មណ្ឌលគិរី៖ ដោយមានការអនុញ្ញាតពីលោក សាន សុភៈ ព្រះរាជអាជ្ញារងអមសាលាដំបូងខេត្តមណ្ឌលគិរី នៅរសៀលថ្ងៃទី០១ខែកុម្ភៈនេះ កម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តមណ្ឌលគិរី ដឹកនាំដោយលោកវរសេនីយ៍ឯក ម៉ី អាន ស្នងការរងខេត្តមណ្ឌលគិរី និងជាប្រធានការិយាល័យកណ្តាលប្រឆាំងបទល្មើស សហការជាមួយកម្លាំងអធិការរដ្ឋានក្រុងសែនមនោរម្យ ចុះត្រួតពិនិត្យការងាររដ្ឋបាលនៅផ្ទះសំណាក់ម៉ារីសំណាង ស្ថិតនៅក្នុងភូមិកណ្តាល សង្កាត់ស្ពានមានជ័យ ក្រុងសែនមនោរម្យ បានធ្វើការឃាត់ខ្លួនអ្នកសង្ស័យប្រើប្រាស់សារធាតុញៀន និងអ្នកជួញដូរសារធាតុញៀនខុសច្បាប់ចំនួន០៧នាក់។
ការចុះត្រួតពិនិត្យនេះ ចាប់ផ្តើមនៅវេលាម៉ោង៤រសៀល រហូតមកដល់វេម៉ោង៦នឹង៣០នាទីល្ងាច ទើបឃាត់ខ្លួនបានជនsសង្ស័យបានចំនួន០៧នាក់ ក្នុងនោះស្រីចំនួន៥នាក់ ប្រុសចំនួន០២នាក់ ។
លោកវរៈសេនីយ៍ឯក ម៉ី អាន ស្នងការរងនគរបាលខេត្តមណ្ឌលគិរីបានឲ្យដឹងថា ក្រោយពីមានការចង្អុលបង្ហាញពី លោកឧត្តមសេនីយ៍ត្រី តូច យ៉ុនស្នងការនគរបាលខេត្តមណ្ឌលគិរី លោកបានដឹកនាំកម្លាំងចុះត្រួតពិនិត្យ ដោយឃាត់បានជន
សង្ស័យជួញដូរ និងអ្នកប្រើប្រាស់សារធាតុញៀន រួចក៏បញ្ជូនមកស្នងការ នៃស្នងការរដ្ឋានខេត្តមណ្ឌលគិរី ដើម្បីសាកសួរ និងធ្វើតេស្តរកសារធាតុញៀនក្នុងទឹកម៉ូត្រ។ ក្រោយពីសាកសួរ និងធ្វើតេស្តអ្នកទាំង០៧អ្នកនោះពិតជាប្រើកប្រាស់សារធាតុញៀន និងជួញដូរសារធាតុញៀនមែន ។
លោក វរសេនីយទោ ឡរវ ប៉ុន នាយរងការិល័យប្រឆាំងគ្រឿងញៀនបានឲ្យដឹង អ្នកដែលប្រើប្រាស់សារធាតុញៀន ទី១ឈ្មោះ ធួក រដ្ឋា ភេទស្រី អាយុ២៤ឆ្នាំ ទី២ឈ្មោះ ភ័ក្រ លក្ខណា ភេទស្រី អាយុ២៩ឆ្នាំ ទី៣ឈ្មោះ ធឿន លីតា ភេទស្រី អាយុ២១ឆ្នាំ ទី៤ឈ្មោះ ណេង បារាំង ភេទប្រុស អាយុ២០ឆ្នាំ ទី៥ឈ្មោះ ហែម ស្រីពៅ ភេទស្រី អាយុ២៣ឆ្នាំ ចំណែកអ្នកជួញដូរទី១ឈ្មោះ រឿន ប៊ុនថាន់ ភេទប្រុស អាយុ៣១ឆ្នាំ ទី២ឈ្មោះ ប្រុស សុខលាភ ភេទស្រី ២៨ឆ្នាំ ។
បច្ចុប្បន្ននេះ អ្នកទាំង០៧នាក់ខាងលើនេះ ត្រូវបានកម្លាំងការិយាល័យប្រឆាំងគ្រឿងញៀន កសាងសំណុំរឿងបញ្ជូនទៅសាលាដំដូងខេត្ត ចាត់ការទៅតាមនិតិវិធីច្បាប់ ៕
ហ៊ិន សុគន់