រាជធានីភ្នំពេញ ៖ ២ខែដំបូងឆ្នាំ២០១៨នេះក្រុមប្រឹក្សាអភិវឌ្ឍន៍កម្ពុជា CDC ប្រទេសកម្ពុជាបានអនុម័តទៅលើគម្រោងវិនិយោគបង្កើតរោងចក្រឧស្សាហកម្មចំនួន២៥ក្រុមហ៊ុនជាមួយទុនវិនិយោគចុះបញ្ជីសរុបប្រមាណ២៥៧លានដុល្លារអាមេរិក និងបង្កើតការងារជិត១ម៉ឺន៧ពាន់កន្លែង ដែលក្នុងនោះជិតពាក់កណ្តាលនៃក្រុមហ៊ុនទាំងនោះ គឺវិនិយោគលើការបង្កើតរោងចក្របម្រើក្នុងឧស្សាហកម្មវាយនភណ្ឌកាត់ដេរ។ នេះបើយោងតាមរបាយការណ៍របស់ CDC។
របាយការណ៍ដដែលបង្ហាញទៀតថា គម្រោងវិនិយោគផ្នែកឧស្សាហកម្មវាយនភណ្ឌកាត់ដេរសម្លៀកបំពាក់ ស្បែកជើង និងកាបូប មានចំនួន ១០រោងចក្រ ដែលមានតម្លៃទុនសរុបប្រមាណ ៥៦ លានដុល្លារ ដែលទីតាំងរោងចក្រទាំងនេះភាគច្រើននៅរាជធានីភ្នំពេញ ខេត្តកណ្តាល កំពង់ស្ពឺ និងខេត្តព្រះសីហនុ។ ជាងទៀតក៏មានគម្រោងវិនិយោគធំៗមួយចំនួនដូចជា ការបង្កើតរោងចក្រផលិតស៊ីម៉ងត៍ តម្លៃទុន២០លានដុល្លារ (ទុនចុះបញ្ជី) នៅខេត្តព្រះសីហនុ, រោងចក្រផលិតស្ពាន់ សារធាតុណំណ ស័ង្កសី និងអាស៊ីតស៊ុលផួរិច តម្លៃទុន ៣០លានដុល្លារ នៅខេត្តព្រះសីហនុ គម្រោងវិនិយោគរោងម៉ាស៊ីនកិនស្រូវ និងកែច្នៃអង្ករ តម្លៃទុន ៤៣,៣១លានដុល្លារ នៅខេត្តកំពង់ធំ និងរោងចក្រអគ្គិសនីដោយប្រើថាមពលធ្យូងថ្មី អានុភាព ១០០មេហ្គាវ៉ាត់ តម្លៃទុន ៤១,១៩លានដុល្លារ នៅខេត្តព្រះសីហនុ។
ជាមួយគ្នានេះ ក៏មានគម្រោងវិនិយោគមជ្ឈមណ្ឌលពាណិជ្ជកម្មចំនួនពីរផងដែរ នៅរាជធានីភ្នំពេញ និងខេត្តសៀមរាប ដែលមានតម្លៃទុន១០លានដុល្លារ និងជិត ២០លានដុល្លារ ព្រមទាំងគម្រោងបង្កើតរោងចក្រផ្សេងទៀត នៅក្នុងវិស័យម្ហូបអាហារ គ្រឿងបង្គុំអេឡិចត្រូនិក និង ការកែច្នៃទំនិញប្រើប្រាស់ជាដើម។
សូមជម្រាបថា ក្រុមប្រឹក្សាអភិវឌ្ឍន៍កម្ពុជា (CDC) កាលពីឆ្នាំ ២០១៧ កន្លងទៅ បានអនុម័តលើគម្រោងវិនិយោគទាំងក្នុងស្រុក និងបរទេស មានតម្លៃទុនទឹកប្រាក់សរុបប្រមាណ ៦,៣ពាន់លានដុល្លារកើនឡើង ៧៥ភាគរយ ពី ៣,៦ពាន់លានដុល្លារ បើធៀបកាលពីឆ្នាំ ២០១៦៕