ក្រចេះ៖ នាព្រឹកថ្ងៃទី០៣ ខែមិនា ឆ្នាំ២០១៨ ឯកឧត្តម ហ៊ុន ម៉ាណែត តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អញ្ជើញកាត់ខ្សែបូរណ៍សម្ពោធដាក់ឲ្យប្រើប្រាស់ជាផ្លូវការនូវកុដិ ខ្លោងទ្វារ ពុទ្ធាភិសេត និងសមិទ្ធផលនានាក្នុងវត្តរដ្ឋបាលារាម ហៅវត្តបច្ឆា និងជួបសំណេះសំណាលជាមួយប្រជាពលរដ្ឋ សិស្សានុសិស្ស លោកគ្រូ អ្នកគ្រូ និងមន្ត្រីរាជការគ្រប់មន្ទីរស្ថាប័ន សរុបប្រមាណជាង ១ពាន់នាក់ ឋិតនៅក្នុងក្រុងក្រចេះ ខេត្តក្រចេះ ។
យោងតាមរបាយការណ៍របស់គណៈកម្មកាវត្ត បានឲ្យដឹងថា ការសាងសងសមិទ្ធផលនានាក្នុងវត្តរដ្ឋបាលារាម ហៅវត្តបច្ឆា បានចាប់ផ្ដើមតាំពីឆ្នាំ២០១៣ រហូតដល់ឆ្នាំ២០១៨ រួមមាន កុដិ២ជាន់ ១៥បន្ទុប់ ខ្លោងទ្វារ ពុទ្ធាភិសេត និងសមិទ្ធផលនានាជាច្រើនទៀត ចំណាយថវិកាសរុបអស់ចំនួន ១,១៨៥,២៤០,០០០រៀល ក្នុងនោះនៅជំពាក់លុយជាង ផ្នែកជួយជុលដំបូលកុដិ ៧២០០ដុល្លា ។
ដើមឡើយវត្តនេះ មានឈ្មោះហៅថា វត្តប៉ាឆា ឬវត្តរដ្ឋបាលារាម ត្រូវបានកសាងឡើងតាំងពីឆ្នាំ១៨២៩ ដោយលោកយាយឈ្មោះ ឈាង គឹម ដែលត្រូវជាជីដូនរបស់ឯកឧត្តម អ៊ឹម ឈុនលឹម ។ លុះដល់សម័យសង្គ្រាម ឆ្នាំ១៩៧៥ ដល់១៩៧៩ ឋិតក្នុងសម័យរបបប្រល័យពូជសាសន៍ ប៉ុល ពត ទីតាំងអារាមមួយនេះ ត្រូវបានគេយកធ្វើជាកន្លែងដាក់សម្ភារៈ ត្រាក់ទ័រ និងរថយន្តគ្រប់ប្រភេទ ។ នៅក្រោយថ្ងៃរំដោះជ័យជំនៈ ៧ មករា ១៩៧៩ វត្តនេះ ត្រូវបានចាប់ផ្ដើមកសាងឡើងវិញទាំងស្រុង ក្រោមការដឹកនាំរបស់ព្រះគ្រូ ឯក រឹទ្ធ ចៅអធិការវត្តជំនាន់ទី៣ និងបានខិតខំស្វែងរកបច្ច័យកសាងពីសប្បុរសជនជិតឆ្ងាយ ព្រមទាំងសម្រេចបានសមិទ្ធផលជាច្រើនតម្កល់ទុកក្នុងវិស័យព្រះពុទ្ធសាសនា ដើម្បីប្រជាពលរដ្ឋគោរពបូជាដល់សព្វថ្ងៃ ។
