយ ជាមួយគ្នានាយកដ្ឋានប្រយុទ្ធប្រឆាំង នឹងជម្ងឺឆ្លង រំពឹងថា ក្នុងពិធីបុណ្យចូលឆ្នាំថ្មី និងពិធីផ្សេងៗទៀតដែលនឹងឈានចូលមកដល់ពេលឆាប់ៗនេះ ប្រជាពលរដ្ឋទាំងអស់ នឹងមានការប្រុងប្រយ័ត្នក្នុងការទិញ ស្រាមកពិសារ ក្នុងនោះដែរត្រូវទិញស្រាមានប្រភពច្បាស់លាស់ ដែលមានការត្រួតពិនិត្យត្រឹមត្រូវពីមន្ត្រីជំនាញ៕