រាជធានីភ្នំពេញ ៖ ខណៈដែលកាសែតក្នុងស្រុក រួមទាំងកាសែតបរទេសមួយចំនួន បានចុះផ្សាយថា នឹងមានការចរចាមួយ រវាងសម្តេចនាយករដ្ឋមន្ត្រីកម្ពុជា និងមេបក្សប្រឆាំង( លោក សម រង្ស៊ី ) អំឡុងពេលដែលសម្តេច ហ៊ុន សែន អញ្ជើញទៅចូលរួមកិច្ចប្រជុំនៅប្រទេសអូស្ត្រាលី នៅសប្តាហ៍ក្រោយនោះ ប៉ុន្តែសម្តេច ហ៊ុន សែន បានប្រកាសដាច់ណាត់ថា គ្មានការចរចាណាមួយជា មួយមេបក្សប្រឆាំងនោះទេ…កុំសង្ឃឹមឲ្យសោះ ។
សម្តេចនាយករដ្ឋមន្ត្រី បញ្ជាក់ថា សម្តេចអញ្ជើញទៅប្រទេសអូស្ត្រាលី ដើម្បីចូលរួម កិច្ចប្រជុំកំពូលអាស៊ាន-អូស្ត្រាលី មិនមែនទៅចរចាជាមួយអតីតមេដឹកនាំបក្សប្រឆាំង ដែលមាន ទោសក្បត់ជាតិ និង ដែលត្រូវបានកាត់សិទ្ធិធ្វើនយោបាយនោះឡើយ។
ប៉ុន្តែសម្តេចថ្លែងថា បេះដូងសម្តេចពេញមួយជីវិតពោពេញដោយការចរចា សម្តេចយក ការចរចាច្រើនជាងចម្បាំង ប៉ុន្តែសម្តេចមិនចរចាជាមួយមនុស្សក្បត់ជាតិ ( សម រង្ស៊ី ) នោះឡើយ ។
សម្តេចបានបន្ថែមថា កុំសង្ឃឹមថា មានកិច្ចព្រមព្រៀងទីក្រុងប៉ារីសលើកទី២ឲ្យសោះ ព្រោះថា កិច្ចព្រមព្រៀងប៉ារីសបានស្លាប់ហើយ នៅពេលដែលរដ្ឋធម្មនុញ្ញ នៃព្រះរាជាណាចក្រកម្ពុជា បាន កើតចេញជារូបរាង នាថ្ងៃទី២៤ ខែកញ្ញា ឆ្នាំ១៩៩៤ ។
សម្តេចថា អតីតមេបក្សប្រឆាំងធ្វើសកម្មភាពកាន់តែច្រើននៅបរទេសការមានទោសក៏កាន់តែច្រើន ហើយក្នុងនោះអតីតមេបក្សប្រឆាំងកំពុងជាប់ពន្ធនាគារក៏កំសង្ឃឹមថា នឹងមានការលើកលែងទោសឲ្យសោះគ្មានថ្ងៃមានសេរីភាពនោះទេ ៕
