ក្រចេះ៖ នាព្រឹកថ្ងៃទី២៨ ខែមករា ឆ្នាំ២០១៦ នៅសាលាស្រុកស្នួល បានធ្វើពិធីប្រគល់ប័ណ្ណកម្មសិទ្ធិដីធ្លីជូនប្រជាពលរដ្ឋចំនួន ៤៦គ្រួសារ រស់នៅក្នុងភូមិគ្រង និងភូមិថ្ពង ឋិតនៅក្នុងឃុំស្នួល ស្រុកស្នួល ខេត្តក្រចេះ ក្រោមអធិបតីភាពលោក គង់ គឹមនីអភិបាលស្រុកស្នួលដោយមានការចូលរួមពីមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះព្រមទាំងប្រជាពលរដ្ឋជាច្រើនរូបទៀត។
អភិបាលស្រុកស្នួល លោក គង់ គឹមនី បានថ្លែងឲ្យដឹងថា ក្រោយពីមានការដោះស្រាយលើពាក្យបណ្ដឹងរបស់ប្រជាពលរដ្ឋស្របតាមនីតិវិធី ពោលគឺត្រូវប្រើរយៈពេលវែង ដោយសារគណៈគម្មធិការរដ្ឋបាល គណៈកម្មាធិការសុរិយោដីស្រុក និងគណកម្មាធិការសុរិយោដីខេត្ត ត្រូវចុះអនុវត្តនិងចេញប័ណ្ណកម្មសិទ្ធិនៅទីតាំងផ្សេងៗទៀតក្នុងស្រុក។ ដែលជាហេតុធ្វើឲ្យប្រជាពលរដ្ឋរស់នៅភូមិគ្រង និងភូមិថ្ពង ក្នុងឃុំស្នួល ស្រុកស្នួល មានការទន្ទឹមរងចាំអស់រយៈពេលយូរ តែងតែធ្វើការត្អូញត្អែរ សំដែងការខកចិត្ត និងមិនពេញចិត្តចំពោះអាជ្ញាធរ មន្ត្រីជំនាញ និងស្ថាប័ណ្ណពាក់ព័ន្ធ ដោយមានការយឺតយ៉ាវក្នុងការធ្វើប័ណ្ណកម្មសិទ្ធិដីធ្លីជូនពួកគាត់ រហូតដល់មានការប្រមូលផ្ដុំធ្វើការតវ៉ាទាមទារសំដែងមតិ នៅតាមដងផ្លូវសាធារណៈ សាលាស្រុក និងនៅរាជធានីភ្នំពេញ ដើម្បីសុំអន្តរាគមន៍ពីសម្ដេចតេជោ ហ៊ុន សែន។
លោក បានបន្តថា កាប្រគល់ប័ណ្ណកម្មសិទ្ធិជូនប្រជាពលរដ្ឋនៅឃុំស្នួលនាពេលនេះ គឺត្រូវបានធ្វើឡើងជាលើកទី ៣ហើយ បន្ទាប់ពីលើកទី១ គឺត្រូវបានធ្វើឡើងកាលពីថ្ងៃទី២០ ខែសីហា ឆ្នាំ២០១២ និងបានចេញប័ណ្ណកម្មសិទ្ធិលើក្បាលដីគ្មានការប្ដឹងតវ៉ាចំនួន ១.២៥៣ប័ណ្ណ ស្មើនឹង ៧៧៩គ្រួសារលើផ្ទៃដី ៣.៨៧៦ហិកតា។ លើកទី២ គឺត្រូវបានធ្វើឡើង កាលពីថ្ងៃទី៣០ ខែសីហា ឆ្នាំ២០១៤ បន្ទាប់ពីសំណុំពាក្យបណ្ដឹង និងកិច្ចដំណើរការចុះអង្កេតជាក់ស្ដែងដល់មូលដ្ឋានរបស់គណៈកម្មាធិការសុរិយោដីថ្នាក់ជាតិ និងដោយយោងអនុសាសន៍ដឹកនាំ សម្ដេចតេជោ នាយករដ្ឋមន្ត្រី ទើបក្រសួងរៀបចំដែនដី នគរូបនីយកម្ម និងសំណង់ សម្រេចចេញប័ណ្ណកម្មសិទ្ធិជូនប្រជាពលរដ្ឋទាំង ៣២៩គ្រួសារ ស្មើនឹង ៣៩១ក្បាលដី ស្មើនឹង ១៥៦២.៧៥ហិកតានៅភូមិគ្រង និងភូមិថ្ពង ឃុំស្នួល ស្រុកស្នួល។
