ក្រចេះ៖ កម្មការនីចំនួន២១នាក់ ក្នុងចំណោមស្ត្រីជាកម្មការនីជាច្រើននាក់ទៀត ដែលបានសំរាលកូននៅតាមមណ្ឌលសុខភាព មន្ទីរពេទ្យបង្អែកស្រុក ខេត្ត ត្រូវបាននឹងកំពុងយកចិត្តទុកដាក់ខ្ពស់ទាំងម្តាយនឹងទារកពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈក្រុមការងារបេឡាជាតិរបបសន្តិសុខសង្គម ហៅកាត់ថា បសស ។
លោក ហេ សុខសាយ ប្រធានការិយាល័យ បេឡាជាតិរបបសន្តិសុខសង្គម (បសស) បានអោយដឹងថា កម្មការនីសម្រាលកូន ដែលការិយាល័យ បសស សាខាខេត្តក្រចះទទួលបាន ចាប់ពី ម៉ោង 00 ថ្ងៃទី០១ ខែមករា ឆ្នាំ២០១៨ រហូតដល់ថ្ងៃទី២៦ ខែកុម្ភៈ ឆ្នាំ២០១៨នេះ មានចំនួន ២១នាក់ ចំនួកូន២១នាក់ ដែលកូន១នាក់ទទួលបាន៤០ម៉ឺនរៀល ។
ដោយលោកបានបញ្ជាក់ថា ប្រាក់ឧបត្ថម្ភនេះ ជាកញ្ចប់របស់រាជរដ្ឋាភិបាល ក្រោមអនុសាសន៍សម្តេចតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ហើយការងារនេះរដ្ឋាភិបាលប្រគល់អោយ បសស នៃក្រសួងការងារ ជាអ្នកអនុវត្តផ្ទាល់ ដោយមាន មូលដ្ឋានសុខាភិបាល ជាដៃគូ នៅទូទាំងប្រទេស ចាប់ពីមណ្ឌលសុខភាព រហូតដល់មន្ទីរពេទ្យថ្នាក់ជាតិ។
លោក បន្តថា ដើម្បីអោយការប្រពឹត្តទៅមានប្រសិទ្ធភាព បសស បានដាក់ភ្នាក់ងារនៅតាមមន្ទីរពេទ្យ និងមណ្ឌលសុខភាពមួយចំនួន ដើម្បីទទួលបានព័ត៌មានអំពីសមាជិក បសស ដែលទទួលគ្រោះថ្នាក់ ពិសេសស្ត្រីសម្រាលកូន ចំពោះមណ្ឌលសុខភាពដែលគ្មានភ្នាក់ងារបសស នឹងតែងតែតេសាកសួរជាប្រចាំអំពីសុខភាពមាតា និងទារក។
លោក ហេ សុខសាយ បានបន្ថែមទៀតថា ការងារនេះនឹងបន្តអនុវត្តធ្វើរហូតដាច់ឆ្នាំ ២០១៨ ។ ចំពោះការផ្ដល់ជូនសាច់ប្រាក់ ទៅលើកម្មការិនីសម្រាលកូន យើងធ្វើតាមប្រព័ន្ធអេស៊ីលីដា ឲ្យខាងភាគីសម្រាលកូបើកផ្ទាល់នៅធនាគារអេស៊ីលីដា។ ចំពោះស្ត្រីមានផ្ទៃពោះចាប់ពី 6ខែ អាចមកបំពេញទម្រង់ស្នើសុំប្រាក់ឧបត្ថម្ភ 40ម៉ឺនរៀលជាមុន ឬនៅពេលសម្រាល និងក្រោយពេលសំរាលរួចក៏បាន នៅតាមបណ្ដាការិយាល័យបេឡាជាតិរបបសន្តិសុខសង្គម តែកុំឲ្យលើសពីរយៈពេល ១ខែឡើងទៅ ។ ចាប់តាំងពីដាក់ទម្រង់ស្នើសុំ រយៈពេល ៣ថ្ងៃ ស្ត្រីសម្រាលកូនអាចទៅបើកលុយនៅធនាគារអេស៊ីលីដាបានធម្មតា។
គូសបញ្ជាក់ថា នេះជាការលើកកម្ពស់ការផ្តល់សេវាសុខាភិបាល ប្រកបដោយគុណភាពអោយកាន់តែប្រសើរឡើង ជូនដល់ប្រជាពលរដ្ឋ នៅតាមមណ្ឌលសុខភាព និងមន្ទីរពេទ្យបង្អែក ក្នុងការផ្តល់សេវាថែទាំ និងព្យាបាលជម្ងឺប្រកបដោយគុណភាព ស្រប តាមគោលការណ៍គោលន យោបាយអភិវឌ្ឍន៍ និងកំណែរទំរង់ប្រព័ន្ធថែទាំសុខភាពសង្គម ក្នុងក្របខ័ណ្ឌគោលនយោបាយជាតិគាំពារសង្គម២០១៦ដល់២០២៥ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។ ដោយ កិះខន