រាជធានីភ្នំពេញ ៖ នៅព្រឹកថ្ងៃទី២៦ ខែកុម្ភៈនេះ ប្រជាពលរដ្ឋប្រមាណជាង៥០នាក់តំណាង៥៦គ្រួសារ រស់នៅភូមិដូនអុក សង្កាត់ត្រពាំងក្រសាំង ខណ្ឌពោធិសែនជ័យ បាននាំគ្នាមកតវ៉ាសុំអន្តរាគមន៍ពីក្រសួងដែនដី នគរូបនីយកម្ម និងសំណង់ជួយអន្តរាគមន៍ករណីសមាគមចិន ហុក គៀនយកដីម៉ុងខ្មោច (ដីខ្ចីប្រជាពលរដ្ឋយកកប់ខ្មោច) ទៅលក់ឲ្យអ្នកផ្សេង។
ប្រជាពលរដ្ឋបានបញ្ជាក់ថា ដីរួមភូមិព្រៃដូនអុកទំហំជាង១៨ហិកតា ជាដីរួមរបស់ប្រជាពលរដ្ឋភូមិព្រៃដូនអុក មិនមែនជាដីរបស់សមាគមចិន ហុក គៀន ទេ។ ជាមួយគ្នានេះប្រជាពលរដ្ឋសូមឲ្យរដ្ឋមន្ត្រីក្រសួងដែនដី នគរូបនីយកម្ម និងសំណង់ ជួយអន្តរាគមន៍ទប់ស្កាត់ការចេញប័ណ្ណកម្មសិទ្ធិទៅឈ្មោះ សេង ស៊ីហេង និងសូមឲ្យឈ្មោះ សេង ស៊ីហេង បង្ហាញឯកសារភស្តុតាងមកធ្វើការដោះស្រាយជាមួយប្រជាពលរដ្ឋ។
បន្ទាប់ពីតវ៉ា ខាងក្រសួងបានហៅតំណាងប្រជាពរដ្ឋចូលជួប និងទទួលយកញ្ញត្តិដាក់ជូនរដ្ឋមន្ត្រីក្រសួងដែនដី នគរូបនីយកម្ម និងសំណង់៕