ថ្លែងនៅក្នុងពិធីនេះឯកឧត្តម ហ៊ុន ម៉ាណែត បានមានប្រសាសន៍ថា កាលពីអតីតកាល ប្រទេសជាតិយើង ស្ថិតនៅក្នុងសង្គ្រាម ទាំងព្រះសង្ឃ ទាំងប្រជាពលរដ្ឋ គ្មានសិទ្ធិសេរីភាព គោរពប្រតិបត្តិសាសនាអ្វី ទាំងអស់ ប៉ុន្តែនាពេលបច្ចុប្បន្ន ព្រះសង្ឃ និងប្រជាពលរដ្ឋ មានសិទ្ធិសេរីភាពឱកាសគោរព ប្រតិបត្តិសាសនា ផ្សេងៗមានឱកាស ទទួលបានការអប់រំ ការកសាងអំពើល្អ ថែរក្សាវប្បធម៌ និងអត្តសញ្ញាណជាតិ។
ឯកឧត្តមបន្តទៀតថា ការដែលយើងបានកសាង សមិទ្ធផលទាំងនេះ គឺកើតមកពីទឹកចិត្តចូលរួម ពីប្រជាពលរដ្ឋ សប្បុរសជន ជាមួយរាជរដ្ឋាភិបាល ដើម្បីអភិវឌ្ឍន៍ប្រទេស និងដើម្បីប្រជាជនរស់នៅ ក្នុងសន្តិភាព សេរីភាពសីលធម៌ គុណធម៌ គោរពប្រតិបត្តិ នៅក្នុងវិស័យពុទ្ធចក្រនិងអាណាចក្រ។
ឯកឧត្តម ហ៊ុន ម៉ាណែត បានគូសបញ្ជាក់ថា យើងមានអ្វីៗដូចសព្វថ្ងៃនេះ គឺដោយសារសុខសន្តិភាព ដែលយើងរក្សាបាន សិទ្ធិសេរីភាព ដែលយើងមាន យើងមានប្រមុខរាជរដ្ឋាភិបាល ដែលបានបង្រួបបង្រួមជាតិ ដឹកនាំប្រទេស មានការអភិវឌ្ឍ និងមានការចូលរួម មេដឹកនាំត្រឹមត្រូវ និងចូលរួមអភិវឌ្ឍប្រទេស ព្រោះការអភិវឌ្ឍនេះ គ្មានចង់បានអ្វីក្រៅ ពីចង់ឃើញប្រជាពលរដ្ឋ មានជីវភាពមានបាន។
ដោយរាជរដ្ឋាភិបាល បានខិតខំធ្វើច្រើន ហើយប្រជាពលរដ្ឋ មានចិត្តចូលរួមធ្វើ ទោះបានតិចបានច្រើន ល្អជាជាងអ្នកមិនដែល ធ្វើអ្វីសោះចាំតែរិះគន់។ ការដឹកនាំរបស់របស់ សម្តេចតេជោ ហ៊ុន សែន និងការខិតខំរបស់ អាជ្ញាធរគ្រប់លំដាប់ថ្នាក់ បានខិតខំបម្រើ ប្រជាពលរដ្ឋរស់នៅក្នុងសន្តិភាព និងជីវភាពធូរធារ។ ដូច្នេះយើងគួរផ្តល់តម្លៃ និងលទ្ធផលដល់អ្នកដែលខិតខំធ្វើ ដើម្បីប្រជាពលរដ្ឋ។
ជាទីបញ្ចប់ឯកឧត្តមក៏សូមថ្លែងអំណរគុណ ប្រជាពលរដ្ឋ ដែលបានជ្រើសរើស គាំទ្រនិងជឿទុកចិត្ត ការដឹកនាំរបស់ សម្តេចតេជោ ហ៊ុន សែន ដែលខិតខំធ្វើគ្រប់បែបយ៉ាង ដើម្បីប្រជាពលរដ្ឋ លើកស្ទួយកម្រិតជីវភាព មន្ត្រីរាជការ ហើយយើងទាំងអស់គ្នា មានសេរីភាព រស់នៅក្នុងសុខសន្តិភាព៕
ដោយ កិះ ខន
