រតនគិរី ៖ ឈ្មួញ រកស៊ីឈើនៅខេត្ដរតនគិរីដែលភាគច្រើនជនជាតិយួនបាននិងកំពុង សម្រុកកាប់យកឈើ រួចប្រមូលដឹកចេញទៅលក់នៅព្រំដែនវៀតណាមទាំងយប់ទាំងថ្ងៃតាមច្រករបៀងនានា ។ប្រជាពលរដ្ឋនៅស្រុកអូរយ៉ាដាវ បានឲ្យដឹងថា៖ ថា ជារៀងរាល់ថ្ងៃ ជាពិសេសនៅពេលយប់ មានរថយន្តឡង់គ្រីស័រ កាត់ទ្រុង៥ ទៅ៦គ្រឿង និងម៉ូតូរាប់រយគ្រឿងសម្រុក ដឹកឈើប្រភេទសុក្រំ, ឈើឈ្លីកឆ្លងកាត់ច្រករបៀងលេខ១៩, ច្រករបៀងភ្នំក្រហម ដែលគ្រប់គ្រងដោយនគរបាលការពារព្រំដែនវរៈលេខ៦២៣ និងយោធាវរការពារព្រំដែនវរៈលេខ១០២ ក្នុងស្រុកអូរយ៉ាដាវ ។បើតាមពលរដ្ឋទាំងនោះ មន្ត្រីនគរបាលម្នាក់ ដែលគេស្គាល ឈ្មោះថា ចាន់ ដារ៉ា (ហៅយ៉ាត) បានសហការជាមួយឈ្មួញឈើជនជាតិយួន បានធ្វើផ្លូវចូលទៅដីវៀតណាម សម្រាប់ដឹកឈើ ។
ទាក់ទិនទៅនឹងការធ្វើផ្លូវច្រករបៀង សម្រាប់ដឹកឈើដោយគ្មានការអនុញ្ញាតពីថ្នាក់លើនេះ ភ្នាក់ងារអ្នកយកព័ត៌មានមិនអាចសុំការបំភ្លឺពីលោក ងួន សុវណ្ណា ប្រធានវរនគរបាលព្រំដែនលេខ៦២៣ និងលោក អ៊ុក សុធី ប្រធានវរយោធាការពារព្រំដែនលេខ១០២ បានទេ នៅថ្ងៃទី២២ កុម្ភៈ ដដែលនេះ ។
កន្លងមកគេសង្កេតឃើញពួកឈ្មួញយួនធំៗមួយចំនួន ចូលមកក្នុងខេត្ដរតនគិរី តែងតែដាក់កម្មកររបស់ខ្លួនឱ្យចូលមកដឹកឈើល្អៗ មានតម្លៃខ្ពស់ នៅក្នុងតំបន់ឧទ្យានជាតិអូរយ៉ាដាវ ។បើតាមប្រជាពលរដ្ឋបច្ចុប្បន្ន ឈ្មួញយួននៅតេបន្ដធ្វើជាហូរហែរ តែគេកម្រឃើញមានមន្ដ្រីបរិស្ថាន ឫសមត្ថកិច្ចពាក់ព័ន្ធធ្វើការបង្ក្រាបពួកឈ្មួញទាំងនោះណាស់ ។