លោក គង់ គឹមនី អភិបាលស្រុកស្នួល បានបញ្ជាក់ថា ដោយឡែកការប្រគល់ប័ណ្ណកម្មសិទ្ធជូនប្រជាពលរដ្ឋនៅក្នុងថ្ងៃនេះ គឺជាលើកទី៣ ដែលមានចំនួនប្រជាពលរដ្ឋ ៤៦គ្រួសារ ស្មើនឹង ៤៦ក្បលដី ក្នុងនោះភូមិគ្រង មានចំនួន ២៦គ្រួសារ ស្មើនឹង ២៦ក្បាលដី និងភូមិថ្ពង មានចំនួន ២០គ្រួសារ ស្មើនឹង ២០ក្បាលដី។លោក បានបន្តឲ្យដឹងថា លទ្ធផលដែលសម្រេចបានខាងលើនេះ គឺបានឆ្លុះបញ្ចាំងឲ្យឃើញពីការខិតខំប្រឹងប្រែងរបស់ក្រុមវិរៈយុវជនស្ម័គ្រចិត្តសម្ដេចតេជោ និងក្រុមមន្ត្រីបច្ចេកទេស ដែលបានបំពេញការងារអស់ពីកម្លាំងកាយចិត្តក្នុងការចុះអនុវត្តនូវបទបញ្ជាលេខ ០១ បបរបស់រាជរដ្ឋាភិបាល ដែលបានដាក់ចេញនូវគោលនយោបាយចាស់សកម្មភាពថ្មីលើវិស័យដីធ្លី ប្រកបដោយស្មារតីតស៊ូព្យាយាម ឆន្ទះ និងមនសិកាខ្ពស់ និងដោយមានការចូលរួមពីកម្លាំងសមត្ថកិច្ចទាំងបីប្រភេទ អាជ្ញាធរមូលដ្ឋាន និងក្រុមគ្រូពេទ្យស្ម័គ្រចិត្តផងដែរ។
ជាមួយគ្នានោះដែរ លោក គង់ គឹមនី អភិបាលស្រុកស្នួល ក៏បានសម្ដែងការដឹងគុណយ៉ាងជ្រាលជ្រៅចំពោះការដឹកនាំដ៏ឈ្លាសវៃប្រកបដោយគតិបណ្ឌិត និងការផ្គត់ផ្គង់ដ៏ថ្លៃថ្លារបស់សម្ដេចតេជោ ហ៊ុន សែន និងសម្ដេចគតិព្រឹទ្ធបណ្ឌិត ក្នុងការបែងចែកដីធ្លី និងផ្ដល់ប័ណ្ណកម្មសិទ្ធិដីស្របច្បាប់ជូនប្រជាពលរដ្ឋ ជួយដោះស្រាយបានទាន់ពេលវេលានូវក្ដីកង្វល់របស់ប្រជាពលរដ្ឋក្នុងការកាន់កាប់ដីមិនស្របច្បាប់ ពោលគឺចំបេះដូងរបស់ប្រជាកសិករ។
ក្នុងនោះដែរ ប្រជាពលរដ្ឋ ក្រោយពីទទួលបានប័ណ្ណកម្មសិទ្ធិកាន់កាប់ដីធ្លីស្របច្បាប់ហើយនោះ ក៏បានសម្ដែងនូវទឹកចិត្តសប្បាយត្រេកអរ និងសម្ដែងនូវការដឹងគុណយ៉ាងជ្រាលជ្រៅចំពោះរាជរដ្ឋាភិបាល ដែលមានសម្ដេចតេជោ ហ៊ុន សែន ដែលជានិច្ចកាលសម្ដេចតែងតែជួយដោះស្រាយទុកលំបាករបស់ប្រជាពលរដ្ឋ ជាពិសេស គឺបានផ្ដល់ប័ណ្ណកម្មសិទ្ទិដីធ្លីស្របច្បាប់នេះតែម្ដង៕
ដោយ កិៈ ខន